ຈົບ ມ.ປາຍ ແລ້ວກຽມເສັງເຂົ້າມະຫາ

- 19368987 825419834283494 387998661 o - ຈົບ ມ.ປາຍ ແລ້ວກຽມເສັງເຂົ້າມະຫາ
- AGL banner - ຈົບ ມ.ປາຍ ແລ້ວກຽມເສັງເຂົ້າມະຫາ

ໂດຍ: ກ້ອງສ່ອງ ອິດສະຫລະ

ມາ​ຮອດ​ປັດຈຸບັນ, ​ເຫັນ​ວ່າການ​ສອບ​ເສັງ​ຈົບ ​ມ.ປາຍ (ມ.7) ​ໄດ້​ສໍາ​ເລັດ​ເສັດສິ້ນ​ໄປ​ດ້ວຍ​ຜົນ​ສໍາ​ເລັດ​ອັນ​ຈົບງາມ ແລະ ​ເມື່ອວັນ​ທີ 26 ມິຖຸນາຜ່ານ​ມານີ້​, ທາງ​ມະຫາວິທະຍາ​ໄລ​ແຫ່ງ​ຊາດ ​ກໍ​ໄດ້​​ເປີດ​ຂາຍ​ແບບ​ຟອມ​ເອກະສານ ​ເພື່ອ​ເສັງ​ເຂົ້າ​ມະຫາວິທະຍາ​ໄລດັ່ງ ກ່າວ, ສ່ວນຢູ່​ຕ່າງ​ແຂວງ​ນັ້ນ ກໍ​ຍັງ​ບໍ່​ທັນ​ເຫັນແຫລ່ງຂ່າວວ່າ​ໄດ້​ເປີດ​ຂາຍ​ພ້ອມ​ກັນ ຫລື ​ບໍ່?, ແຕ່​ກໍ​ຄິດ​ວ່າ​ອາດຈະ​ເປັນ​ເອກະ​ພາບ​ກັນໃນ​ທົ່ວ​ປະ​ເທດ. ຕາມ​ເຮົາ​ວ່າ ສິ່ງ​ທີ່​ສະ​ແດງ​ໃຫ້​ເຫັນ​ຢ່າງ​ມີ​ໝາກ​ມີ​ຜົນ ​​ແລະ ດີ​ເດັ່ນໃນຂົງ​ເຂດ​ວຽກ​ງານສຶ​ກສາ​ໃນສົກຮຽນ​ປີ​ນີ້​ຖື​ວ່າຂໍ້​ສອບ​ບໍ່​ໄດ້​ຮົ່ວ​ໄຫລ​ຄື​ດັ່ງ​ປີ​ຜ່ານມາ, ສ່ວນເລື່ອງ​ຜົນ​ການ​ສອບ​ເສັງ​ມີໃຜ​ໄດ້​ໃຜ​ຕົກ​ນັ້ນກໍ​ຍັງ​ບໍ່​ທັນ​​ຮູ້​ລາຍ​ລະອຽດກໍ​ຂໍ​ໃຫ້​ພວກ​ເຮົາ​ພ້ອມ​ກັນ​ຕິດຕາມ​ໃນ​ຂັ້ນ​ຕໍ່​ໄປ. ແຕ່​ກ່ອນຈະ​ຮອດ​ມື້​ສອບ​ເສັງ​ທຸກໆ​ສູນ​ບໍ່​ວ່າ​ຂັ້ນເມືອງ​, ຂັ້ນ​ແຂວງ ​ກໍ​​ຄື​ຂັ້ນ​ສູນ​ກາງ​ ໃຜ​ກໍໃຫ້​ຄໍາ​ໝັ້ນສັນຍາ​ວ່າ​ຈະ​​ໃຫ້​ໄດ້ລະດັບ 90-95% ຂຶ້ນ​ໄປ ວ່າ​ຊັ້ນ !.

