ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020

ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020 - Time fo an Adventure 2020 08 05T131718 - ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020
ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020 - 174233 - ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020
  1. Juan Carlos ອະດີດ​ກະສັດ​ຂອງ​ປະ​ເທດສະ​ເປ​ນ ​ໄດ້​ທຳ​ການ​ເນລະ​ເທດ​ຕົວ​ເອງ​ອອກ​ຈາກ​ປະ​ເທດ​ແລ້ວ​ໃນ​ປັດຈຸບັນ ​ໂດຍ​ນັບ​ແຕ່​ປີ 2014 ທ່ານ​ໄດ້​ຜະ​ເຊີນ​ກັບ​ສະພາບ​ສຸຂະພາບ​ບໍ່​ດີ ​ແລະ ​ເລື່ອງ​ຂໍ້​ຫາ​ທາງ​ການ​ເງິນ ຕໍ່​ມາ​ໄດ້​ສະລະຣາຊະ​ບັນລັງ ​ແລະ ຊັບ​ສົມບັດ​ໃຫ້​ແກ່ Felipe ​ເຊິ່ງ​ເປັນ​ລູກ​ຊາຍ​ຂອງ​ທ່ານ.

​ເມື່ອ​ບໍ່​ດົນ​ມາ​ນີ້ Juan Carlos ​​ໄດ້ຖືກ​ກ່າວ​ຫາ​ຢ່າງໜັກ​ການ​ສໍ້​ລາດ​ບັງ​ຫລວງ, ການ​ຟອກ​ເງິນ ​ແລະ ການ​ຫລີກ​ລ່ຽງພາສີ ​ເຖິງ​ວ່າ​ທ່ານ​ຈະ​ເປັນ​ຜູ້​ຄວບ​ຄຸມ ​ແລະ ​ເບິ່ງ​ແຍງ​ການ​ປ່ຽນ​ຜ່ານ​ປະ​ເທດສະ​ເປ​ນຈາກ​ລະບອບ​ຜະ​ເດັດ​ການ​ສູ່​ລະບອບ​ປະຊາທິປະ​ໄຕ​ກໍ​ຕາມ ​ແຕ່​ເລື່ອງ​ນີ້​​ເຮັດ​ໃຫ້​ທ່ານ​ຕ້ອງ​ຜະ​ເຊີນ​ກັບ​ຄວາມ​ລຳບາກ​ໃຈ​ບໍ່​ໜ້ອຍ.

ການ​ເນລະ​ເທດ​ຕົນ​ເອງ​ອອກ​ຈາກ​ປະ​ເທດ​ຂອງ Juan Carlos ​ເກີດ​ຂຶ້ນທ່າມກາງ​ການ​ສືບສວນ​ຂອງ​ສານ​ສະ​ເປ​ນ​ໃນ​ຫລາຍ​ຂໍ້​ຫາ ​ເຊິ່ງຍັງ​ຄ້າງ​ຄາ​ຢູ່​ໃນ​ຂະ​ບວນການ.

  1. HSBC ທະນາຄານ​ໃຫຍ່​ທີ່​ສຸດ​ຂອງ​ເອີຣົບ​ໄດ້​ລາຍ​ງານ​ຜົນ​ກຳ​ໄລ​ກ່ອນ​ຫັກ​ພາສີ​ເປັນ​ຈຳນວນ 4,3 ພັນ​ລ້ານ​ໂດ​ລາ ​ໃນ 6 ​ເດືອນ​ຕົ້ນປີ​ 2020 ຫລຸດ​ລົງ 65% ​ເມື່ອ​ທຽບ​ໃສ່​ໄລຍະ​ດຽວ​ກັນ​ຂອງ​ປີ 2019 ​ແລະ ຮຸນ​ແຮງ​ກວ່າ​ການ​ຄາດ​ຄະ​ເນ​ໄວ້​ໃນ​ທຸກ​ກໍລະນີ.

