ໂຄວິດຍັງບໍ່ເຊົາ ອິນເດຍພົບພະຍາດປິດສະໜາ ມີຜູ້ຕິດເຊື້ອເຖິງ 400 ຄົນ
ເຊົາໄຊນ່າມໍນິ້ງໂພສ ລາຍງານວ່າ: ຊາວອິນເດຍຫລາຍຮ້ອຍຄົນໃນລັດ Andhra Pradesh ທາງຕອນໃຕ້ຂອງອິນເດຍບໍ່ສະບາຍປິດສະໜາໃນທ້າຍອາທິດຜ່ານມາ ເຊິ່ງປັດຈຸບັນຍັງບໍ່ສາມາດລະບຸໄດ້ວ່າສາເຫດເກີດຈາກຫຍັງ.
ໂດຍຊາວອິນເດຍ 400 ກວ່າຄົນກຳລັງປິ່ນປົວຢູ່ໂຮງໝໍໃນລັດດັ່ງກ່າວ, ຫລາຍຄົນມີອາການຊັກ, ປຸ້ນທ້ອງ ແລະ ໝົດສະຕິ ເຊິ່ງມີຜູ້ເສຍຊີວິດແລ້ວຢ່າງໜ້ອຍ 1 ຄົນຈາກການຕິດເຊື້ອປິດສະໜາ.
ທ່ານ ກີຕາ ປຣາຊາດິນີ ຜູ້ອຳນວຍການດ້ານສາທາລະນະສຸກ ໃນລັດ Andhra Pradesh ເປີດເຜີຍວ່າ: ຜູ້ເສຍຊີວິດຄົນດັ່ງກ່າວເປັນຜູ້ຊາຍອາຍຸ 45 ປີ ແລະ ໄດ້ມີການນຳເອົາຕົວຢ່າງເລືອດຂອງຜູ້ຕິດເຊື້ອໄປກວດສອບ ເພື່ອຫາສາເຫດຂອງພະຍາດຕໍ່ໄປ.
ທາງການລັດ Andhra Pradesh ຖະແຫລງໃນວັນທີ 7 ທັນວາວ່າ: ຍັງບໍ່ຮູ້ສາເຫດຂອງການລະບາດ ແລະ ຄົນທຸກກຸ່ມອາຍຸມີທ່າອ່ຽງຈະຕິດເຊື້ອດັ່ງກ່າວ.
ລວມທັງກະຊວງສາທາລະນະສຸກຂອງອິນເດຍເປີດເຜີຍວ່າ: ຈະສົ່ງທີມຜູ້ຊ່ຽວຊານທາງການແພດ 3 ຄົນ ເພື່ອກວດສອບການລະບາດຂອງພະຍາດ.
ໂດຍປັດຈຸບັນ ເຈົ້າໜ້າທີ່ກຳລັງກວດສອບແຫລ່ງນ້ຳ 20 ແຫ່ງຢູ່ເມືອງ Eluru ເຊິ່ງມີລາຍງານການລະບາດຄັ້ງທຳອິດ ລວມທັງເຂດໃກ້ຄຽງ.
ນອກຈາກນີ້, ລັດ Andhra Pradesh ຍັງເປັນໜຶ່ງໃນລັດທີ່ໄດ້ຮັບຜົນກະທົບຈາກໂຄວິດ-19 ຫລາຍທີ່ສຸດຢູ່ອິນເດຍ ເຊິ່ງປັດຈຸບັນມີຜູ້ຕິດເຊື້ອໄວຣັສໂຄໂຣນາແລ້ວ 800.000 ກວ່າຄົນໃນລັດດັ່ງກ່າວ.