ຕາມ​ຜູ້​ຂຽນ​ວ່າ, ພາຍຫລັງບັ້ນ​ສອບ​ເສັງ​ຈົບ​ຂັ້ນ ມ.ປາຍ ​ໄດ້ສິ້ນ​ສຸດ​ລົງ​ແລ້ວ​ ໂດຍ​ສະ​ເພາະ​ແມ່ນ​ໄລຍະພັກສິ້ນ​ປີຮຽນ​ຂອງ​ສົກ​ສຶກສາ 2016-2017 ນີ້, ວຽກ​ສືບ​ຕໍ່​ຂອງລູກ​ຫລານ​ນັກຮຽນ-ນັກ​ສຶກສາທຸກ​ຄົນ​ກໍ​ອາດ​ຈະ​ມີຫລາຍ​ອັນຫລາຍ​ຢ່າງ ​​ແລະ ຫລາຍ​ກິດຈະ​ກໍາ​ທີ່​ຕ້ອງ​ໄດ້​ເຮັດ​ເຊັ່ນ​ວ່າ: ຜູ້​ຢູ່​ຊົນນະບົດ​ກໍຕ້ອງ​ໄດ້​ເຮັດ​ໄຮ່​, ເຮັດ​ນາ, ​ເຮັດ​ສວນ​ຊ່ວຍ​ພໍ່​ແມ່. ສ່ວນ​ຜູ້​ຢູ່​ຕົວ​ເມືອງ​ກໍ​ຕ້ອງ​ໄດ້​ເຮັດ​ວຽກ​ເຮືອນ​ການ​ຊານ​ໄປຄຽງ​ຄູ່​ກັບ​ການ​ສືບ​ຕໍ່​ຄົ້ນ​ຄວ້າ​ບົດຮຽນ ​ເພື່ອ​ກຽມ​ສອບ​ເສັງ​ເຂົ້າ​ຕໍ່ມະຫາວິທະຍາ​ໄລ​ແຫ່ງ​ຊາດ ​ແລະ ​ຕາມ​ສະ​ຖາ​ບັນ​ການ​ສຶກສາແຫ່ງ​ຕ່າງໆ. ສະ​ເພາະ​ຢູ່​ນະຄອນຫລວງ​ວຽງຈັນ ໂດຍສະເພາະ​ມະຫາວິທະຍາ​ໄລ​ແຫ່ງ​ຊາດ​​ເພິ່ນ​ໄດ້​ກໍານົດ​ເອົາວັນ ທີ 25 ​​ກໍລະກົດນີ້ ເປັນມື້​ສອບ​ເສັງ​ໃນ​ກຸ່ມ A, B, ​ແລະ C. ໝາຍວ່າ​​ໃນ​ບັນດາວິຊາ​ທີ່​ຈະ​ໄດ້ເສັງກ່ອນໝູ່​ນັ້ນກໍ​ມີ: ຄະນິດສາດ, ພາສາ ລາວ, ວັນນະຄະດີ, ຟີ​ຊິກ​ສາດ, ​ເຄມີ​ສາດ, ຊີວະ​ສາດ, ພູມ​ສາດ ​ແລະ ປະຫວັດສາດ. ນອກຈາກ​ວິຊາ​ທີ່​ໄດ້​ກ່າວ​ມາ​ນີ້​ແລ້ວ, ຕາມ​ເຮົາ​ວ່າກໍ​ຈະ​ໄດ້​ສືບ​ຕໍ່​ສອບ​ເສັງ​ເປັນ​ໄລຍະໆ​ໄປ​ຈົນ​ໝົດ​ທຸກ​ວິຊາ​ທີ່​ນອນ​ຢູ່​ໃນ​ຫລັກສູດ​ຮຽນ​ຂອງ​ລະບົບມະຫາ​ວິທະຍາ​ໄລ​ ແລະ ​ວິທະຍາ​ໄລ. ນີ້​ລະ​ຄື​ພາລະກິດ​ອັນ​ໃຫຍ່​ຫລວງ​ຂອງ​ພວກ​ລູກຫລານ​ ກໍ​ຄື​ໃນ​ຂົງ​ເຂດ​ວຽກ​ງານສຶກສາໃນ​ໂອກາດ​ພັກສິ້ນ​ປີຮຽນ ​ກໍ​ຄື​ໃນ​ໄລຍະ​ກະກຽມ​ສອບເສັງ​ເຂົ້າ​ມະຫາວິທະຍາ​ໄລທີ່​ຈະ​ມາ​ເຖິງ​ນີ້. ຕາມ​​ເຮົາ​ວ່າ​ ໃນ​ການ​ກະກຽມ​ບັ້ນສອບ​ເສັງ​ເຂົ້າ​ມະຫາວິທະຍາ​ໄລນີ້​ມັນ​ກໍ ປຽບ​ເໝືອນ​ສະໜາມຮົບ​ອັນ​ໜຶ່ງ​ສໍາລັບ​ລູກຫລານ​ຜູ້​ທີ່​ມັກ​ສະ​ແຫວ​ງຫາ​ຄວາມ​ກ້າວໜ້າ​ໃຫ້​ຕົນ​ເອງ​. ດັ່ງ​ຜູ້​ນໍາ​ເພິ່ນ​ເຄີຍ​ເວົ້າ ​ແລະ​ ເຄີຍ​ສັ່ງສອນ​ພວກ​ເຮົາ​ວ່າ: “ຮຽນ​ແລ້ວຮຽນ​ອີກ​ຮຽນ​ເລື້ອຍ​ໄປ”.

