ທຣຳ ຍອມໃສ່ຜ້າປິດປາກ-ດັງປະຕິບັດພາລະກິດ ຢູ່ສະຖານທີ່ສາທາລະນະເປັນຄັ້ງທຳອິດ
ປະທານາທິບໍດີ ໂດນັລ ທຣຳ ຂອງອາເມລິກາ ຍອມໃສ່ຜ້າປິດປາກ-ດັງຢູ່ສະຖານທີ່ສາທາລະນະເປັນຄັ້ງທຳອິດ ລະຫວ່າງປະຕິບັດພາລະກິດຢ້ຽມຢາມທະຫານທີ່ບາດເຈັບ ແລະ ບຸກຄະລາກອນທາງການແພດ ພາຍໃນໂຮງໝໍກອງທັບວໍເຕີ ຣີດ ນອກນະຄອນຫລວງວໍຊິງຕັນ ດີ.ຊີ ໃນວັນທີ 11 ກໍລະກົດ ໂດຍຖືເປັນການປ່ຽນແປງທ່າທີ ຫລັງຈາກທ່ານປະຕິເສດຂໍ້ແນະນຳຂອງຜູ້ຊ່ຽວຊານມາຕະຫລອດ ວ່າຈະບໍ່ຍອມໃສ່ຜ້າປິດປາກ-ດັງ ເພື່ອປ້ອງກັນໂຄວິດ-19 ຢູ່ສະຖານທີ່ສາທາລະນະ.
ກ່ອນການເດີນທາງຢ້ຽມຢາມໂຮງໝໍ, ທ່ານ ທຣຳ ໃຫ້ສຳພາດຕໍ່ສື່ມວນຊົນວ່າ: ທ່ານບໍ່ເຄີຍຕໍ່ຕ້ານການໃສ່ຜ້າປິດປາກ-ດັງ, ແຕ່ເຊື່ອວ່າຕ້ອງໃສ່ໃນເວລາ ແລະ ສະຖານທີ່ທີ່ເໝາະສົມ.
ການປ່ຽນທ່າທີຂອງທ່ານ ທຣຳ ມີຂຶ້ນຫລັງຕົວເລກຜູ້ຕິດເຊື້ອໂຄວິດ-19 ແຕ່ລະວັນຢູ່ອາເມລິກາເພີ່ມສູງເປັນສະຖິຕິໃໝ່ເຖິງ 66.500 ກວ່າຄົນ ໃນວັນທີ 11 ກໍລະກົດ ເຮັດໃຫ້ຜູ້ຕິດເຊື້ອສະສົມຢູ່ອາເມລິກາສູງກວ່າ 3.355.000 ຄົນແລ້ວ ແລະ ເສຍຊີວິດລວມ 137.000 ກວ່າຄົນ.
ກ່ອນໜ້ານີ້ ໃນວັນທີ 10 ກໍລະກົດ ສຳນັກຂ່າວ CNN ລາຍງານວ່າ: ທ່ານ ທຣຳ ຕອບຮັບຈະໃສ່ຜ້າປິດປາກ-ດັງລະຫວ່າງການຢ້ຽມຢາມໂຮງໝໍກອງທັບວໍເຕີ ຣີດ ຫລັງຜູ້ຊ່ວຍຂອງທ່ານຂໍຮ້ອງຢ່າງໜັກ ເພື່ອໃຫ້ທ່ານ ທຣຳ ໃສ່ຜ້າປິດປາກ-ດັງເປັນຕົວຢ່າງຕໍ່ຜູ້ສະໜັບສະໜູນ ແລະ ໃນການໃຫ້ສຳພາດຕໍ່ Fox News, ທ່ານ ທຣຳ ກ່າວວ່າ: ທ່ານຈະໃສ່ຜ້າປິດປາກ-ດັງລະຫວ່າງໄປຢ້ຽມຢາມທະຫານທີ່ບາດເຈັບ ແລະ ບຸກຄະລາກອນທາງການແພດຢູ່ວໍເຕີຣີດ ເພາະເປັນສິ່ງທີ່ເໝາະສົມ.
ເຖິງຢ່າງໃດກໍຕາມ, ທ່າທີຂອງທ່ານ ທຣຳ ສວນທາງກັບໄລຍະເດືອນເມສາ ຫລັງສູນຄວບຄຸມ ແລະ ປ້ອງກັນພະຍາດລະບາດຂອງອາເມລິກາ (CDC) ເລີ່ມຕົ້ນປະກາດຂໍ້ແນະນຳໃຫ້ປະຊາຊົນໃສ່ຜ້າປິດປາກ-ດັງຢູ່ສະຖານທີ່ສາທາລະນະ, ແຕ່ທ່ານ ທຣຳ ບອກກັບນັກຂ່າວວ່າ: ຈະບໍ່ປະຕິບັດຕາມຂໍ້ແນະນຳດັ່ງກ່າວ.
