ກອງປະຊຸມໃຫຍ່ອົງຄະນະພັກກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຄັ້ງທີ V ໄດ້ຮັບຮອງເອົາຄະນະພັກຊຸດໃໝ່ 23 ສະຫາຍ
ກອງປະຊຸມໃຫຍ່ອົງຄະນະພັກກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຄັ້ງທີ V ໄດ້ປິດລົງຢ່າງເປັນທາງການໃນວັນທີ 10 ທັນວານີ້ ແລະ ໄດ້ຮັບຮອງເອົາບົດລາຍງານການເມືອງ ແລະ ບົດສຳຫລວດການນຳພາລວມຂອງຄະນະບໍລິຫານງານພັກກະຊວງຊຸດເກົ່າ, ແຜນການພັດທະນາວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ 5 ປີ (2021-2025), ພ້ອມທັງໄດ້ປ່ອນບັດເລືອກຕັ້ງເອົາຄະນະບໍລິຫານງານພັກກະຊວງຊຸດໃໝ່ 23 ສະຫາຍ, ຍິງ 6 ສະຫາຍຄື:
- ສະຫາຍ ສຈ. ປອ. ກິແກ້ວ ໄຂຄຳພິທູນ
- ສະຫາຍ ອຸ່ນທວງ ຂາວພັນ
- ສະຫາຍ ວັນສີ ກົວມົວ
- ສະຫາຍ ໂພສີ ແກ້ວມະນີວົງ
- ສະຫາຍ ນ. ແພງຈັນ ແພງເມືອງ
- ສະຫາຍ ປອ. ອາລຸນ ບຸນມີໄຊ
- ສະຫາຍ ວັນໄຊ ຕະວິນຍານ
- ສະຫາຍ ປອ. ນ. ບົວໄຂ ເພັງພະຈັນ
- ສະຫາຍ ນ. ຂັນທະລີ ພົນຢ້ຽມ
- ສະຫາຍ ນ. ບົວມະນີ ໄຊທິລາດ
- ສະຫາຍ ບົວໄລ ພານຸວົງ
- ສະຫາຍ ປອ. ວຽງພອນ ສຸກຄະວົງ
- ສະຫາຍ ຄຳເຜີຍ ພິລາພາ
- ສະຫາຍ ສົມສະຫວາດ ພົງສາ
- ສະຫາຍ ສຸວັນ ວິໄລແສງ
- ສະຫາຍ ພະຂັນໄຊ ສີຄັນໄຊ
- ສະຫາຍ ນ. ດາລານີ ພົມມະວົງສາ
- ສະຫາຍ ຄຳຫຼ້າ ຍອຍສາຍຄຳ
- ສະຫາຍ ປອ. ຄຳສຸກ ແກ້ວວົງຊາຍ
- ສະຫາຍ ປອ. ອຳຄາ ວົງໝື່ນກ້າ
- ສະຫາຍ ທອງຫຼ່ໍ ດວງສະຫວັນ
- ສະຫາຍ ນ. ວອນວິໄລ ລັດຖະຟ້າສະຫວ່າງ
- ສະຫາຍ ຄຳເພົ້າ ວັນນະວົງ
ກອງປະຊຸມຄັ້ງປະຖົມມະລຶກໄດ້ເລືອກເອົາຄະນະປະຈໍາ ພັກກະຊວງ ຖວທ ສະໄໝທີ V ຈໍານວນ 7 ສະຫາຍ ພ້ອມກັນນີ້, ໄດ້ເປັນເອກະສັນເລືອກເອົາ ສະຫາຍ ກິແກ້ວ ໄຂຄຳພິທູນ ເປັນເລຂາຄະນະບໍລິຫານງານພັກກະຊວງ ຖວທ, ສະຫາຍ ວັນສີ ກົວມົວ ເປັນຮອງເລຂາ ທັງເປັນປະທານກວດກາພັກ, ທ່ານ ນາງ ບົວມະນີ ໄຊທິລາດ ເປັນຮອງປະທານກວດກາ ແລະ ທ່ານ ຄູນສະຫວັດ ຊຸມມະນີວົງ ເປັນຄະນະກວດກາ.
