ສາທາຢືນຢັນ ວັກຊີນ AstraZeneca ປອດໄພບໍ່ເປັນອັນຕະລາຍຕໍ່ຮ່າງກາຍ

ໃນວັນທີ 6 ເມສາ 2021, ທ່ານ ຄຳເປ ພົງສະຫວັດ ປະທານສະມາຄົມແພດເດັກລາວ, ປະທານກຳມະທິການທີ່ປຶກສາດ້ານວັກຊີນແຫ່ງຊາດ ທັງເປັນຜູ້ຊ່ຽວຊານອາວຸໂສເດັກ ໃຫ້ຮູ້ວ່າ: ວັກຊີນAstraZeneca ປ້ອງກັນພະຍາດໂຄວິດ-19 ເປັນວັກຊີນຊະນິດໜຶ່ງທີ່ໄດ້ກວດສອບຢ່າງລະອຽດຈາກອົງການອະນາໄມໂລກ ແລະ ໄດ້ຖືກປະເມີນວ່າເປັນວັກຊີນທີ່ມີຄຸນນະພາບ, ປອດໄພ ແລະ ມີປະສິດທິຜົນສູງໃນການປ້ອງກັນພະຍາດໂຄວິດ-19. ປັດຈຸບັນ ລັດຖະບານລາວໄດ້ເລັ່ງສັກວັກຊີນດັ່ງກ່າວໃຫ້ບັນດາກຸ່ມເປົ້າໝາຍທີ່ມີຄວາມສ່ຽງສູງ ຄາດວ່າຈະສໍາເລັດໃນໄວໆນີ້.

ໃນກໍລະນີ ເກີດມີຂ່າວກ່ຽວກັບການສັກວັກຊີນ AstraZeneca ແລ້ວເສຍຊີວິດຢູ່ໃນປະເທດເອີຣົບ ແລະ ຫລາຍປະເທດ ເຮັດໃຫ້ຢຸດການໃຫ້ວັກຊີນຊະນິດດັ່ງກ່າວ, ແຕ່ຜ່ານການກວດສອບ ແລະ ວິນິດໄສຈາກອົງການອະນາໄມໂລກ ໄດ້ອອກມາຢືນຢັນວ່າ: ການເສຍຊີວິດດັ່ງກ່າວແມ່ນບໍ່ກ່ຽວກັບການສັກວັກຊີນ AstraZeneca ເຊິ່ງສາເຫດການເສຍຊີວິດແມ່ນຍ້ອນພະຍາດເສັ້ນເລືອດດຳອຸດຕັນສະໝອງ ທີ່ຄົນເຈັບມີພະຍາດປະຈຳໂຕຢູ່ແລ້ວ ເຊິ່ງມາຮອດປັດຈຸບັນ ຫລາຍປະເທດທີ່ຢຸດການໃຫ້ວັກຊີນ AstraZeneca ກໍເລີ່ມກັບມານຳໃຊ້ວັກຊີນຊະນິດນີ້ອີກຄັ້ງ.