ການລະບາດຂອງພະຍາດ COVID-19 ສົ່ງຜົນກະທົບຕໍ່ການສົ່ງອອກຜະລິດຕະພັນຕັດຫຍິບຂອງລາວ
ປະທານສະມາຄົມອຸດສາຫະກຳຕັດຫຍິບລາວ ໃຫ້ຮູ້ວ່າ: ສະພາບການລະບາດຂອງພະຍາດ COVID-19 ໄດ້ເຮັດໃຫ້ຫຼາຍຂະແໜງການໄດ້ຮັບຜົນກະທົບຢ່າງໜັກ ໃນນີ້ຂະແໜງຕັດຫຍິບກໍເປັນຂະແໜງການໜຶ່ງທີ່ໄດ້ຮັບຜົນກະທົບເຊັ່ນດຽວກັນ ໂດຍສະເພາະການສົ່ງອອກສິນຄ້າໄປຍັງປະເທດຕ່າງ.
ທ່ານປະທານ ເວົ້າວ່າ: ນັບແຕ່ເດືອນເມສາຫາເດືອນມິຖຸນາ 2020 ນີ້ ຫຼາຍໂຮງງານຕັດຫຍິບໄດ້ຢຸດການຜະລິດຊົ່ວຄາວ, ສໍາລັບໂຮງງານທີ່ຈະໄດ້ສືບຕໍ່ຜະລິດຕ້ອງເປັນໂຮງງານທີ່ນອນໃນເງື່ອນໄຂທີ່ລັດຖະບານກຳນົດໄວ້ຄື: ໃນຕົ້ນເດືອນພຶດສະພາຜ່ານມານີ້ ໂຮງງານຈຳນວນໜຶ່ງໄດ້ຮັບອະນຸຍາດສືບຕໍ່ດຳເນີນການຜະລິດຂອງຕົນ ເພື່ອຜະລິດເຄື່ອງສົ່ງອອກຕາມການສັ່ງຈອງຂອງຕະຫຼາດການຄ້າ, ໃນເດືອນເມສາຫາກໍລະກົດ ພາຍຫຼັງຜະລິດຕາມການສັ່ງຈອງເກົ່າ (ເດືອນ 4-7) ໝົດໄປ ກໍໄດ້ຢຸດການຜະລິດຊົ່ວຄາວອີກ ເນື່ອງຈາກວ່າບໍ່ມີການສັ່ງຈອງໃໝ່ເຂົ້າມາ ຈົນມາຮອດເດືອນສິງຫານີ້ກໍຍັງບໍ່ໄດ້ຜະລິດຢ່າງເຕັມສ່ວນ ເນື່ອງຈາກຄວາມຕ້ອງການຂອງຕະຫຼາດຫຼຸດລົງ, ບາງໂຮງງານໄດ້ສືບຕໍ່ຢຸດການຜະລິດຊົ່ວຄາວ, ບາງໂຮງງານກໍຜະລິດພຽງແຕ່ 50-60% ປັດຈຸບັນ ຍັງລໍຖ້າການສັ່ງຈອງຈາກຕະຫຼາດຕ່າງປະ ເທດ ສ່ວນພາຍໃນປະເທດຍັງຢູ່ໃນຂັ້ນຕອນການເຈລະຈາ. ດັ່ງນັ້ນ ຈຶ່ງຮຽກຮ້ອງມາຍັງຕະຫຼາດພາຍໃນໃຫ້ຫັນມາຊົມໃຊ້ຜະລິດຕະພັນພາຍໃນ (ເຄື່ອງນຸ່ງຫົ່ມ) ໃຫ້ຫຼາຍຂຶ້ນ ເພື່ອຊ່ວຍໃຫ້ຂະແໜງການຕັດຫຍິບມີຕະຫຼາດຈຳໜ່າຍ ແລະ ຊ່ວຍໃຫ້ປະຊາຊົນລາວມີວຽກເຮັດງານທຳ ປັດຈຸບັນ ມີຫຼາຍກວ່າ 20 ໂຮງງານເລີ່ມຂໍເງິນອຸດໜູນວ່າງງານຕ່າງໆຈາກປະກັນສັງຄົມ.
ໄລຍະເດືອນເມສາຫາເດືອນມິຖຸນາ 2020 ແມ່ນບໍ່ສາມາດສ້າງລາຍຮັບຈາກການສົ່ງເຄື່ອງໄປຍັງຕະຫຼາດຕ່າງປະເທດໄດ້ ທຽບໃສ່ໄລຍະດຽວກັນຂອງປີຜ່ານມາ ສ້າງລາຍຮັບໄດ້ພຽງປະມານ 20-30 ລ້ານໂດລາສະຫະລັດ ປັດຈຸບັນ ຕະຫຼາດຕ່າງປະເທດແມ່ນຢຸດການສັ່ງຊື້ເຄື່ອງຈາກປະເທດລາວເປັນຈຳນວນຫລາຍ. ໃນຂະນະທີ່ ການຜະລິດສິນຄ້າຂອງບັນດາໂຮງງານຕັດຫຍິບລາວແມ່ນ 99% ສົ່ງອອກຕ່າງປະເທດ, ແຕ່ພາຍຫຼັງມີການລະບາດຂອງພະຍາດດັ່ງກ່າວ ໄດ້ສົ່ງຜົນກະທົບຮ້າຍແຮງຕໍ່ການຜະລິດຂອງໂຮງງານຄື: ບາງແຫ່ງຫຼຸດລົງຫຼາຍກວ່າ 50% ຂອງການສັ່ງຊື້ຈາກຕະຫຼາດຕ່າງປະເທດ.
