ການຮ່ວມືຫລາຍຝ່າຍ ເຮັດໃຫ້ວຽກງານໂພຊະການ ຢູ່ແຂວງຫົວພັນ ໄດ້ຮັບການພັດທະນາ

ການຮ່ວມມືລະຫວ່າງສະຫະພາບເອີຣົບ, ອົງການອຸຍນີເຊບ ແລະ ພາກລັດ ໄດ້ເຮັດໃຫ້ວຽກງານການປັບປຸງໂພຊະນາການ ໃຫ້ແກ່ປະຊາຊົນທ້ອງຖິ່ນ ຢູ່ແຂວງຫົວພັນໄດ້ຮັບຜົນດີໂດຍສະເພາະແມ່ນເດັກນ້ອຍ ເຖິງແມ່ນວ່າຢູ່ແຂວງຫົວພັນ, ອັດຕາການຂາດສານອາຫານ ຊ້ຳເຮື້ອ, ເດັກໃນທ້ອງ, ໃນກຸ່ມເດັກນ້ອຍອາຍຸຕໍ່າກວ່າ 5 ປີແມ່ນສູງກວ່າຄ່າສະເລ່ຍຂອງປະເທດ 33% ຕາມການສຳຫລວດຕົວຊີ້ວັດສັງຄົມລາວ ແລະ ມີເຖິງ 41%.

ໂຄງການປັບປຸງໂພຊະນາການ ແມ່ນການໂຄງການລິເລີ່ມຂອງສະຫະພາບເອີຣົບ ພາຍໃຕ້ການຮ່ວມມືຫລາຍຝ່າຍ, ສະເພາະການຮ່ວມມືກັບອົງການອຸຍນີເຊັບ ໄດ້ເລີ່ມຕົ້ນໃນເດືອນກໍລະກົດ 2016 ດ້ວຍງົບປະມານທັງໝົດ 14.750.000 ເອີໂຣ, ໃນນີ້ ຈຳນວນ 12.500.000 ເອີໂຣ ແມ່ນປະກອບສ່ວນໂດຍສະຫະພາບເອີຣົບ ແລະ 2.250.000 ເອີໂຣປະກອບສ່ວນໂດຍ UNICEF. ໂຄງການດັ່ງກ່າວ ມີຢູ່ຂອບເຂດທົ່ວປະເທດ ແລະ ເປົ້າໝາຍ 10 ແຂວງ ຂອງສປປ ລາວ ປະກອບມີແຂວງຜົ້ງສາລີ, ຫລວງພະບາງ, ຫລວງນໍ້າທາ, ຫົວພັນ, ບໍ່ແກ້ວ, ຊຽງຂວາງ, ຄຳມ່ວນ, ສະຫວັນນະເຂດ, ສາລະວັນ ແລະ ອັດຕະປື.

ທ່ານນາງ ເພຍ ບຣິດໂຕ ຜູ້ຕາງໜ້າອົງການອຸຍນີເຊັບ ປະຈຳລາວ ໄດ້ກ່າວວ່າ: ການຮ່ວມມືກັບ ສະຫະພາບເອີຣົບດ້ານປັບປຸງໂພຊະນາການແມ່ນມີຄວາມສຳຄັນ ເພື່ອສ້າງສຸຂະພາບໃຫ້ແກ່ປະຊາຊົນໂດຍສະເພາະແມ່ນ ເດັກນ້ອຍ ທີ່ຈຳເປັນຕ້ອງໄດ້ຮັບອາຫານທີ່ຖືກຕ້ອງເໝາະສົມກັບເດັກ; ດັ່ງນັ້ນ ການສ້າງຄວາມອາດສາມາດຂອງພະນັກງານສາທາລະນະສຸກ ຈື່ງຈຳເປັນຕ້ອງໄດ້ຮັບການຍົກລະດັບ ຊຶ່ງສະ ຫະພາບເອີຣົບ ແລະ ອຸຍນີເຊັບ ເຫັນເຖິງຄວາມສຳຄັນຂອງໂພຊະນາການທີ່ມີຕໍ່ເດັກນ້ອຍ ແລະ ແມ່, ອົງການຢູນິເຊັບມີຄວາມຍິນດີ ທີ່ໄດ້ຮ່ວມມືກັບສະຫະພາບເອີຣົບ ໂດຍພາຍໃຕ້ການນຳພາຂອງການນຳຂອງແຂວງ ເພື່ອໃຫ້ການບໍລິການທີ່ຊ່ວຍຄອບຄົວປະຊາຊົນ ໃນການປ່ຽນພຶດຕິກຳທາງດ້ານໂພຊະະນາການຫັນໄປໃນທາງທີ່ດີຂຶ້ນ.

ທ່ານນາງ ອີນາ ມາຈູລໍນີແຕ ເອກອັກຄະລັດຖະທູດ ສະຫະພາບເອີຣົບ ປະຈໍາລາວ ໄດ້ກ່າວວ່າ: ພວກເຮົາດີໃຈທີ່ເປັນສ່ວນໜຶ່ງໃນການຊ່ວຍເຫລືອດ້ານໂພຊະນາການ ແລະ ການປິ່ນປົວ ໃຫ້ແກ່ປະຊາຊົນໃນທ້ອງຖິ່ນ ຍ້ອນພວກເຮົາເຮັດວຽກຮ່ວມກັບຫລາຍໜ່ວຍງານ ໃນການຈັດຕັ້ງປະຕິບັດ ໂດຍຄູ່ຮ່ວມງານ ພ້ອມດ້ວຍ ອຳນາດການປົກຄອງທ້ອງຖິ່ນ ແລະ ພວກເຮົາເຂົ້າໃຈວ່າບໍ່ມີໃຜສາມາດຈັດຕັ້ງປະຕິບັດໂຄງ ການເຫລົ່ານັ້ນໄດ້ພຽງຄົນດຽວ ພວກເຮົາຕ້ອງການຮ່ວມມືຂອງທຸກຄົນ. ພວກເຮົາຮູ້ວ່າ ເຄິ່ງໜຶ່ງຂອງປະຊາ ກອນໃນປະເທດລາວ ແມ່ນໄວໜຸ່ມ, ອາຍຸຕໍ່າກວ່າ 18 ປີ, ຖ້າຊາວໝຸ່ມໄດ້ຮັບການປັບປຸງ ພັດທະນາສຸ ຂະພາບ ແລະ ຄວາມຢູ່ດີກິນດີແລ້ວ ກໍຈະເຮັດໃຫ້ປະເທດຊາດມີກຳລັງຫລັກໃນການພັດທະນາປະເທດ.