ສະພາຜູ້ແທນປະຊາຊົນສະຫະລັດລົງຄະແນນສຽງຜ່ານຮ່າງງົບປະມານລາຍຈ່າຍຊົ່ວຄາວ

ຂ່າວຈາກຕ່າງປະເທດເມື່ອວັນທີ 23 ກັນຍາ ໃຫ້ຮູ້ວ່າ: ສະພາຜູ້ແທນປະຊາຊົນສະຫະລັດມີມະຕິດ້ວຍຄະແນນສຽງ 359 ຕໍ່ 57 ສຽງຜ່ານຮ່າງກົດໝາຍງົບປະມານລາຍຈ່າຍຊົ່ວຄາວ ເພື່ອຫຼີກລ່ຽງການປິດໜ່ວຍງານຂອງລັດຖະບານສະຫະລັດ ຫຼື ພາວະ ຊັດດາວກ່ອນທີ່ງົບປະມານລາຍຈ່າຍປະຈຳປີຈະໝົດອາຍຸລົງໃນວັນທີ 30 ກັນຍານີ້. ໂດຍຮ່າງກົດໝາຍງົບປະມານຊົ່ວຄາວດັ່ງກ່າວຈະຖືກສົ່ງໃຫ້ວຸດທິສະພາສະຫະລັດພິຈາລະນາເປັນລຳດັບຕໍ່ໄປນັ້ນ ຈະເຮັດໃຫ້ໜ່ວຍງານຂອງລັດຖະບານກາງຂອງສະຫະລັດຍັງຄົງສາມາດເປີດດຳເນີນການ ແລະ ມີງົບປະມານໃຊ້ຈ່າຍໄປຈົນເຖິງວັນທີ 21 ທັນວາ ແລະ ຍັງຈະມີເວລາໃຫ້ສະພາ ຄອນເກຣດ ມີເວລາພຽງພໍທີ່ຈະຕັດສິນໃຈວ່າ ຄວນຈະຜ່ານກົດໝາຍງົບປະມານປະຈຳປີກ່ອນການເລືອກຕັ້ງປະທານາທິບໍດີສະຫະລັດໃນເດືອນພະຈິກທີ່ຈະມາເຖິງຫຼືບໍ່.