ໂທລະພາບລາວສະຕາຣ໌ ກຽມຈົດທະບຽນເຂົ້າຕະຫລາດຫລັກຊັບລາວໃນມໍ່ໆນີ້

- advert banner 728 90 728x90 - ໂທລະພາບລາວສະຕາຣ໌ ກຽມຈົດທະບຽນເຂົ້າຕະຫລາດຫລັກຊັບລາວໃນມໍ່ໆນີ້

ວັນທີ 30 ຕຸລານີ້, ທ່ານ ສຸລະເພັດ ແກ້ວວຽງຄຳ ປະທານຜູ້ອຳນວຍ ການບໍລິສັດ ລາວສະຕາຣ໌ ໂຄອາຊ່ຽນ ໂຮນດິ້ງ ຈຳກັດຜູ້ດຽວ, ໃນນາມໂທລະພາບ ລາວສະຕາຣ໌ ໄດ້ຖະແຫລງຕໍ່ສື່ມວນຊົນລາວວ່າ: ບໍລິສັດຕົນ ໄດ້ແຕ່ງຕັ້ງໃຫ້ບໍລິສັດ ຫລັກຊັບເອພີເອັມລາວ ມາເປັນທີ່ປຶກສາການເງິນ ເພື່ອເຂົ້າມາຊ່ວຍວາງແຜນທຸລະກິດ ແລະ ຈັດຫາແຫລ່ງທຶນ ເພື່ອຂະຫຍາຍທຸລະກິດລວມທັງການຈັດໂຄງສ້າງທຸລະກິດ, ໂຄງສ້າງທາງການເງິນ ເພື່ອກຽມຄວາມພ້ອມເຂົ້າຈົດທະບຽນໃນຕະຫລາດຫລັກຊັບລາວມໍ່ໆນີ້, ຊຶ່ງການຈົດທະບຽນ ແລະ ລະດົມທຶນຜ່ານຕະຫລາດຫລັກຊັບລາວ, ໄດ້ກາຍເປັນອີກຊ່ອງທາງໜຶ່ງທີ່ຊ່ວຍໃຫ້ບໍລິສັດເຕີບໂຕຢ່າງມີສະຖຽນລະພາບ ແລະ ເປັນທີ່ຮູ້ຈັກ, ສ້າງຄວາມເຊື່ອຖືໃຫ້ແກ່ອົງກອນຫລາຍຂຶ້ນ.
ໃນໂອກາດນີ້, ທ່ານ ສົມພົບ ສັກພັນພະນົມ ອຳນວຍການໃຫຍ່ ບໍລິສັດ ຫລັກຊັບເອພີເອັມລາວ ກ່າວວ່າ: ພວກເຮົາເຫັນເຖິງສັກກາຍະພາບໃນການດຳເນີນທຸລະກິດແບບມືອາຊີບ, ແບບແຜນການເຮັດວຽກຂອງລາວສະຕາຣ໌, ມີວິໃສທັດທີ່ກວ້າງໄກ, ພັດທະນາຢ່າງຕໍ່ເນື່ອງ ແລະ ຍັງມີບຸກຄະລາກອນທີ່ມີຄວາມຊ່ຽວຊານ. ບໍລິສັດ ຫລັກຊັບເອພີເອັມລາວ ໃນຖານະເປັນທີ່ປຶກສາທາງການເງິນ ກໍຈະເຂົ້າມາຊ່ວຍໃນການວາງແຜນທຸລະກິດ, ຈັດໂຄງສ້າງບໍລິສັດ, ໂຄງສ້າງທາງການເງິນ, ພ້ອມແນະນຳຜູ້ກວດສອບບັນຊີພາຍນອກ ໃນການກວດສອບບັນຊີໃຫ້ຖືກຕ້ອງຕາມມາດຕະຖານບັນຊີ ໃນການກຽມຄວາມພ້ອມລະດົມທຶນໃນຕະຫລາດຫລັກຊັບລາວ ແລະ ຄາດວ່າຈະສາມາດຍື່ນຄຳຂໍອະນຸຍາດສະເໜີຂາຍຮຸ້ນ ເພີ່ມທຶນຕໍ່ມວນຊົນຄັ້ງທຳອິດຕໍສຳນັກງານຄະນກຳມະການຄຸ້ມຄອງຫລັກຊັບ (ຄຄຊ) ເພື່ອລະດົມທຶນໄດ້ພາຍໃນທ້າຍປີ 2018 ຫລື ຕົ້ນປີ 2019 ເພື່ອສ້າງໂອກາດໃນການຂະຫຍາຍທຸລະກິດຂອງບໍລິສັດໃນອະນາຄົດ.
ໂທລະພາບລາວສະຕາຣ໌ ມີໜ້າທີ່ເປັນກະບອກສຽງທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ ອອກສູ່ສັງຄົມລາວຢ່າງທົ່ວເຖິງ ແລະ ອອກສູ່ຕ່າງປະເທດໄດ້ຫລາຍປະເທດໃນທົ່ວໂລກ, ພ້ອມນີ້ ຍັງໄດ້ເຜີຍແຜ່ ແລະ ສົ່ງເສີມການອະນຸລັກຮັກສາວັດທະນະທຳທີ່ເປັນເອກະລັກ ແລະ ມູນເຊື້ອອັນດີງາມຂອງຊາດ ກໍຄືປະຊາຊົນລາວບັນດາເຜົ່າ ໃຫ້ດຳລົງຄົງຢູ່ຄຽງຄູ່ກັບຊາດລາວຕະຫລອດໄປ, ໂຄສະນາທ່າແຮງ ແລະ ຄວາມອາດສາມາດດ້ານການທ່ອງທ່ຽວຂອງລາວ ເພື່ອດຶງດູດຄວາມສົນໃຈໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ມາທ່ອງທ່ຽວລາວຫລາຍຂຶ້ນ, ໂທລະພາບລາວສະຕາຣ໌ ໄດ້ອອກອາກາດໃນລະບົບດິຈິຕອນ ຕັ້ງແຕ່ມີການສ້າງຕັ້ງ ແລະ ຍົກລະດັບໃຫ້ສົມບູນຂຶ້ນ, ໂດຍຜ່ານດາວທຽມໄທຄົມ 5 ດ້ວຍສັນຍານຄວາມຖີ່ລະບົບ C-Band ແລະ Ku-Band ແລະ ຮັບຊົມໄດ້ທົ່ວທຸກມູນໂລກໂດຍຜ່ານລະບົບ IPTV (Star4u.tv).

- lattana 1 - ໂທລະພາບລາວສະຕາຣ໌ ກຽມຈົດທະບຽນເຂົ້າຕະຫລາດຫລັກຊັບລາວໃນມໍ່ໆນີ້