ກະຊວງປ້ອງກັນປະທດສະຫະລັດອາເມລິກາ ຊ່ວຍອຳນວຍຄວາມສະດວກດ້ານການແພດໃຫ້ແຂວງສາລະວັນ

ພິທີເຊັນບົດບັນທຶກຄວາມເຂົ້າໃຈເພື່ອປະສານງານການບູລະນະກໍ່ສ້າງໂຮງໝໍ ເມືອງຄົງເຊໂດນ ແຂວງສາລະວັນ ໄດ້ມີຂຶ້ນໃນວັນທີ 26 ມັງກອນນີ້ ລະຫວ່າງ ກະຊວງປ້ອງກັນປະເທດສະຫະລັດ ອາເມລິກາ ແລະ ພະແນກສາທາລະນະສຸກ ແຂວງສາລະວັນ, ໂດຍການເຂົ້າຮ່ວມຂອງທ່ານເອກອັກຄະລັດຖະທູດສະຫະລັດ ອາເມລິກາ ປະຈຳ ລາວ ດຣ. ປີເຕີ ເຮມ໋ອນ ແລະ ທ່ານ ສົມໃຈ ອຸ່ນຈິດ ຮອງເຈົ້າແຂວງ ແຂວງສາລະວັນ ພ້ອມດ້ວຍ ຫົວໜ້າພະແນກສາທາລະນະສຸກ ແຂວງ.

ທ່ານທູດ ໄດ້ກ່າວວ່າ: “ໂຮງໝໍເມືອງຄົງເຊໂດນເປັນໂຄງການຊ່ວຍເຫລືອໜື່ງທີ່ສຳຄັນໃນຄວາມມຸ້ງໝາຍຂອງສະຫະລັດອາເມລິກາ ທີ່ມີຕໍ່ສຸຂະພາບ ແລະ ສະຫວັດດີການຂອງປະຊາຊົນລາວ ແລະ ຕໍ່ມິດຕະພາບ ລະຫວ່າງປະຊົນຊົນສອງຊາດ ສະຫະລັດອາເມລິກາ ແລະ ສປປ ລາວ. ຊຶ່ງໂຮງໝໍແຫ່ງນີ້ຈະສືບຕໍ່ສະໜອງການຊ່ວຍເຫລືອແກ່ປະຊາຊົນແຂວງສາລະວັນ ເປັນເວລາອີກຫລາຍໆປີຕໍ່ໄປ.”

ປີ 2021 ນີ້ເປັນສັນຍາລັກອັນສຳຄັນໃນການເປັນຄູ່ຮ່ວມມືແບບກວມລວມລະຫວ່າງ ສະຫະລັດອາເມລິກາ ແລະ ສປປ ລາວ ຄົບຮອບ 5 ປີ.  ວຽກງານນີ້ກໍ່ແມ່ນເປັນສ່ວນໜຶ່ງຂອງການຮ່ວມມືທີ່ສະຫະລັດອາເມລິກາ ໄດ້ໃຫ້ການຊ່ວຍເຫລືອ ສປປ ລາວ ເພື່ອເຮັດໃຫ້ບັນລຸໜື່ງໃນເປົ້າໝາຍການພັດທະນາແບບຍືນຍົງເຊິ່ງໃນນັ້ນແມ່ນລວມເອົາເປົ້າຫມາຍທີ 3 ເພື່ອສຸຂະພາບທີດີ ແລະ ຊີວິດການເປັນຢູ່ທີ່ດີ. ການບູລະນະໂຮງໝໍເມືອງຄົງເຊໂດນແຫ່ງນີ້ຈະຊ່ວຍປັບປຸງການເຂົ້າເຖິງການປິ່ນປົວສຸຂະພາບໃຫ້ແກ່ປະຊາຊົນເມືອງ ຄົງເຊໂດນ ແລະ ແຂວງສາລະວັນມີຄວາມສະດວກດີຂຶ້ນ.