ທຣຳ ອຳລາຕຳແໜ່ງຜູ້ນຳອາເມລິກາ ອວຍພອນໃຫ້ ໄບເດນ “ໂຊກດີ”
ປະທານາທິບໍດີ ໂດນັລ ທຣຳ ກ່າວສູນທອນພົດສຸດທ້າຍໃນຖານະຜູ້ນຳອາເມລິກາວ່າ: ໄລຍະ 4 ປີຜ່ານມາ “ເຮັດໃນສິ່ງທີ່ຕ້ອງເຮັດ” ລວມທັງການເປັນຜູ້ນຳຄົນທຳອິດ “ທີ່ບໍ່ສ້າງສົງຄາມໃໝ່” ແລະ “ອະທິຖານ” ໃຫ້ລັດຖະບານຊຸດຕໍ່ໄປຂອງ ໂຈ ໄບເດນ “ໂຊກດີ”.
ສຳນັກຂ່າວຕ່າງປະເທດລາຍງານ ໃນວັນທີ 19 ມັງກອນວ່າ: ທຳນຽບຂາວເຜີຍແຜ່ວິດີໂອຄວາມຍາວເກືອບ 20 ນາທີ ເປັນການຖະແຫລງອຳລາຕຳແໜ່ງຜູ້ນຳອາເມລິກາຂອງປະທານາທິບໍດີ ໂດນັລ ທຣຳ ມີເນື້ອຫາຕອນໜຶ່ງວ່າ: ໃນອາທິດນີ້ ລັດຖະບານວໍຊິງຕັນຊຸດໃໝ່ຈະເຂົ້າຮັບຕຳແໜ່ງຢ່າງເປັນທາງການ, ທ່ານຂໍໃຫ້ຊາວອາເມລິກາ “ຮ່ວມກັນອະທິຖານ” ຂໍໃຫ້ອີກຝ່າຍ “ໂຊກດີ ແລະ ປະສົບຜົນສຳເລັດ” ໃນການປົກປ້ອງ ແລະ ຮັກສາຄວາມຮຸ່ງເຮືອງຂອງອາເມລິກາເອົາໄວ້ຕໍ່ໄປ.
ຂະນະດຽວກັນ, ທ່ານ ທຣຳ ກ່າວວ່າ: ອາເມລິກາບໍ່ແມ່ນປະເທດທີ່ “ຂີ້ຂາດຕາຂາວ” ສະພາບອັນຕະລາຍທີ່ສຸດໃນຕອນນີ້ ຄືການສູນເສຍຄວາມເຊື່ອໝັ້ນໃນຕົນເອງ ແລະ ຄວາມພາກພູມໃຈໃນຄວາມຍິ່ງໃຫຍ່ຂອງຄວາມເປັນຊາດ. ຜູ້ນຳອາເມລິກາ ກ່າວອີກວ່າ: ໄລຍະ 4 ປີຜ່ານມາ, ທ່ານກ້າວເຂົ້າສູ່ທຳນຽບຂາວ “ເພື່ອເຮັດໃນສິ່ງທີ່ຈຳເປັນຕ້ອງເຮັດ ແລະ ອີກຫລາຍຢ່າງ”. ທ່ານ ທຣຳ ກ່າວວ່າ: ທ່ານຕໍ່ສູ້ “ໃນສະໝໍລະພູມທີ່ທໍລະຫົດ” ຕໍ່ສູ້ກັບ “ການຕໍ່ສູ້ໜັກໜ່ວງທີ່ສຸດ” ແລະ “ການຕັດສິນໃຈຍາກລຳບາກທີ່ສຸດ”.
ທັງນີ້, ທ່ານ ທຣຳ ຂະຫຍາຍຄວາມເລື່ອງນີ້ ດ້ວຍການກ່າວເຖິງນະໂຍບາຍເສດຖະກິດ, ນະໂຍບາຍຕາເວັນອອກກາງ “ຈຸດຢືນອັນແຂງແຮງ” ຕໍ່ຈີນ ແລະ ຍົກຍ້ອງການທີ່ຕົນເອງຖືເປັນປະທານາທິບໍດີຄົນທຳອິດຂອງອາເມລິກາ “ທີ່ບໍ່ເຄີຍພາປະເທດເຂົ້າສູ່ສົງຄາມ” ໂດຍໃນໄລຍະທ້າຍຂອງວາລະ ທ່ານ ທຣຳ ສັ່ງໃຫ້ກະຊວງປ້ອງກັນປະເທດຫລຸດຈຳນວນທະຫານຢູ່ອີຣັກ, ອັບການິດສະຖານ ແລະ ໂຊມາເລຍ.
ສິ່ງໜຶ່ງທີ່ໜ້າສັງເກດວ່າ: ທ່ານ ທຣຳ ຍັງບໍ່ເອີ່ຍຊື່ຂອງທ່ານ ໂຈ ໄບເດນ ວ່າທີ່ຜູ້ນຳອາເມລິກາຄົນຕໍ່ໄປ ແລະ ບໍ່ກ່າວສະແດງຄວາມຍິນດີຕໍ່ອີກຝ່າຍ. ທ່ານ ທຣຳ ມີກຳນົດເດີນທາງອອກຈາກສະໜາມບິນ ໃນຖານທັບຮ່ວມແອນດຣູ ໃນລັດແມຣິແລນ ໃນເຊົ້າວັນທີ 20 ມັງກອນນີ້ ຕາມເວລາທ້ອງຖິ່ນ ເພື່ອມຸ່ງໜ້າສູ່ລັດຟໍຣິດາ ແລະ ມີລາຍງານວ່າ: ຮອງປະທານາທິບໍດີ ໄມ ເພນ ຈະບໍ່ໄປຮ່ວມສົ່ງຜູ້ນຳອາເມລິກາ “ດ້ວຍເຫດຜົນທາງເຕັກນິກ”, ແຕ່ຮອງຜູ້ນຳອາເມລິກາຈະເຂົ້າຮ່ວມພິທີສາບານຮັບຕຳແໜ່ງຂອງທ່ານ ໄບເດນ ແລ້ວຈຶ່ງເດີນທາງກັບເຮືອນຢູ່ລັດອິນດີແອນາ.
