ລັດຖະບານຝຣັ່ງຊ່ວຍທາງດ້ານສະບຽງອາຫານທີ່ຈໍາເປັນໃຫ້ແກ່ ແຮງງານລາວ ທີ່ສູນຈໍາກັດບໍລິເວນ236.000 ໂດລາສະຫະລັດ
ວັນທີ 29 ກັນຍາ 2021 ນີ້ທີ່ ກະຊວງສາທາລະນະສຸກ ແລະ ອົງການອາຫານໂລກ ໄດ້ຮັບການຊ່ວຍເຫລືອຈາກລັດຖະບານແຫ່ງປະເທດຝຣັ່ງ ເປັນເງິນຈໍານວນ 236.000 ໂດລາສະຫະລັດອາເມລິກາ ເພື່ອຊ່ວຍເຫລືອທາງດ້ານສະບຽງອາຫານໃຫ້ແກ່ແຮງງານ ທີ່ຢູ່ໃນ 18 ສູນຈໍາກັດບໍລິເວນ ໃນ 7 ແຂວງ ທີ່ ສປປ ລາວ.
ອົງການອາຫານໂລກ ແລະ ອົງການເພື່ອນຮ່ວມງານ – ອົງການກາແດງສະວິດ, ອົງການກາແດງລາວ ແລະ ອົງການສຸພະນິມິດສາກົນ – ຈະໄດ້ນໍາໃຊ້ເງິນຈາກການຊ່ວຍເຫລືອໃນຄັ້ງນີ້ ສະໜອງອາຫານທີ່ມີໂພຊະນາການ 3 ຄາບ ໃນແຕ່ລະມື້ ໃຫ້ແກ່ແຮງງານຫຼາຍກວ່າ 5.600 ຄົນ ທີ່ກັບມາຈາກປະເທດເພື່ອນບ້ານ.
ການຊ່ວຍເຫຼືອດັ່ງກ່າວ ຍັງໄດ້ຊ່ວຍໃຫ້ພວກເຂົາ ເລົ່ານັ້ນມີສຸຂະພາບ ແຂງແຮງ ແລະ ການເປັນຢູ່ທີ່ດີ, ໃນເວລາດຽວກັນ ກໍ່ຫຼຸດຜ່ອນຄ່າໃຊ້ຈ່າຍຕ່າງໆຂອງພວກເຂົາ ແລະ ຄອບຄົວຂອງພວກເຂົາ.
ໃນພິທີໄດ້ກ່າວມອບໂດຍ ທ່ານ ຢານ ເດລບາເຣີ ຜູ້ຕາງໜ້າ ແລະ ຜູ້ອໍານວຍການ ອົງການອາຫານໂລກ ປະຈໍາ ສປປ ລາວ ແລະ ກ່າວຮັບໂດຍ ທ່ານ ປອ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
