ສາມອົງການສາກົນໃຫ້ທຶນຊ່ວຍເຫລືອຜູ້ຕັ້ງພູມລຳເນົາໃໝ່, ແຮງງານເຄື່ອນຍ້າຍ ແລະ ໄວໜຸ່ມ ຢູ່ 2 ແຂວງພາກໃຕ້ 1.389,470 ລ້ານໂດລາສະຫະລັດ

ກະຊວງແຜນການ ແລະ ການລົງທຶນ ຮ່ວມກັບ ສາມອົງການຂອງສະຫະປະຊາຊາດ (UNFPA, IOM, UN-Habitat) ໄດ້ຈັດກອງປະຊຸມຂອງຄະນະກຳມະການ ກັບໂຄງການຮ່ວມມືຂອງສະຫະປະຊາຊາດໃນການປົກປ້ອງ ແລະ ໃຫ້ບໍລິການສຳລັບຜູ້ຕັ້ງພູມລຳເນົາໃໝ່ ,ແຮງງານເຄື່ອນຍ້າຍ ແລະໄວໜຸ່ມ ຢູ່ແຂວງສະຫວັນນະເຂດ ແລະ ຈຳປາສັກ ໃນວັນທີ 9 ເມສານີ້ຢູ່ນະຄອນຫລວງວຽງຈັນ.

ໂຄງການນີ້ມີໄລຍະເວລາ 18 ເດືອນ ລວມມູນຄ່າ 1.389,470 ລ້ານໂດລາສະຫະລັດ ໂດຍອົງການ SDC ໄດ້ປະກອບທຶນ 998,970 ໂດລາສະຫະລັດ ແລະ ອົງການສະຫະປະຊາຊາດປະກອບສ່ວນ 390,500 ໂດລາສະຫະລັດ.ເພື່ອແນໃສ່ຕິດຕາມບັນຫາສຸຂະພາບ ແລະ ເສດຖະກິດ-ສັງຄົມ ທີ່ເປັນຜົນເນື່ອງມາຈາກການແພ່ລະບາດຂອງພະຍາດໂຄວິດ-19 ຢູ່ແຂວງສະຫວັນນະເຂດ ແລະ ຈຳປາສັກ, ເຊິ່ງເປັນແຂວງທີ່ມີປະຊາກອນຈຳນວນຫລາຍ, ຜູ້ອົບພະຍົບກັບຄືນມາຫລາຍ, ລວມເຖິງຄວາມຕ້ອງການນໍ້າ, ສຸຂາພິບານ ແລະ ສຸຂະອະນາໄມ ໃນເວລາດຽວກັນ. ໂດຍຜ່ານການ ສະໜັບສະໜັບສະໜູນ ແລະ ເສີມສ້າງຄວາມສາມາດໃຫ້ລັດຖະບານ ແລະ ຊຸມຊົນໃນ ສປປ ລາວ ເພື່ອຮັບມື ແລະ ປັບສະພາບກັບວິກິດການດັ່ງກ່າວນີ້ໄດ້ຢ່າງທັນການ.

ໂອກາດນີ້, ທ່ານ ນາງ ສີສົມບູນ ອຸ່ນນະວົງ, ຫົວໜ້າກົມຮ່ວມມືສາກົນ, ກະຊວງແຜນການ ແລະ ການລົງທຶນ ໃຫ້ຮູ້ວ່າ: ຢ່າງທີ່ເຮົາຮູ້ກັນວ່າ ເພື່ອປັບປຸງການບໍລິການໃຫ້ແກ່ຜູ້ທີ່ຕ້ອງການຄວາມຊ່ວຍເຫຼືອ, ພວກເຮົາຕ້ອງມີການວາງແຜນທີ່ດີຂຶ້ນແລະມີການຮ່ວມມືທີ່ເຂັ້ມແຂງກວ່າເກົ່າ. ພ້ອມນີ້, ກໍຂໍຂອບໃຈບັນດາອົງການຂອງອົງການສະຫະປະຊາຊາດ (UNFPA, IOM, UN-HABITAT), ໂດຍສະເພາະ SDC ຜູ້ທີ່ສະໜັບສະໜູນທາງດ້ານການເງິນເຂົ້າໃນໂຄງການຮ່ວມມືດັ່ງກ່າວ.

ພາຍໃຕ້ການຮ່ວມມືດັ່ງກ່າວນີ້, ຜູ້ທີ່ໄດ້ຮັບຜົນປະໂຫຍດໂດຍກົງແມ່ນມີຈຳນວນສະເລ່ຍ 172,000 ຄົນ, ໃນນັ້ນ ແມ່ຍິງ 101,160 ຄົນ ລວມທັງຜູ້ອົບພະຍົບຜູ້, ພະນັກງານອົບພະຍົບພາຍໃນ, ຜູ້ອົບພະຍົບທີ່ຖືກຍົກຍ້າຍ ຫລື ຕົກຄ້າງ ແລະ ຜູ້ຖືກເຄາະຮ້າຍຈາກການຄ້າມະນຸດ, ໄວໜຸ່ມ, ຜູ້ປະສົບເຄາະຮ້າຍ ຈາກການໃຊ້ຄວາມຮຸນແຮງທາງເພດ. ນອກນັ້ນ, ຄາດວ່າຈະມີປະມານ 600,000 ຄົນໄດ້ຮັບຜົນປະໂຫຍດທາງອ້ອມຈາກໂຄງການຮ່ວມມືນີ້.