ບຣາຊິລເລັ່ງເລີ່ມສັກວັກຊີນໂຄວິດ-19 ກ່ອນທ້າຍເດືອນມັງກອນ
ວັນທີ 9 ທັນວານີ້, ລັດຖະບານບຣາຊິລປະກາດແຜນເລີ່ມນຳໃຊ້ວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຂອງ Pfizer ພາຍໃນເດືອນທັນວາປີນີ້ ຫລື ມັງກອນປີໜ້າ ຕາມການອະນຸມັດຈາກໜ່ວຍງານສາທາລະນະສຸກຂອງປະເທດ.
ທ່ານ ເອດົວໂດ ປາຊູເອລໂລ ລັດຖະມົນຕີກະຊວງສາທາລະນະສຸກ ໃຫ້ສຳພາດຕໍ່ CNN ວ່າ: ການສັກວັກຊີນອາດເກີດຂຶ້ນພາຍໃນເດືອນທັນວາ ຫລື ມັງກອນນີ້ ຖ້າໜ່ວຍງານສາທາລະນະສຸກແຫ່ງຊາດ Anvisa ອະນຸມັດການນຳໃຊ້ສຸກເສີນຕໍ່ວັກຊີນຂອງ Pfizer.
ຂະນະທີ່ວັກຊີນປ້ອງກັນໂຄວິດ-19 ຂອງ Pfizer ເລີ່ມການນຳໃຊ້ຢູ່ອັງກິດເມື່ອວັນທີ 8 ທັນວາ, ລັດຖະບານບຣາຊິລໄດ້ເປີດເຜີຍຂໍ້ຕົກລົງທີ່ເຊັນກັບ Pfizer ເພື່ອຈັດຊື້ວັກຊີນ 70 ລ້ານໂດສ ລວມທັງການຈັດຊື້ວັກຊີນຈາກ AstraZeneca ອີກ 100 ລ້ານໂດສ.
ບຣາຊິລມີຜູ້ຕິດເຊື້ອໂຄວິດ-19 ເສຍຊີວິດສູງສຸດເປັນອັນດັບ 2 ຂອງໂລກ ຮອງຈາກອາເມລິກາ ແລະ ຜູ້ຕິດເຊື້ອສະສົມສູງສຸດເປັນອັນດັບ 3 ຂອງໂລກ ຮອງຈາກອາເມລິກາ ແລະ ອິນເດຍ.
ກະຊວງດັ່ງກ່າວເປີດເຜີຍວ່າ: ໃນວັນທີ 9 ທັນວາ, ບຣາຊິລກວດພົບຜູ້ຕິດເຊື້ອໃໝ່ 53.453 ຄົນ ເຮັດໃຫ້ຈຳນວນຜູ້ຕິດເຊື້ອສະສົມທົ່ວປະເທດມີ 6.728.452 ຄົນ ແລະ ຜູ້ເສຍຊີວິດເພີ່ມເປັນ 836 ຄົນ ໃນໄລຍະ 24 ຊົ່ວໂມງ ເຮັດໃຫ້ຈຳນວນຜູ້ເສຍຊີວິດສະສົມມີ 178.995 ຄົນ.
