ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ

ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ - 888 2 - ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ
ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ - AGL banner - ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ

ໂດຍ: ທິດ​ກໍ່າ

​ເຫັນ​ແຫ​ລ່ງຂ່າວ​ໃນ​ວັນ​ທີ 3 ມິຖຸນາ 2020 ຜ່ານ​ມາ ທາງ​ເມື​ອງຕົ້ນ​ເຜິ້ງ ​ແຂວງ​ບໍ່​​ແກ້ວ ​ເຊິ່ງ​ເປັນ​ແຂວງ​ທີ່ຢູ່​ທາງ​ພາກ​ເໜືອ​ດ້ານ​ຕາ​ເວັນ​ຕົກ​ຂອງ​ລາວ​ໄດ້​ພາກັນ​ບຸກທະລຸ​ແກ້​ໄຂ​ປ້າຍ​ໂຄສະນາ​ທີ່​ບໍ່​ຖືກຕ້ອງ​ຕາມ​ລະບຽບ​ກົດໝາຍ​ຂອງ ສປປ ລາວ. ບັນດາ​ປ້າຍ​ຕ່າງໆ​ທີ່​ເຫັນ​ວ່າ​ຜິດ​ກົດ​ໝາຍ​ນີ້​ໄດ້​ແກ່​ປ້າຍ​ທີ່​ບໍ່​ມີ​ພາສາ​ລາວ ຫລື​ມີ​ກໍ​ໂຕ​ນ້ອຍໆ​ກວ່າ​ພາສາ​ອື່ນ​ທີ່​ເປັນ​ພາສາ​ຕ່າງປະ​ເທດ. ສຳລັບ​ຮູບ​ການ ​ແລະ ວິທີ​ການ​ແກ້​ໄຂ​ນັ້ນ ຕາມ​ແຫ​ລ່ງຂ່າວ​ກໍ​ບອກ​ວ່າ: ພາກັນ​ຮື້ຖອນ​ບັນດາ​ປ້າຍ​ທີ່​ບໍ່​ມີ​ພາສາ​ລາວ, ຮື້ຖອນ​ປ້າຍ​ທີ່​ມີ​ພາສາ​ຕ່າງປະ​ເທດ​ຢູ່​ເທິງ​ພາສາ​ລາວ ຫລື ປ້າຍ​ທີ່​ມີ​ພາສາ​ລາວ​ໂຕ​ນ້ອຍໆ​ຂຽນ​ຢອງ​ໃສ່​ຢູ່​ເທິງ​ພາສາ​ຕ່າງປະ​ເທດ​ທີ່​ໃຫຍ່​ກວ່າ, ປ້າຍ​ທີ່​ມີ​ສີພື້ນ ​ແລະ ​ໂຕ​ໜັງສື​ບໍ່​ຖືກຕ້ອງ​ຕາມ​ລະບຽບ​ການ​ທີ່​ທາງ​ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ​ໄດ້​ກຳນົດ​ອອກ.

ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ - image - ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ

