ກຳປູເຈຍ ຈະຂຸດຄົ້ນບໍ່ຄຳ 3 ໂຕນຕໍ່ປີ
ສຳນັກຂ່າວຕ່າງປະເທດລາຍງານວ່າ: ວັນທີ 10 ມິຖຸນາຜ່ານມາ, ນາຍົກລັດຖະມົນຕີກຳປູເຈຍ ສົມເດັດ ຮຸນເຊັນ ປະກາດວ່າ ກຳປູເຈຍຈະຂຸດຄົ້ນບໍ່ຄຳ ດ້ວຍປະລິມານ 3 ໂຕນຕໍ່ປີ, ຄາດວ່າຈະນຳເອົາລາຍໄດ້ເຂົ້າງົບປະມານແຫ່ງຊາດໄດ້ຫລາຍສົມຄວນ.
ທ່ານ ຮຸນເຊັນ ໃຫ້ຮູ້ວ່າ: ພາຍຫລັງມີການສຳຫຼວດເປັນເວລາ 14 ປີ, ປັດຈຸບັນ ບໍລິສັດຂອງ ອົດສະຕຣາລີ ຈະເລີ່ມຂຸດຄົ້ນ ແລະ ຜະລິດຄຳຢູ່ກັບທີ່ ໃນເຂດຕາແສງ O’Khvav, ເມືອງ Keo Seima, ແຂວງ Mondulkiri ໃນວັນທີ 21 ມິຖຸນານີ້.
ທ່ານ ຮຸນເຊັນ ໃຫ້ຮູ້ຕື່ມວ່າ: ບໍ່ຄຳດັ່ງກ່າວ ອາດສາມາດຜະລິດໄດ້ 3 ໂຕນຕໍ່ປີ ພາຍໃນ 8 ປີ, ຫລັງຈາກນັ້ນ ບໍລິສັດອາດຈະຂະຫຍາຍເຂດຂຸດຄົ້ນອອກໄປຕື່ມອີກ ແລະ ຈະມີລາຍໄດ້ ປະມານ 185 ລ້ານໂດລາຕໍ່ປີ, ໃນນັ້ນ ເອົາເຂົ້າງົບປະມານແຫ່ງຊາດປະມານ 40 ລ້ານໂດລາຕໍ່ປີ.
ລັດຖະບານກຳປູເຈຍ ຈະສືບຕໍ່ຊຸກຍູ້ໃຫ້ບັນດາບໍລິສັດຕ່າງໆຂຸດຄົ້ນດ້ວຍຂະໜາດໃຫຍ່ຕື່ມອີກ ເພື່ອນຳເອົາລາຍໄດ້ທີ່ມະຫາສານໃຫ້ແກ່ປະເທດຊາດ.