ໂອກາດສໍາຄັນນີ້, ສະຫາຍ ນາງ ປານີ ຢາທໍ່ຕູ້ ຕາງໜ້າໃຫ້ກົມການເມືອງສູນກາງພັກ ໄດ້ສະແດງຄວາມຊົມເຊີຍຕໍ່ຜົນສຳເລັດ ແລະ ໝາກຜົນຂອງອົງຄະນະພັກກະຊວງ ຖວທ ທີ່ຍາດມາໄດ້ໃນ 5 ປີຜ່ານມາ, ພ້ອມທັງສະແດງຄວາມຊົມເຊີຍມາຍັງຄະນະບໍລິຫານງານຊຸດໃໝ່ທີ່ໄດ້ຮັບການເລືອກຕັ້ງໃນຄັ້ງນີ້ ເຊິ່ງສະແດງເຖິງຄວາມເຊື່ອໝັ້ນ ແລະ ຄວາມໄວ້ວາງໃຈຂອງຜູ້ແທນກອງປະຊຸມ ແລະ ເປັນການມອບໝາຍໜ້າທີ່ວຽກງານທີ່ສຳຄັນ ແລະ ມີກຽດ ເພື່ອສືບຕໍ່ນຳພາ-ຊີ້ນຳໃນການຈັດຕັ້ງປະຕິບັດວຽກງານ ຖວທ ໃນຕໍ່ໜ້າ. ພ້ອມນີ້, ສະຫາຍ ນາງ ປານີ ຢາທໍ່ຕູ້ ຍັງໄດ້ມີທິດຊີ້ນໍາຈໍານວນໜຶ່ງຕໍ່ກອງປະຊຸມ ໂດຍທ່ານໄດ້ເນັ້ນໃຫ້ຄະນະບໍລິຫານງານພັກກະຊວງຊຸດໃໝ່ສຸມໃສ່ສຶກສາອົບຮົມດ້ານການເມືອງແນວຄິດ ກໍາໃຫ້ໄດ້ສະພາບແນວຄິດຂອງສະມາຊິກພັກ, ພະນັກງານ ໂດຍການເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຢ່າງເລິກເຊິ່ງ, ແທດເຖິງ ແລະ ປົກກະຕິ ຕິດພັນກັບການຕິດຕາມກວດກາຢ່າງເປັນປະຈຳ; ປັບປຸງກົງຈັກການຈັດຕັ້ງໃຫ້ກະທັດຮັດ, ສັບຊ້ອນພະນັກງານເຂົ້າໃນຕໍາແໜ່ງານໃຫ້ຖືກເປົ້າໝາຍ, ແທດເໝາະກັບໜ້າທີ່ວຽກງານຕົວຈິງ, ສ້າງພະນັກງານບຸກຄາລາກອນໃຫ້ເປັນວິຊາການທີ່ເຂັ້ມແຂງ, ຕ້ານປະກົດການສ້າງກຸ່ມກ້ອນ, ຈຸ້ມເຈື້ອເຊື້ອສາຍທີ່ຂັດກັບແນວທາງ, ນະໂຍບາຍ ແລະ ລະບຽບກກົດໝາຍ ຕິດພັນກັບການປະຕິບັດນະໂຍບາຍຕໍ່ກັບພະນັກງານ-ລັດຖະກອນຢ່າງເໝາະສົມ; ສ້າງ ແລະ ພັດທະນາວຽກງານຖະແຫລງຂ່າວ-ສື່ມວນຊົນໃຫ້ກ້າວສູ່ຄຸນນະພາບໃໝ່, ທັນສະໄໝ, ວ່ອງໄວ ເປັນກະບອກສຽງອັນແຫລມຄົມຂອງພັກ-ລັດທີ່ເຂັ້ມແຂງຂຶ້ນກວ່າເກົ່າ; ພ້ອມນີ້, ສະຫາຍ ຍັງໄດ້ເນັ້ນຕື່ມວ່າ: ຈົ່ງພ້ອມກັນສຸມໃສ່ປົກປັກຮັກສາ ແລະ ພັດທະນາວັດທະນະທໍາ ອະນຸລັກ, ສືບທອດ ແລະ ເສີມຂະຫຍາຍມູນເຊື້ອວັດທະນະທຳອັນດີງາມຂອງຊາດ ແລະ ພູມປັນຍາ ເພື່ອສົ່ງເສີມການຜະລິດ ແລະ ການບໍລິການໃຫ້ຫລາກຫລາຍ, ສ້າງມູນຄ່າເພີ່ມ ໂດຍການຫັນເປັນອຸດສາຫະກໍາວັດທະນະທໍາໃນໄລຍະໃໝ່ ສ້າງວຽກເຮັດງານທໍາໃຫ້ປະຊາຊົນບັນດາເຜົ່າ, ເດັດດ່ຽວຕ້ານສະກັດກັ້ນວັດທະນະທໍາທີ່ບໍ່ສອດຄ່ອງ; ເອົາໃຈໃສ່ຄຸ້ມຄອງ ແລະ ສົ່ງເສີມພັດທະນາການທ່ອງທ່ຽວທຳມະຊາດ, ທ່ອງທ່ຽວປະຫວັດສາດ, ທ່ອງທ່ຽວວັດທະນະທຳ ແລະ ທ່ອງທ່ຽວກະສິກຳໃຫ້ມີຄຸນນະພາບ, ຕາມທິດສີຂຽວ ແລະ ຍືນຍົງ, ເຊື່ອມໂຍງເຂົ້າກັບພາກພື້ນ ແລະ ສາກົນ ສ້າງເປັນແຫລ່ງລາຍຮັບທີ່ໝັ້ນຄົງໃຫ້ກັບປະເທດຊາດ ທັງທາງກົງ ແລະ ທາງອ້ອມ.