ທະນາຄານ​ໄດ້​ກ່າວ​ໂທດ​ທີ່​ຄ່າ​ໃຊ້​ຈ່າຍ​ຂອງ​ໜີ້​ເສ​ຍ​ໄລຍະ​ທີ່​ເກີດ​ການລະບາດ​ເຊັ່ນ​ດຽວ​ກັບ​ການ​ກ່າວ​ໂທດ​ຄວາມ​ເຄັ່ງ​ຕຶງ​ລະຫວ່າງ ອາ​ເມລິ​ກາ-ຈີນ ທີ່​ທະວີ​ຄວາມ​ຮຸນ​ແຮງ​ຂຶ້ນຢ່າງ​ຕໍ່​ເນື່ອງ ​ເຖິງ​ວ່າ​ຜົນ​ກຳ​ໄລ​ສູງ​ສຸດ​ທີ່​ພວກ​ເຂົາ​​ເຮັດ​ໄດ້​ຈະ​ຢູ່​ໃນ​ປະ​ເທດ​ເຂດ​ອາຊີ ​ໂດຍ​ສະ​ເພາະ​ຮົງ​ກົງ.

  1. ຫລັງ​ຈາກ​ຂູ່​ຫ້າມ​ແອັບ TikTok ຂອງ Bytedance Ltd. ​ເຊິ່ງ​ເປັນ​ບໍລິສັດ​ສັນຊາດ​ຈີນ, ປະທານາທິບໍດີ ​ໂດ​ນັລ ທຣຳ ​ໄດ້​ໃຫ້ການ​ຕອບ​ຮັບ​ສຳລັບ​ການ​ເຂົ້າຊື້​​ໂດຍ Microsoft ຫລື ບໍລິສັດ​ອື່ນ​ທີ່​ເປັນ​ສັນຊາດ​ອາ​ເມ​ລິ​ກາ.

ທ່ານ​ຢືນຢັນ​ວ່າ​ແອັບ​ຈະ​ຖືກ​ຫ້າມ​ໃຊ້​ຈາກ​ອາ​ເມ​ລິ​ກາ​ຢ່າງ​ແນ່​ນອນ ຖ້າ​ການ​ຊື້ຂາຍ​ຄັ້ງນີ້​ບໍ່​ປະສົບ​ຜົນສຳ​ເລັດ​ກ່ອນ​ວັນ​ທີ 15 ກັນຍາຈະ​ເຖິງ​ນີ້. ນອກຈາກ​ນີ້ ຍັງ​ກ່າວ​ອີກ​ວ່າ: ກະຊວງ​ການ​ເງິນ​ອາ​ເມ​ລິ​ກາ​ຈະ​ຕ້ອງ​ໄດ້​ຮັບ​ກຳ​ໄລ​ເພື່ອ​ໃຫ້​ບັນລຸ​ຂໍ້​ຕົກລົງ​ດັ່ງກ່າວ ​ເຖິງ​ວ່າ​ຈະ​ບໍ່​ໄດ້​ອະທິບາຍ​ວ່າ​ຂໍ້​ຕົກລົງ​ຄັ້ງນີ້​ຄວນ​ອອກ​ມາ​ໃນ​ຮູບ​ແບບ​ໃດ.

  1. HIS Markit ບໍລິສັດ​ດ້ານ​ການ​ວິ​ໄຈ​ຕະຫລາດ​ຊັ້ນນຳ​ຂອງ​ໂລກ ກ່າວ​ວ່າ: Demand ທີ່​ເພີ່ມ​ຂຶ້ນຫລັງ​ຈາກ​ການ​ຜ່ອນຄາຍ​ມາດ​ຕະການ Lockdown ​ແລະ ຂໍ້ກຳນົດ​ຕ່າງໆ​ໄດ້​ເຮັດ​ໃຫ້​ກິດຈະກຳ​ໃນ​ຂະ​ແໜງ​ການ​ຜະລິດ​ຂອງ​ສະຫະພາບ​ເອີຣົບຂະຫຍາຍຕົວ​ເປັນຄັ້ງທຳ​ອິດ​ນັບ​ແຕ່​ປີ 2019.