ຕໍ່​ຮູບ​ການ​ປະຕິບັດ​ການຄັ້ງນີ້ ​ເກີນວ່າ​ມີ​ຫລາຍ​ຄົນ​ຍ້ອງຍໍ​ຊົມ​ເຊີຍ ​ແລະ ສະໜັບສະໜູນ ​ເພາະວ່າ​ເບິ່ງ​ຢ່າງ​ໜຶ່ງ​ຄື​ວ່າ​ມັນ​ເຫລືອ​ເກີນ​ໂພດ, ຜູ້​ທີ່​ຜະລິດ​ປ້າຍ​ອອກ​ມາ​ຄື​ບໍ່​ຮູ້​ອີ່​ໂນ່ອີ່​ເນ່, ບໍ່​ຮູ້​ລະບຽບ​ກົດໝາຍ ​ແລະ ຖ້າ​ວິ​ເຄາະ​ເບິ່ງ​ຄັກໆ​ຄື​ວ່າ​ມັນ​ດູ​ລ້າ​ຜ້າ​ປຽບ​ເຮັດ​ໃສ່​ກັນ. ອີກ​ປະການ​ໜຶ່ງ ມັນ​ຄື​ເປັນ​ການ​ຢຽບ​ຫຍາມ​ການຈັດຕັ້ງພັກ-ລັດ, ຄື​ບ້ານ​ເຮົາ​ບໍ່​ມີ​ຂື່​ມີ​ແປ ​ແລະ ໝິ່ນປະໝາດ​ຊາດ​ລາວ, ​​ໂຕ​ໜັງສື​ລາວ, ຢູ່​ປະ​ເທດ​ລາວ​​ແທ້ໆ​ບໍ່​ແມ່ນ​ປະ​ເທດ​ຕົ້ນກຳ​ເນີ​ດ​ເຊື້ອຊາດ​ຂອງ​ຕົນ​ເອງ ​ເປັນ​ພຽງ​ປະ​ເທດ​ທີ່​ຕົນ​ມາ​ລົງທຶນ​ເຮັດ​ທຸລະ​ກິດ​ ຕ້ອງ​ຄຳນຶງ​ເຖິງ​ເຊື້ອຊາດ ​ແລະ ອຳນາດ​ອະທິປະ​ໄຕ​ຂອງ​ປະ​ເທດ​ທີ່​ຕົນ​ມາ​ອາ​ໄສ​ຢູ່ ​ແລະ ຖ້າ​ວິ​ເຄາະ​ເບິ່ງ​ຄັກໆ ກໍ​ຄື​ວ່າການ​ຈັດຕັ້ງ​ເຮົາ​ບໍ່​ເດັດຂາດ​ເຂັ້ມ​ແຂງ​ໃນ​ການ​ຄຸ້ມ​ຄອງລັດ, ຄຸ້ມ​ຄອງ​ສັງຄົມ. ສະພາບ​ຢູ່​ບ້ານ​ເຮົາ, ​ເວົ້າ​ເລື່ອງ​ປ້າຍ​ໂຄສະນາ​ຍັງ​ຂ້ອນ​ຂ້າງ​ສັບສົນ, ອົນລະ​ເວ​ງ ບໍ່​ເປັນ​ລະບຽບ ​ແລະ ບໍ່​ທັນ​ຫັນ​ສູ່​ການ​ຄຸ້ມ​ຄອງ​ທີ່ດີ ​ແລະ ​ເດັດຂາດ​ຕາມ​ລະບຽບ​ກົດໝາຍ. ມີ​ປ້າຍ​ຈຳນວນຫລາຍ​ບໍ່​ທັນ​ສອດຄ່ອງ​ກັບ​ຮີດຄອງ​ປະ​ເພນີ ​ແລະ ກົດໝາຍ​ບ້ານ​ເມືອງ. ຫວ່າງ​ສອງ​ສາມ​ປີ​ຫລັງ​ນັ້ນ ພວກ​ເຮົາ​ວຸ້ນວາຍ​ກັນ​ເລື່ອງ​ປ້າຍ​ໂຄສະນາ​ຂາຍ​ເບຍ, ມີ​ທັງ​ປ້າຍ​ໂຄສະນາ​ທາງ​ອ້ອມ ​ແລະ ທາງ​ກົງ. ປ້າຍ​ໂຄສະນາ​ທາງ​ອ້ອມ​ນັ້ນ​ແມ່ນ​ເອົາ​ຜູ້​ສາວ​ຄົນ​ງາມໆ​ນຸ່ງ​ເສື້ອສີ​ເຫລືອງ​ທີ່​ມີ​ກາ​ເບຍ​ລາວ, ​ເອກະລັກ​ເບຍ​ລາວ​ໄປ​ບໍລິການ​ເສີ​ບຕາມ​ຮ້ານ​ອາ​ຫານ ​ແລະ ຮ້ານ​ກິນ​ດື່ມ​ບ່ອນ​ຕ່າງໆ​ໃນ​ທົ່ວ​ນະຄອນຫລວງ​ວຽງ​ຈັນ ​ເບິ່ງ​ແລ້ວ​ປານ​ດອກ​ສະ​ເລ​ເຕພວມ​ບານ​ເຮືອງ​ເຮື່ອ. ສ່ວນວ່າ​ປ້າຍ​ໂຄສະນາ​ທາງ​ກົງ​ກໍ​ແມ່ນ​ປ້າຍ​ທີ່​ຢັ່ງຢາຍ​ຢູ່​ຕາມ​ຮ້ານ​ອາຫານ ​ແລະ ຮ້ານ​ກິນ​ດື່ມ, ຕາມ​ຮ້ານ​ໄຟ​ຍິບ​ແຍບ​ໃນ​ທົ່ວ​ປະ​ເທດ​ແຕ່​ເໜືອ​ເຖິງ​ໃຕ້ ຈົນ​ວ່າ​ໄປ​ທາງ​ໃດ​ກໍ​ເຫັນ​ແຕ່​ປ້າຍ​ໂຄສະນາ​ເບຍ​ລາວ​ຄັບທີບ ຄື​ວ່າ​ມີ​ການ​ປຸກລະດົມ​ໃຫ້​ກັນ​ກິນ​ເບຍ​ ຈົນ​ມາ​ຮອດ​ປັດຈຸບັນ​ຄົນ​ລາວ​ຈຳນວນ​ຫລວງຫລາຍ​ພາກັນ​ຕິດ​ເບຍ​ປານ​ຄົນ​ຕິດ​ຝິ່ນ. ຈາກ​ສະພາບ​ທີ່​ເກີນ​ກວ່າ​ເຫດ​ນັ້ນ ພວກ​ເຮົາ​ກໍ​ພາກັນ​ມາ​ວິ​ເຄາະ​ເວົ້າວ່າ​ກັນ​ເຮັດ​ໃຫ້​ມັນ​ສອດຄ່ອງ​ກັບ​ສະພາບ​ຄວາມ​ເປັນ​ຈິງ​ຂອງ​ປະ​ເທດ ​ໂດຍ​ຍຶດໝັ້ນທາງ​ດ້ານ​ຮີດຄອງ​ປະ​ເພນີ, ວັດທະນະທຳ​ມາ​ເປັນ​ຫລັກ ກໍ​ເຫັນ​ວ່າ​ໄດ້​ຫລຸດຜ່ອນ​ໄປ​ຫລາຍ​ເຕີບ. ​ເຖິງ​ວ່າ​ມາອດ​ປັດຈຸ​ບັນ​ຍັງ​ບໍ່​ສາມາດ​ສະຫລຸບ​ໄດ້​ວ່າ​ມັນ​ມີ​ຜົນ​ດີ​ຈັກ​ເປີ​ເຊັນ, ຜົນ​ຮ້າຍ​ຈັ​ກ​ເປີ​ເຊັນ, ອັນ​ໄດ້​ຄື​ຫຍັງ ​ແລະ ​ເສຍ​ໜ້ອຍ​ຫລາຍ​ປານ​ໃດ.

