ບົດຮຽນໃນສະໜາມຮົບຕ້ານຢາເສບຕິດ

- advert banner 728 90 728x90 - ບົດຮຽນໃນສະໜາມຮົບຕ້ານຢາເສບຕິດ

- 543277180 - ບົດຮຽນໃນສະໜາມຮົບຕ້ານຢາເສບຕິດ

​ເນື່ອງ​ໃນ​ໂອກາດ​ວັນ​ຕ້ານ​ຢາ​ເສບ​ຕິດ​ສາກົນ​ທີ່​ພວມ​ຫຍັບ​ໃກ້​ເຂົ້າມາ, ມື້ນີ້​ຜູ້​ຂຽນ​ມີ​ເລື່ອງ​ກ່ຽວ​ກັບ​ມາດ​ຕະການ​ຂອງ​ບາງ​ປະ​ເທດ ​ເພື່ອ​ຈຳກັດ ​ແລະ ກຳຈັດ​ຢາ​ເສບ​ຕິດ​ໃຫ້​ຊິ້ນຊາກ​ໄປ ​ເຊັ່ນ​ຢູ່ອິນ​ໂດ​ເນ​ເຊຍ ​ເຊິ່ງມີ​ຂ່າວ​ອອກ​ມາ​ແຕ່​ຕົ້ນ​ເດືອນພະຈິກ ປີ 2015 ວ່າ​ທາງ​ການ​ຂອງ​ປະ​ເທດ​ນີ້​ໄດ້​ຊອກ​ຫາ​ສະຖານ​ທີ່​ທີ່​ເໝາະ​ສົມ​ໃນ​ການ​ຄຸມ​ຂັງ​ນັກ​ໂທດ​ຄ້າ​ຢາ​ເສບ​ຕິດ ​ເພື່ອ​ບໍ່​ໃຫ້​ພວກ​ເຂົາ​ສາມາດ​ເລັດ​ລອດ​ອອກ​ໄປ​ສ້າງ​ກຳ​ທຳ​ເຂັນ​ອີກ​ເທື່ອ​ໃໝ່ ​ໂດຍ​ອັດ​ຊ່ອງ​ຫວ່າງ​ການ​ພົວພັນ​ຂອງ​ພວກ​ເຂົາ​ເຈົ້າ​ໃຫ້​ມິດ​ຊິດ​ປິດ​ຕັນ. ທາງ​ການ​ເຫັນ​ວ່າ ຄວນ​ເອົາ​ພວກ​ນັກ​ໂທດ​ເຫລົ່າ​ນີ້​ໄປ​ຂັງ​ໄວ້​ຢູ່​ຕາມ​ໝູ່​ເກາະດອນ​ໃນ​ນ່ານນ້ຳທີ່​ເຕັມ​ໄປ​ດ້ວຍ​ຝູງ​ແຂ້​ຊະນິດ​ທີ່​ບໍ່​ໄວ້ໜ້າ​ມະນຸດ​ໃດ​ທີ່​ຈຸ່ມ​ຂາ​ລົງ​ນ້ຳ. ​ແນວ​ຄວາມ​ຄິດ​ສ້າງ​ຄຸກ​ຄຸມ​ຂັງ​ນັກ​ໂທດ​ຄ້າ​ຢາ​ເສບ​ຕິດ​ຢູ່​ເກາະດອນ​ໃນ​ນ່ານນ້ຳທີ່​ມີ​ແຂ້​ຮ້າຍ​ນີ້ ອອກ​ມາ​ຈາກ​ທ່ານ ບູດີ ວາ​ເຊ​ໂຊ (Budi Waseso) ຫົວໜ້າ​ຫ້ອງການ​ຕ້ານ​ຢາ​ເສບ​ຕິດ​ລະດັບ​ຊາດ. ທ່ານ​ເວົ້າບໍ່​ແມ່ນ​ເວົ້າລ້າ, ​ແຕ່​ໄດ້​ເດີນທາງ​ໄປ 3 ​ແຂວງ ​ເພື່ອ​ຊອກ​ສະຖານ​ທີ່​ທີ່​ເປັນ​ເປົ້າໝາຍ. ທ່ານ ບູດີ ບອກ​ວ່າ: ​ເມື່ອ​ກົດໝາຍ​ເອົາ​ພວກ​ນີ້​ບໍ່​ຢູ່ (ພວກ​ຄ້າ​ຢາ​ເສບ​ຕິດ) ກໍ​ຕ້ອງ​ໄດ້​ອາ​ໄສ​ແຂ້​ເຂົ້າຊ່ວຍ, ​ແນ່ນອນ​ພວກ​ເຂົາ​ຈະ​ບໍ່​ມີ​ວັນ​ໂຕນ​ອອກ​ຈາກ​ຄຸກ​ໄດ້. ອິນ​ໂດ​ເນ​ເຊຍ​ເອົາ​ມາດ​ຕະການ​ເດັດຂາດ​ເລື່ອງ​ຢາ​ເສບ​ຕິດ. ສຳລັບ​ຜູ້​ທີ່​ເສບ​ຢາ​ເສບ​ຕິດ​ເຊິ່ງມີ​ເກືອບ 5 ລ້ານ​ຄົນ​ໃນ​ທົ່ວ​ປະ​ເທດ​ນັ້ນ (ສະຖິຕິ​ປີ 2013) ທາງ​ການ​ອິນ​ໂດ​ເນ​ເຊຍ​ຈັດ​ສົ່ງ​ເຂົ້າສູນ​ປິ່ນປົວ​ຟັກ​ຟື້ນ​ ​ແຕ່​ຕ້ອງ​ມີ​ໃບຢັ້ງຢືນ​ຢ່າງ​ເປັນ​ທາງ​ການ​ຈາກ​ພາກສ່ວນ​ກ່ຽວຂ້ອງ​ວ່າ​ພວກ​ເສບ​ຕິດ​ເຫລົ່າ​ນີ້​ຕ້ອງການ​ການ​ປິ່ນປົວ​ແທ້. ລະບຽບ​ການ​ສົ່ງ​ຜູ້​ເສບຕິດ​ເຂົ້າສູນ​ປິ່ນປົວ​ນີ້​ໄດ້​ຖືກ​ຮັບຮອງ​ເອົາ​ຢ່າງ​ເປັນ​ທາງ​ການ​ໃນ​ປີ 2014, ກ່ອນ​ໜ້ານັ້ນ ການ​ປະຕິບັດ​ຕໍ່​ຜູ້​ທີ່​ພົວພັນ​ກັບ​ຢາ​ເສບ​ຕິດ​ຍັງ​ບໍ່​ມີ​ການຈຳ​ແນ​ກຢ່າງ​ຈະ​ແຈ້ງ ບໍ່​ວ່າ​ຈະ​ເປັນ​ຜູ້​ຄ້າຂາຍ ຫລື ຜູ້​ເສບ. ດັ່ງນັ້ນ ຈຶ່ງ​ພາ​ໃຫ້​ຄວາມ​ສັບສົນ ​ແລະ ​ແກ້​ບັນຫາ​ບໍ່​ຖືກ​ເປົ້າ. ສ່ວນ​ຢູ່​ສະຫະພັນຣັດ​ເຊຍ, ປະ​ທາ​ນາ​ທິບໍດີ ວະ​ລາ​ດິ​ເມຍ ປູ​ຕິນ ​ໄດ້​ປະກາດ​ແຕ່​ຕົ້ນ​ເດືອນ​ຕຸລາ 2016 ພຸ້ນ​ວ່າ: ຈະ​​ເຮັດ​ໃຫ້​ຂະ​ແໜງ​ການ​ກິລາ​ປອດ​ຈາກ​ການ​ໃຊ້​ສານ​ເສບ​ຕິດ (ສານ​ກະ​ຕຸ້ນ) ດ້ວຍ​ການ​ປະຕິ​ຮູບ​ໃຫ້​ເຖິງ​ກົກ​ເຖິງ​ຮາກ. ​ໃ​ນການ​ປະຕິ​ຮູບ​ດັ່ງກ່າວ, ທາງ​ການຣັດ​ເຊຍ​ຈະ​ນຳ​ໃຊ້​ລະບົບ​ໃໝ່​ໃນ​ການ​ຄຸ້ມ​ຄອງ​ວຽກ​ງານ​ກິລາ ​ແລະ ຈະ​ປະສານ​ງານ​ຢ່າງ​ໃກ້ຊິດ​ກັບ​ຄະນະ​ກຳມະການ​ໂອ​ແລມປິກ​ສາກົນ. ນອກຈາກ​ນັ້ນ, ທ່ານ ປູ​ຕິ​ນ ຍັງ​ໄດ້​ມອບ​ຄວາມ​ຮັບຜິດຊອບ​ວຽກ​ຄຸ້ມ​ຄອງ​ກິລາ, ການທ່ອງທ່ຽວ ​ແລະ ຊາວ​ໜຸ່ມ​ໃຫ້​ຮອງ​ນາຍົກລັດຖະມົນຕີທ່ານໜຶ່ງ. ​ໃນ​ເດືອນ​ກໍລະກົດ ປີ 2016, ຣັດ​ເຊຍ​ຖືກ​ກ່າວ​ຫາ​ວ່າ​ມີ​ລະບົບ​ນຳ​ໃຊ້​ສານ​ກະ​ຕຸ້ນ​ໃນ​ວົງ​ການ​ກິລາ ອັນ​ເປັນ​ເຫດ​ໃຫ້​ນັກ​ກິລາຣັດ​ເຊຍ​ຈຳນວນ​ຫລາຍ​ຄົນ​ຖືກ​ຫ້າມ​ເຂົ້າຮ່ວມ​ມະຫະກຳ​ກິລາ​ໂອ​ແລມປິກ​ທີ່​ບຣາຊິນ​ໃນ​ປີນັ້ນ. ສຳລັບ​ຢູ່​ຟີ​ລິບ​ປິນ, ຂ່າວ​ໃນຕົ້ນ​ເດືອນ​ມິຖຸນາ ປີ 2016 ບອກ​ວ່າ: ທ່ານ​ປະທານາທິບໍດີ ດູ​ເຕັກ​ເຕ ​ໄດ້​ກຳນົດ​ແຜນ​ສຶກສາ​ອົບຮົມ​ຊາວ​ໜຸ່ມ​ໃຫ້​ຫ່າງ​ໄກ​ຢາ​ເສບ​ຕິດ ​ແລະ ທັງ​ໃຫ້​ສາມາດ​ຈຳ​ແນ​ກ​ໄດ້​ຜູ້​ຄ້າ​ຢາ​ເສບ​ຕິດ ​ເພື່ອ​ບໍ່​ໃຫ້​ຕົນ​ຕົກ​ເປ​ັນ​ເຫຍື່ອ​ຂອງ​ຄົນ​ບໍ່​ດີ​ເຫລົ່າ​ນີ້. ຕາມ​ແຜນການ​ສຶກສາ​ອົບຮົມ​ດັ່ງກ່າວ, ​ເດັກ​ອາຍຸ​ແຕ່ 10 ປີ (ຫ້ອງ ປ.4) ຈະ​ຕ້ອງ​ໄດ້​ຮຽນ​ຮູ້​ກ່ຽວ​ກັບ​ຢາ​ເສບ​ຕິດ ​ເຊິ່ງຈະ​ແຍກ​ອອກ​ເປັນ​ວິຊາ​ຮຽນ​ຕ່າງຫາກ. ​ໃນ​ໄລຍະ​ຜ່ານ​ມາ ​ເຖິງ​ວ່າ​ມີ​ວິຊາ​ກ່ຽວ​ກັບ​ຢາ​ເສບ​ຕິດ​ນັບ​ແຕ່​ຫ້ອງ ປ.4 ກໍ​ຕາມ, ​ແຕ່​ຍັງ​ເປັນ​ການ​ສິດສອນ​ແບບ​ລວມໆ, ຂາດ​ເນື້ອ​ໃນ​ທີ່​ຈະ​ນຳ​ໄປ​ປະຕິບັດ​ຕົວ​ຈິງ ​ເພື່ອ​ໃຫ້​ນັກຮຽນ​ສາມາດ​ປ້ອງ​ກັນ​ຕົວ ບໍ່​ໃຫ້​ຕົກ​ເປັນ​ເຫຍື່ອ​ການ​ຫລອກ​ລວງ​ຈາກ​ພວກ​ຄ້າ​ຢາ​ເສບ​ຕິດ.

- Tiger Head 728x90 - ບົດຮຽນໃນສະໜາມຮົບຕ້ານຢາເສບຕິດ
- 1 1 - ບົດຮຽນໃນສະໜາມຮົບຕ້ານຢາເສບຕິດ

ໂດຍ: ວິ​ເສດ ສະ​ແຫວ​ງສຶກສາ

error: Content is protected !!