ລາ​ຍງານ​ຂອງ​ພວກ​ເຂົາ​ລະບຸ​ວ່າ: ດັດຊະນີ​ຜູ້​ຈັດ​ຊື້ຈັດ​ຈ້າງ (PMI) ​ເພີ່ມ​ຂຶ້ນຈາກ​ລະດັບ 47,4 ​ໃນ​ເດືອນ​ມິຖຸນາ​ຜ່ານ​ມາສູ່​ລະດັບ 51,8 ​ໃນ​ເດືອນ​ກໍລະກົດ ​ໂດຍ​ຕົວ​ເລກ​ທີ່​ຫລາຍ​ກວ່າ 50 ນີ້​ຈະ​ຖື​ວ່າ​ເປັນ​ການ​ບົ່ງ​ບອກ​ເຖິງ​ການ​ຂະຫຍາຍຕົວ.

  1. ຢ່າງ​ໜ້ອຍ 29 ຄົນ​ຖືກ​ສັງຫານ​ໃນ​ວັນ​ທີ 3 ສິງຫາ​ຜ່ານ​ມາ ຈາກ​ເຫດການ​ປະ​ທະ​ກັນ​ລະຫວ່າງ​ກຸ່ມ Islamic State (IS) ​ແລະ ກອງ​ກຳລັງ​ຮັກສາ​ຄວາມ​ໝັ້ນຄົງ​ແຫ່ງ​ຊາດ​ຂອງ​ອັບ​ກາ​ນິດ​ສະຖານ​ຢູ່​ຄຸກ​ໃນ​ເມືອງ Jalalabad.

IS ​ໄດ້​ບຸກ​ເຂົ້າ​ໂຈມ​ຕີ​ຄຸກ ​ແລະ ພະຍາຍາມ​ຈະ​ປົດ​ປ່ອຍ​ນັກ​ໂທດ​ຫລາຍ​ຄົນ​ໃຫ້​ເປັນ​ອິດສະຫລະ ​ໂດຍ​ຄຸກ​ດັ່ງກ່າວ​ກັກ​ຂັງ​ນັກ​ໂທດ​ປະມານ 1.800-2.000 ຄົນ ​ເຊິ່ງລວມທັງ​ສະມາຊິກ​ຂອງ​ກຸ່ມ IS ​ເອງ ​ແລະ ສະມາຊິກ​ຂອງ​ກຸ່ມ Taliban ທີ່​ເປັນ​ຄູ່​ແຂ່ງ​ກັນ.

ຕຳຫລວດ​ກ່າວ​ວ່າ: ພວກ​ເຂົາ​ສາມາດ​ຈັບ​ກຸມ​ນັກ​ໂທດ​ທີ່​ກຳລັງ​ຫລົບໜີ​ກັບ​ມາ​ໄດ້​ປະມານ 1.000 ຄົນ. ຂະນະ​ທີ່​ຢ່າງ​ໜ້ອຍ 300 ຄົນ​ຫາຍ​ຕົວ​ໄປ.

  1. ກອງທັບ​ຂອງ​ອິດສະ​ລາ​ແອນ​ກ່າວ​ວ່າ: ພວກ​ເຂົາ​ໄດ້​ໂຈມ​ຕີ​ເປົ້າໝາຍ​ທາງ​ການ​ທະຫານ​ຢູ່​ຊີຣີ ​ເຊິ່ງລວມທັງ​ການ​ໃຊ້​ແບັດ​ເຕີຣີຕໍ່ຕ້ານ​ຍົນ, ການ​ລົບ​ກວນ​ສັນຍານ​ຂອງ​ສິ່ງ​ອຳນວຍ​ຄວາມ​ສະດວກ​​ເຊັ່ນ: ອຸປະກອນ​ຄວບ​ຄຸມ​ສັ່ງ​ການ, ວິທະຍຸ ​ແລະ ອື່ນໆ.

ນອກຈາກ​ນີ້ ຍັງ​ມີ​ການ​ໃຊ້​ເຮືອບິນ ​ແລະ ​ເຮ​ລິ​ກົບ​ແຕ ​ໂດຍ​ອິດສະ​ລາ​ແອນ​ອະທິບາຍ​ວ່າ: ​ເລື່ອງ​ນີ້​ເປັນ​ການ​ຕອບ​ໃນ​ຄວາມ​ພະຍາຍາມ​ທີ່​ຈະ​ວາງ​ລະ​ເບີດ​ໃນ​ເຂດ Golan Heights ​ເຊິ່ງຖືກ​ຄອບ​ຄອງ​ໂດຍ​ອິດສະ​ລາ​ແອນ.

ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020 - Wave100S AD to Website 2020 0 - ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020

ຄວາມ​ເຄັ່ງ​ຕຶງ​ໄດ້​ເພີ່ມ​ສູງ​ຂຶ້ນ ​ໂດຍ​ສະ​ເພາະ​ຫລັງ​ຈາກ​ອິດສະ​ລາ​ແອນ​ສັງຫານ​ສະມາຊິກ​ຂອງ Hizbullah ​ເຊິ່ງພວກ​ເຂົາ​ກ່າວ​ວ່າ​ບຸກຄົນ​ດັ່ງກ່າວ​ເປັນ​ທະຫານ​ອາສາ​ສະໝັກ​ຊາວ​ລີ​ບັງ​ທີ່​ໄດ້​ຮັບ​ການ​ສະໜັບ​ສະ​ໜູນ​ຈາກ​ອີຣານ​ໃຫ້​ມາ​ປະຕິບັດ​ການ​ຢູ່​ປະ​ເທດ​ຊີຣີ​ໃນ​ເດືອນ​ກ່ອນ.

  1. ສ່ວນ​ໃໝ່​ຂອງ​ຂົວ​ຂ້າມ​ແມ່ນ້ຳ Polcevera ຢູ່​ເມືອງ Genoa ປະ​ເທດ​ອິຕາ​ລີ ​ເຊິ່ງ​ໄດ້​ຮັບ​ການ​ອອກ​ແບບ​ໂດຍ Renzo Piano ​ໄດ້​ກັບ​ມາ​ເປີດ​ເຮັດ​ວຽກ​ອີກ ຫລັງ​ຈາກ​ການ​ຖະຫລົ່ມ​ໃນ​ຄັ້ງກ່ອນ​ເມື່ອ​ປີ 2018 ​ເຊິ່ງຂ້າ​ຊີວິດ​​ໄປ​ເຖິງ 43 ຄົນ.

​ເຫດການ​ດັ່ງກ່າວ​ເກີດ​ຂຶ້ນ​ໃນ​ປະ​ເທດ​ທີ່​ຂຶ້ນຊື່​ເລື່ອງ​ຄວາມ​ກ້າວໜ້າ​ຂອງ​ໂຄງການ​ສິ່ງ​ປຸກ​ສ້າງ​ຕ່າງໆ ຂະນະ​ທີ່​ໂຄງ​ສ້າງ​ໃໝ່​ຂອງ​ຂົວ​ໃຊ້​ເວລາ​ກວ່າ 1 ປີ​ໃນ​ການ​ສ້າງ​ຂຶ້ນມາ ​ໂດຍ Giuseppe Conte ນາຍົກລັດຖະມົນຕີຂອງປະ​ເທດ​ໄດ້​ກ່າວ​ຍົກຍ້ອງ​ວ່າ: ນີ້​ຄື “ສັນຍາ​ລັກ​ອັນ​ໃໝ່​ຂອງ​ປະ​ເທດ​ອິຕາ​ລີ”.

  1. ​ເຖິງ​ວ່າ​ຈະ​ເລີ່​ມຕົ້ນດ້ວຍ​ຜົນສຳ​ເລັດ​ໃນ​ການ​ຄວບ​ຄຸມ COVID-19 ​ແຕ່​ປັດຈຸບັນ ຫວຽດນາມ​ໄດ້​ລາຍ​ງານ​ຜູ້​ຕິດ​ເຊື້ອ​ໃໝ່ 21 ຄົນ ​ເຊິ່ງ​ເຮັດ​ໃຫ້​ຍອດ​ລວມຂອງ​ຜູ້​ຕິດ​ເຊື້ອ​ເພີ່ມ​ຂຶ້ນ​ເປັນ 642 ຄົນ ​ແລະ ມີ​ຜູ້​ເສຍ​ຊີວິດ​ແລ້ວ 6 ຄົນ.

