ນັກວິທະຍາສາດຍິງ 2 ຄົນຍາດໄດ້ລາງວັນ Nobelສາຂາ ເຄມີສາດ ປີ 2020
October 8, 2020 - 11:42 AM
ລາຍງານຂ່າວຕ່າງປະເທດໃຫ້ຮູ້ ເມື່ອວັນທີ 7 ຕຸລານີ້ວ່າ: ສະຖາບັນວິທະຍາສາດ ລາດຊະວົງຂອງສະວິເດັນ ໄດ້ອອກຂໍ້ຕົກລົງມອບລາງວັນ Nobel ສາຂາ ເຄມີສາດ ປີ 2020 ໃຫ້ແກ່ ນັກວິທະຍາສາດຍິງ 2 ຄົນ.
ນັກວິທະຍາສາດຍິງ 2 ຄົນດັ່ງກ່າວ ໄດ້ຄົ້ນພົບCRISPR/Cas9, ຊຶ່ງເປັນເຕັກນິກທີ່ກ້າວໜ້າໃນຊີວະວິທະຍາໂມເລກຸນ, ຊຶ່ງຖືໄດ້ວ່າເປັນການຄົ້ນພົບທີ່ເປັນບາດລ້ຽວປະຫວັດສາດທີ່ສຳຄັນໃນ DNA. CRISPR/Cas9 ປຽບສະເໝືອນກັບມີດຕັດ ທີ່ຕັດຕໍ່ຂອງ ໂມເລກຸນ, ອາດຈະຕັດ ຢີນທີ່ບໍ່ຕ້ອງການອອກໄປ ແລະ ຕັດຕໍ່ DNA ທີ່ແຂງແຮງເຂົ້າປ່ຽນແທນ.
CRISPR/Cas9ໄດ້ນຳເອົາຜົນປະໂຫຍດອັນໃຫ່ຍຫຼວງທາງດ້ານວິທະຍາສາດພັນທຸກຳໃນການຕັດຕໍ່ແນວພັນພືດ, ພັນສັດ, ປະກອບສ່ວນເຂົ້າໃນການປິ່ນປົວມະເຮັງ, ພະຍາດທາງກຳມະພັນ ແລະ ພະຍາດອື່ນໆ ໄດ້ເປັນຢ່າງດີ.
