14 ແຂວງໃນລາວ ກຽມຮັບມືກັບພາຍຸລົມແຮງ ແລະ ນໍ້າຖ້ວມອັ່ງ ໃນໄລຍະວັນທີ 10-12 ຕຸລາ 2021

ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນເລກທີ 1109 ລົງວັນທີ 8 ຕຸລາ 2021 ໃຫ້ເຝົ້າລະວັງພາຍຸເຂດຮ້ອນ ໄລອອນລອກດັ່ງນີ້: ໃນເວລາ 8:00 ໂມງ ຂອງວັນທີ 8 ຕຸລາ 2021 ພາຍຸເຂດຮ້ອນ ໄລອອນລອກ (LIONROCK) ມີຈຸດສູນກາງຢູ່ເສັ້ນຂະໜານທີ 17.6 ອົງສາເໜືອ ແລະ ເສັ້ນແວງທີ 110,8 ອົງສາຕາເວັນອອກ ກໍາລັງເຄື່ອນທີ່ໃນ ທິດເໜືອ-ຕາເວັນຕົກສ່ຽງເໜືອ ໄປຫາເກາະໄຮໜໍາຢ່າງຊ້າໆ. ຄາດຄະເນວ່າພາຍຸຫົວນີ້ຈະສືບຕໍ່ເຄື່ອນຂຶ້ນຝັ່ງທາງ ພາກເໜືອປະເທດຫວຽດນາມ ໃນໄລຍະວັນທີ 9-10 ຕຸລາ 2021 ຫລັງຈາກນັ້ນ ຈະອ່ອນກໍາລັງເປັນພາຍຸດີເປຣຊັນ ແລະ ເຄື່ອນທີ່ຜ່ານພາກເໜືອ ແລະ ພາກກາງ ຂອງ ສປປ ລາວ ໃນໄລຍະວັນທີ 10-11 ຕຸລາ 2021 ນີ້. ຊຶ່ງຈະເຮັດໃຫ້ມີຝົນຕົກໃນລະດັບປານກາງ ຫາ ໜັກ ພ້ອມມີລົມພັດແຮງຢູ່ບາງທ້ອງຖິ່ນ ເຊັ່ນ: ແຂວງ ຜົ້ງສາລີ, ຫົວພັນ, ຊຽງຂວາງ, ຫລວງນ້ຳທາ, ອຸດົມໄຊ, ບໍ່ແກ້ວ, ຫລວງພະບາງ, ໄຊຍະບູລີ, ນະຄອນຫລວງວຽງຈັນ, ໄຊສົມບູນ, ວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ ຈະເຮັດໃຫ້ເກີດມີຕົ້ນໄມ້ຫັກລົ້ມ, ຫລັງຄາເຮືອນເປ່ເພ, ນ້ຳຖ້ວມອັ່ງ ແລະ ນ້ຳຖ້ວມຍື່ງ ໃນໄລຍະວັນທີ 10-12 ຕຸລາ 2021 ນີ້.

ດັ່ງນັ້ນ, ຈຶ່ງແຈ້ງເຕືອນເຖິງອໍານາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ບັນດາ ແຂວງດັ່ງກ່າວ ໂດຍສະເພາະຜູ້ທີ່ອາໄສຢູ່ລຽບຕາມຮ່ອມພູ ເປີ້ນພູ ແລະ ແຄມແມ່ນ້ຳຕ່າງໆ ຈົ່ງມີສະຕິລະມັດລະວັງຕໍ່ ສະພາບດິນເຈື່ອນ, ນໍ້າຖ້ວມຊູ, ນ້ຳຖ້ວມຍື່ງ ແລະ ລົມພັດແຮງ ທີ່ຈະເກີດຂື້ນໄດ້ໃນໄລຍະນີ້ ພ້ອມທັງກະກຽມ ຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ສູງ ແລະ ປອດໄພ ຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.