ກ່ຽວ​ກັບ​ເລື່ອງ​ປ້າຍ​ໂຄສະນາ​ຢູ່​ບ້ານ​ເຮົາ​ທີ່​ຢັ່ງຢາຍ​ຫລາກ​ຫລາຍ​ໃນ​ດ້ານ​ແງ່​ມຸມ​ຕ່າງໆ ກໍ​ມີ​ລັກສະນະ​ເໝືອນ​ກັນ. ປັດຈຸບັນ​ທົ່ວ​ເມືອງ​ລາວ​ເຮົາ​ດຽວ​ນີ້​ແມ່ນ​ມີ​ຫລາຍ​ຊະນິດ​ຈົນ​ນັບ​ບໍ່​​ໄຂ່ວ ​ແລະ ມີ​ຈຳນວນ​ບໍ່​ໜ້ອຍ​ຍັງ​ບໍ່​ຖືກຕ້ອງ ​ຄື​ດັ່ງ​ຢູ່​ເມືອງ​ຕົ້ນ​ເຜິ້ງ, ຢູ່​ແຂວງ​ອື່ນໆ​ໃນ​ທົ່ວ​ປະ​ເທດ ກໍ​ມີ​ຢ່າງ​ຫລວງຫລາຍ ​ແລະ ສະ​ເພາະ​ຢູ່​ນະຄອນຫລວງ​ວຽງ​ຈັນ​ກໍ​ມີ​ບໍ່​ອຶດ​ບໍ່​ຢາກ. ທິດ​ກໍ່າ ​ໄປ​ເຫັນ​ບາງ​ບ່ອນ​ປ້າຍ​ສຳນັກງານ​ບໍລິສັດ​ບໍ່​ມີ​ພາສາ​ລາວ​ພໍ​ໂຕ, ມີ​ແຕ່​ພາສາ​ຈີນ​ກັບ​ພາສາ​ອັງກິດ ຫລື​ມີ​ກໍ​ແມ່ນ​ໂຕ​ນ້ອຍໆ​ກວ່າ​ພາສາ​ຈີນ ​ແລະ ພາສາ​ອັງກິດ. ນອກ​ນັ້ນ ປ້າຍ​ບາງ​ບ່ອນ​ກໍ​ຂຽນ​ບໍ່​ຖືກ​ຕາມ​ຫລັກ​ໄວຍາກອນ​ລາວ ມີ​ສຳນຽງ​ພັດ​ພ້ຽນ​ໄປ​ທາງ​ພາສາ​ຈີນ ​ເມື່ອ​ອ່ານ​ແລ້ວ​ມັນ​ລະ​ປຸກ​ປານ​ຢາ​ບ້ານ​ຫ້ອມ.

ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ - Wave100S AD to Website 2020 0 - ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ

​ເມື່ອ​ຕັ້ງ​ໂຈດ​ກັນ​ວ່າ, ບັນດາ​ປ້າຍ​ໂຄສະນາ​ທີ່​ພວມ​ຈະ​ຜະລິດ​ຂຶ້ນມາ​ໃໝ່, ​ໂຕ​ທີ່​ຜະລິດ​ແລ້ວ​ເອົາ​ໄປ​ຕັ້ງ​ເຈີ່ນ​ເທີ້ນຢູ່​ແຕ່​ລະ​ບ່ອນ​ແມ່ນ​ໃຜ​ເປັນ​ຜູ້​ຮັບຜິດຊອບ​ຄຸ້ມ​ຄອງ​ກວດກາ​ໃຫ້​ເຂົ້າລະບຽບ​ກົດໝາຍ ? ຄຳ​ຕອບ​ໂຈດ​ກໍ​ຄື ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ. ນອກ​ນັ້ນ ກໍ​ລາມ​ໄປ​ຮອດ ປກສ, ປກຊ, ກະຊວງ​ໂຍທາ​ທິການ ​ແລະ ຂົນ​ສົ່ງ ຕ່າງ​ແຕ່​ວ່າ​ໃຜ​ຮັບຜິດຊອບ​ດ້ານ​ໃດ, ​ໃຜ​ໜ້ອຍ​ໃຜ​ຫລາຍ, ຕ້ອງ​ແບ່ງ​ງານ​ກັນ​ຄັກ​ແນ່ ບໍ່ຊັ້ນມັນ​ຈະ​ລວາດ​ແຂ້ວ​ເຕົ່າ​ຖິ້ມພຸ້ນ​ຖິ້ມພີ້. ສຸດ​ທ້າຍ​ມາ​ມັນ​ກໍ​ເປັນ​ໄປ​ຕາມ​ວາດ, ຕາມ​ຍະຖາ​ກຳ ຄື​ດັ່ງ​ເຮົາ​ເຫັນ​ທຸກ​ວັນ​ນີ້.

​ແນວ​ໃດ​ກໍ​ດີ, ຕາມ​ເຮົາ​ວ່າ: ​ເວົ້າ​ເລື່ອງ​ປ້າຍ​ໂຄສະນາ​ຢູ່​ບ້ານ​ເຮົາ ຖ້າ​ບໍ່​ມີ​ການ​ຄຸ້ມ​ຄອງ​ທີ່​ດິນ ​ແລະ ​ເດັດຂາດ​ຈິງ​ຈັງ​ອີ່ຫລີ ມັນ​ຈະ​ມີ​ຫລາຍ​ບັນຫາ​ທີ່​ເກີດ​ຂຶ້ນ, ການ​ເປັນ​ມີດ​ສອງ​ຄົມ, ຍ້ອນ​ທັນ​ໃຜ​ທັນ​ເຮັດ, ທັນ​ໃຜ​ທັນ​ຂຽນ ​ໂດຍ​ສະ​ເພາະ​ແມ່ນ​ບໍລິສັດ​ທີ່​ເຮັດ​ປ້າຍ​ໂຄສະນາ ​ແລະ ບໍລິການ​ພິມ​ຈຳໜ່າຍ​ຂອງ​ຕ່າງປະ​ເທດ​ທີ່​ພວມ​ລົງທຶນ​ຢູ່​ລາວ​ເຮົາ​ຕ້ອງ​ໄດ້​ມີ​ການ​ຄຸ້ມ​ຄອງ​ກວດກາ​ຢ່າງ​ເຄັ່ງ​ຄັດ, ​ໃກ້ຊິດ​ຄັກ​ແນ່ ບໍ່ຊັ້ນຄຳ​ເວົ້າອາດ​ຈະ​ພ້ຽນ ນະຄອນຫລວງ​ວຽງ​ຈັນ ມັນ​ຈະ​ກາຍ​ເປັນ ນະຄອນຫລວງ​ວຽງ​ຈັງ.

ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ - lattana banner - ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ
ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ -    AD conten website - ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ
ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ - lattana banner 1 - ປ້າຍ​ໂຄສະນາ​ທີ່​ບໍ່​ມີ​ພາສາ​ລາວ​ເຖິງ​ຄາວ​ຕ້ອງ​ໄດ້​ແກ້​ໄຂ
error: Alert: ເນື້ອຫາຂ່າວມີລິຂະສິດ !!