- Wave100S AD to Website 2020 0 - ຈົບ ມ.ປາຍ ແລ້ວກຽມເສັງເຂົ້າມະຫາ

​ເຖິງ​ຢ່າງ​ໃດ​ກໍ​ດີ, ຕາມ​ເຮົາ​ວ່າ ​ສ່ວນ​ທີ່​ເຫລືອ​ຈາກ​ແຜນ​ຮັບ​​​ເຂົ້າ​ຮຽນ​ມະຫາວິທະຍາ​ໄລ​ແຫ່ງ​ຊາດ ກໍ​ຈະໄດ້ໄປ​ເສັງ​ເຂົ້າ​ຮຽນ​ໃນ​ບັນດາໂຮງຮຽນ​ວິທະຍາ​ໄລ ຫລື ​ສະ​ຖາ​ບັນ​ການ​ສຶກສາຕ່າງໆ​ຂອງ​ລັດ ​​ແລະ ​ເອກະຊົນ ຫລື ອາດ​ຈະ​ເສັງເຂົ້າ​ຮຽນ​ໃນໂຮງຮຽນອາຊີວະ​ສຶກສາ​ ກໍ​ສຸດ​ແລ້ວ​ແຕ່​ເງື່ອນ​ໄຂ​ຂອງ​ເສ​ດຖະກິດ​ ແລະ​ ຄວາມ​ມັກ​ຮັກ​ຂອງ​ໃຜລາວ. ຕາມ​ເຮົາຄິດ​ທາງ​ທີ່​ດີ​ເພື່ອໃຫ້ອີ່ມ​ປາກ​ອີ່ມ​ທ້ອງ ​ແລະ ຈະ​ພາ​ໃຫ້​ມີ​ວິຊາ​ສະ​ເພາະຫາ​ກິນ​ຕິດ​ຕົວ​ນັ້ນຄວນ​ໄປ​ສະໝັກ​ເຂົ້າ​ຮຽນ​ໃນ​ໂຮງຮຽນ​ວິຊາ​ຊີບ​ຕ່າງໆເຊັ່ນ: ​ປຸງ​ແຕ່ງອາ ຫານ, ​ສ້ອມ​ແປງ​ລົດ, ​ກົນ​ຈັກ, ​ໄຟຟ້າ, ​ກໍ່ສ້າງ, ການ​ກະ​ເສດ​ປູກຝັງ​-ລ້ຽງສັດ ​ແລະ ​ຂະ​ແໜງ​ວິຊາ​ຊີບ​ອື່ນໆ. ​ໃນ​ບັນດາ​ຂະແໜງ​ທີ່​ວ່າ​ມາ​ນີ້​ເວລາ​ຮຽນ​ຈົບ​ມາ​ກໍ​ສາມາດ​ມີ​ວຽກ​ເຮັດງານ​ທໍາ​ໂລດ​ ຫລື ​ຫາກ​ຜູ້​ໃດ​ມີ​ທຶນ​ມີ​ຮອນ​ແດ່​ກໍ​ສາມາດ​​ໄຕ່​ເຕົ້າເປີດ​ທຸລະ​ກິດ​ຂະໜາດ​ນ້ອຍ​ຂອງ​ຕົນ​ເອງນັ້ນ​ຈະ​ເປັນ​ການ​ດີ​ຢ່າງ​ຍິ່ງ.

- lattana 1 - ຈົບ ມ.ປາຍ ແລ້ວກຽມເສັງເຂົ້າມະຫາ
error: Alert: Content is protected !!