ລາວ ເປີດການນໍາໃຊ້ລະຫັດ QR ໃນບັດຢັ້ງຢືນການຮັບວັກຊີນກັນພະຍາດໂຄວິດ-19 ຢ່າງເປັນທາງການ
October 22, 2021 - 10:55 PM
ວັນທີ 22 ຕຸລາ 2021 ນີ້, ກະຊວງສາທາລະນະສຸກ, ອົງການອານາໄມໂລກ ແລະ ຄູ່ຮ່ວມພັດທະນາ ໄດ້ຈັດພິທີເປີດການນໍາໃຊ້ລະຫັດ QR ໃນບັດຢັ້ງຢືນການຮັບວັກຊີນກັນພະຍາດໂຄວິດ-19 ຢ່າງເປັນທາງການ ຢູ່ທີ່ສູນການຄ້າລາວໄອເຕັກ.
ລະບົບດັ່ງກ່າວຖືກພັດທະນາໂດຍ ກະຊວງສາທາລະນະສຸກ, ອົງການອະນາໄມໂລກ ແລະ ຄູ່ຮ່ວມພັດທະນາ ເຊີ່ງຈະເປັນບາດກ້າວສໍາຄັນໃນການຮັບປະກັນວ່າບັດຢັ້ງຢືນການຮັບວັກຊີນຈະແມ່ນບັດແທ້ ແລະ ສາມາດກວດສອບຜ່ານທາງດີຈິຕ້ອນໄດ້.
ສໍາລັບຜູ້ທີ່ຮັບບໍລິການວັກຊີນ, ຂໍ້ມູນສ່ວນຕົວ ແລະ ຂໍ້ມູນກ່ຽວກັບວັກຊີນຈະຖືກບັນທຶກເຂົ້າໃນລະບົບຖານຂໍ້ມູນສໍາລັບວັກຊີນປ້ອງກັນພະຍາດໂຄວິດ-19, ຈາກນັ້ນ ລະຫັດ QR ຈະຖືກສ້າງຂຶ້ນ ແລະ ພິມລົງໄປດ້ານຫລັງຂອງບັດຢັ້ງຢືນການຮັບວັກຊີນ.
ພິທີດັ່ງກ່າວໄດ້ຮັບກຽດເຂົ້າເປັນປະທານໂດຍ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ, ດຣ ຈັນສາລີ ພົມມະວົງ ຮອງຫົວໜ້າກົມແຜນການ ແລະ ການຮ່ວມມື, ທ່ານ ວິສິດ ຄໍາລືຊາ ຫົວໜ້າສູນສື່ສານເພື່ອສຸຂະພາບ ແລະ ສຸຂະສຶກສາ, ດຣ ວຽງຂັນ ພິໄຊ ຮອງຫົວໜ້າສູນສຸຂະພາບແມ່ ແລະ ເດັກ ແລະ ທ່ານ ໂຣລັນ ດີລິບຄູມາ ເຮັນສມັນ, ວິຊາການຊ່ຽວຊານຈາກ ອົງການອະນາມາໂລກ.