ກ່ອນ​ໜ້າ​ນີ້ ຫວຽດນາມ​ບໍ່​ມີ​ການ​ລາຍ​ງານ​ຜູ້​ຕິດ​ເຊື້ອມາ​ເປັນ​ເວລາ​ເຖິງ 3 ​ເດືອນ ກ່ອນ​ຈະ​ເກີດ​ການລະບາດ​ຂຶ້ນອີກ​ໃນ Danang ​ເຊິ່ງ​ເປັນ​ລີ​ສອດ​ທີ່​ໄດ້​ຮັບ​ຄວາມ​ນິຍົມ​ສູງ​ສຸດ​ຈາກ​ນັກ​ທ່ອງ​ທ່ຽວ​ໃນ​ວັນ​ທີ 25 ກໍລະກົດ​ຜ່ານ​ມາ.

Nguyen Xuan Phuc ນາຍົກລັດຖະມົນຕີຂອງປະ​ເທດ ກ່າວ​ວ່າ: “ນີ້​ຄື​ເວລາ​ຕັດສິນ​ຊີ້​ຂາດ ​ເພື່ອ​ຢຸດ​ຢັ້ງການລະບາດ​ຂອງ​ໄວຣັສ​ໃນ​ວົງ​ກວ້າງ”.

  1. Marathon Petroleum ​ໄດ້​ຕົກລົງ​ຈະ​ຂະຫຍາຍ​ທຸລະ​ກິດ​ສະຖານ​ນີນ້ຳມັນ​ເທິງ​ທາງ​ດ່ວນ​ໃຫ້​ແກ່ Seven & I Holdings ບໍລິສັດ​ສັນຊາດ​ຍີ່ປຸ່ນ ​ເຊິ່ງ​ເປັນ​ເຈົ້າຂອງ​ເຄືອ​ຂ່າຍ 7-Eleven ​ໂດຍ​ຂໍ້​ຕົກລົງ​ດັ່ງກ່າວ​ມີ​ມູນ​ຄ່າ 2,1 ພັນ​ລ້ານ​ໂດ​ລາ.

Seven & I ​ໄດ້​ປະສົບ​ຜົນສຳ​ເລັດ​ໃນ​ການ​ເຈລະຈາ​ຂໍ​ເຂົ້າຊື້ກິດຈະການ​ຄັ້ງນີ້ ​ເຖິງ​ວ່າ​ໃນຕົ້ນປີ​ພວກ​ເຂົາ​ເຄີຍ​ຖອນ​ຕົວ​ຈາກ​ການ​ເຈລະຈາ​ຂໍ​ເຂົ້າຊື້​ໃນ​ຄັ້ງທຳ​ອິດ ​ໂດຍ​ກ່າວ​ໂທດ​ເຖິງ​ຄວາມ​ບໍ່​ແນ່ນອນ​ຈາກ​ການລະບາດ​ຂອງ​ໄວຣັສ ​ເຊິ່ງຕອນ​ນັ້ນ Elliott Management ບໍລິສັດ​ໃຫ້​ຄຳ​ປຶກສາ​ທາງ​ດ້ານ​ການ​ເງິນ ​ໄດ້​​ແນະນຳ​ໃຫ້​ພວກ​ເຂົາ​ຢູ່​ຫ່າງໆ​ຈາກ​ຕະຫລາດ​ໄປ​ກ່ອນ​ໃນ​ຊ່ວງ​ຫລາຍ​ເດືອນ​ຜ່ານ​ມາ ດ້ວຍ​ເຫດຜົນ​ດຽວ​ກັນ​ຄື​ຄວາມ​ບໍ່​ແນ່ນອນ​ຂອງ​ເສດຖະກິດ​ໂລກ.

ຫຸ້ນ​ຂອງ Sevem & I ​ເພີ່ມ​ຂຶ້ນ 8,7% ​ໃນ​ວັນ​ທີ 4 ສິງຫາ ຫລັງ​ຈາກ​ມີ​ຂ່າວ​ອອກ​ມາ​ວ່າ Marathon Ptroleum ​ໄດ້​ຕົກລົງ​ຈະ​ຂາຍ​ກິດຈະການ​ໃຫ້​ພວກ​ເຂົາ.

ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020 - WhatsApp Image 2020 05 27 at 5 - ສະຫລຸບບັນຫາໜ້າສົນໃຈທົ່ວໂລກວັນທີ 4 ສິງຫາ 2020
error: Alert: ເນື້ອຫາຂ່າວມີລິຂະສິດ !!