ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ

ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ - 5fd7a7e743f8a - ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ
ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ - kitchen vibe - ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ

ອາ​ເມ​ລິ​ກາ​ເດີນ​ໜ້າ​ແຈກ​ຢາຍ​ວັກ​ຊີ​ນປ້ອງ​ກັນ​ພະຍາດ​ໂຄ​ວິດ-19 ​ໃຫ້​ຊາວ​ອາ​ເມ​ລິ​ກາ ​ໂດຍ​ພະຍາບານ​ປະຈຳ​ຫ້ອງ ICU ຂອງ​ໂຮງໝໍ​ໃນ​ນະຄອນ​ນິວຢອກ ​ເປັນ​ບຸກຄົນ​ທຳ​ອິດ​ໃນ​ປະ​ເທດ​ທີ່​ໄດ້​ຮັບ​ການ​ປ້ອງ​ກັນ.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ອາ​ເມ​ລິ​ກາ​ເລີ່​ມ​ໂຄງການ​ແຈກ​ຢາຍ​ວັກ​ຊີ​ນທີ່​ຄິດ​ຄົ້ນ​ໂດຍ​ບໍລິສັດ Pfizer ຮ່ວມ​ກັບ​ບໍລິສັດ BioNTech ຂອງ​ເຢຍລະ​ມັນ ​ໃນ​ວັນ​ທີ 14 ທັນວາ​ນີ້ ​ເພື່ອ​ປ້ອງ​ກັນ​ການ​ຕິດ​ເຊື້ອ ​ແລະ ບໍ່​ສະບາຍ​ຈາກ​ພະຍາດ​ໂຄ​ວິດ-19 ​ໃຫ້​ປະຊາຊົນ ​ໂດຍ​ວັກ​ຊີ​ນຊະນິດ​ນີ້​ໄດ້​ຮັບ​ການ​ອະນຸມັດ “​ເປັນ​ກໍລະນີ​ສຸກ​ເສີນ” ຈາກ​ຄະນະ​ກຳມະການ​ອາຫານ ​ແລະ ຢາ (FDA) ​ໃນ​ວັນ​ທີ 11 ທັນວາ​ຜ່ານ​ມາ ຫລັງ​ຜົນ​ການ​ສຶກສາ​ບົ່ງ​ບອກ “ປະສິດທິພາບ 95%” ​ໃນ​ການ​ປ້ອງ​ກັນ​ອາການ.

ທັງ​ນີ້, ລັດຖະບານ​ອາ​ເມ​ລິ​ກາ​ຢູ່​ນະຄອນຫລວງ​ວໍ​ຊິງ​ຕັນ​ໃຫ້​ສິດ​ແກ່​ລັດຖະບານ​ທ້ອງ​ຖິ່ນ​ຂອງ​ແຕ່​ລະ​ລັດ ​ໃນ​ການຈັດ​ລຳດັບ​ກຸ່ມ​ຜູ້​​ເຂົ້າຮັບ​ການ​ສັກ​ວັກ​ຊີ​ນ ​ແລະ ທຸກ​ລັດ​ພ້ອມ​ໃຈ​ກັນ​ໃຫ້​ບຸກຄະລາ​ກອນ​ການ​ແພດ​ເປັນ​ກຸ່ມ​ທຳ​ອິດ ​ໂດຍ​ນາງ ຊານ​ດຣາ ລິນ​ເຊ ພະຍາບານ​ປະຈຳ​ພະ​ແນ​ກ​ເບິ່ງ​ແຍງ​ຜູ້​ປ່ວຍ​ໜັກ ຂອງ​ສູນ​ການ​ແພດ​ຢິວ ລອງ ​ໄອສ​ແລນ ​ໃນ​ເຂດ​ຄວີນ ຂອງ​ນະຄອນ​ນິວຢອກ ​ໄດ້​ຮັບ​ການ​ບັນທຶກ​ວ່າ​ເປັນບຸກຄົນ​ທຳ​ອິດ​ຂອງ​ອາ​ເມ​ລິ​ກາ ທີ່​ເຂົ້າຮັບ​ການ​ສັກ​ວັກ​ຊີ​ນ ​ແລະ ຕໍ່​ຈາກ​ນັ້ນບໍ່​ເທົ່າ​ໃດ​ວິນາທີ ປະທານາທິບໍດີ ​ໂດ​ນັລ ທຣຳ ​ໂພດ​ຂໍ້ຄວາມ​ສະ​ແດງ​ຄວາມ​ຍິນ​ດີ​ນຳ​ນາງ ລິນ​ເຊ.

​ເຖິງ​ຢ່າງ​ໃດ​ກໍ​ຕາມ, ມື້ທຳ​ອິດ​ຂອງ​ການ​ແຈກ​ຢາຍ​ວັກ​ຊີ​ນປ້ອງ​ກັນ​ພະຍາດ​ໂຄ​ວິດ-19 ທີ່​ລັດຖະບານ​ອາ​ເມ​ລິ​ກາ​ອະນຸມັດ​ຢ່າງ​ເປັນ​ທາງ​ການ​ຊະນິດ​ທຳ​ອິດ ​ເກີດ​ຂຶ້ນ​ໃນ​ເວລາ​ດຽວ​ກັບ​ຢູ່​ມະຫາວິທະຍາ​ໄລ​ຈອນ ຮອບ​ກິນ ລາຍ​ງານ​ສະຖິຕິ​ພະຍາດ​ດັ່ງກ່າວ​ຢູ່​ອາ​ເມ​ລິ​ກາ​ ວ່າ​ຍັງ​ສູງ​ທີ່​ສຸດ​ໃນ​ໂລກ ທັງ​ຈຳນວນ​ຜູ້​ເສຍ​ຊີວິດ ​ແລະ ຜູ້​ຕິດ​ເຊື້ອສະ​ສົມ ​ໂດ​ຍສະຖິຕິ​ຜູ້​ເສຍ​ຊີວິດ​ມີ​ຢ່າງ​ໜ້ອຍ 300.567 ຄົນ ​ເມື່ອ​ເວລາ 15:26 ​ໂມງ ຕາມ​ເວລາ​ທ້ອງ​ຖິ່ນ​ຂອງ​ຕາ​ເວັນ​ອອກ ​ໃນ​ວັນ​ທີ 14 ທັນວາ (22:26 ​ໂມງ ຕາມ​ເວລາ​ປະ​ເທດ​ລາວ) ສ່ວນ​ສະຖິຕິ​ຜູ້​ຕິດ​ເຊື້ອສະ​ສົມ​ເພີ່ມ​ຂຶ້ນຢ່າງ​ຕໍ່​ເນື່ອງ​ເປັນ​ຫລາຍ​ກວ່າ 16,3 ລ້ານ​ຄົນ​ແລ້ວ.

ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ - 4 - ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ
ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ - 3 - ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ
ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ - 5 - ພະຍາບານນິວຢອກຮັບວັກຊີນໂຄວິດ ເປັນຄົນທຳອິດຢູ່ອາເມລິກາ