ປີ 2022 ກວດກາລັດ ຈະແກ້ໄຂຂໍ້ຄົງຄ້າງໃຫ້ສຳເລັດ ລວມມີມູນຄ່າ 5.282,53 ຕື້ກີບ

ທ່ານ ຄໍາພັນ ພົມມະທັດ ປະທານອົງການກວດກາແຫ່ງລັດ ກ່າວຕໍ່ກອງປະຊຸມສະໄໝ ສາມັນເທື່ອທີ 2 ຂອງສະພາແຫ່ງຊາດຊຸດທີ IX ທີ່ພວມດໍາເນີນຢູ່ໃນປັດຈຸບັນນີ້, ພ້ອມທັງຍົກໃຫ້ເຫັນ ບັນດາເປົ້າໝາຍສໍາຄັນທີ່ຈະສືບຕໍ່ກວດກາ ເປັນຕົ້ນ ແມ່ນບັນດາໂຄງການລົງທຶນຂອງລັດ ທີ່ບໍ່ຖືກຕາມ ລະບຽບຂັ້ນຕອນການລົງທຶນຂອງລັດ ຍັງຄ້າງທັງໝົດ 247 ໂຄງການ ລວມມີມູນຄ່າ 5.282,53 ຕື້ກີບ.

ວຽກງານກວດກາລັດ ແມ່ນວຽກທີ່ລະອຽດອ່ອນ, ຫຍຸ້ງຍາກທ້າທາຍ ແລະ ກ່ຽວພັນກັບບຸກຄົນຫລາຍ ລະດັບ ທັງໃນຂົງເຂດພັກ-ລັດ ແລະ ເອກະຊົນ. ແຕ່ແນວໃດກໍຕາມ, ອົງການກວດກາລັດຖະບານ ກໍໄດ້ ກໍານົດເປົ້າ ໝາຍສືບຕໍ່ສຸມໃສ່ກວດກາຕາມຜົນການກວດສອບ ປີ 2019 ແລະ ມະຕິຂອງສະພາແຫ່ງຊາດ ທີ່ຍັງຄ້າງ ໃຫ້ສໍາເລັດໃນປີ 2022.

ໃນນີ້ ຈະໃຫ້ສໍາເລັດຈໍານວນ 102 ໂຄງການ ລວມມີມູນຄ່າ 3.815,62 ຕື້ກີບ. ກວດກາການອະນຸຍາດໃຫ້ເຊົ່າ-ສໍາປະ ທານທີ່ດິນລັດ ແລະ ສໍາປະທານຂຸດຄົ້ນແຮ່ທາດ ທີ່ປະຕິ ບັດບໍ່ຖືກຕ້ອງຕາມລະບຽບຫລັກການ ຍັງຄ້າງຈໍານວນ 68 ໂຄງການ, ມີເນື້ອທີ່ລວມທັງໝົດ 321 ເຮັກຕາໃຫ້ສໍາເລັດ. ກວດກາການເກັບກູ້ໜີ້ຕ້ອງຮັບ ທີ່ຄ້າງມອບຂອງຫົວໜ່ວຍ ງົບປະມານໃນ 9 ກະຊວງ, ລວມມີມູນຄ່າທັງໝົດ 1.173,39 ຕື້ກີບ, ໃນນີ້ເກັບກູ້ໄດ້ແລ້ວ 207,81%, ຍັງຄ້າງມູນຄ່າ 965,58 ຕື້ກີບ ເຊິ່ງຈະໃຫ້ສໍາເລັດ ໃນ 3 ກະຊວງ. ກວດກາ 9 ຫົວໜ່ວຍທຸລະກິດ ກໍລະນີໜີ້ຕ້ອງຮັບຈາກການປ່ອຍເງິນກູ້ ເພື່ອເກັບຊື້ເຂົ້າ ແຊກແຊງລາຄາ ແລະ ດັດສົມຕະຫລາດ. ໃນນີ້ປີ 2021 ໄດ້ດໍາເນີນການກວດກາສໍາເລັດ 2 ຫົວໜ່ວຍ ແລະ ໃນປີ 2022 ຈະໃຫ້ສໍາເລັດ 7 ຫົວ ໜ່ວຍ.

ທ່ານປະທານອົງການກວດກາແຫ່ງລັດ ກ່າວຕື່ມວ່າ: ສໍາລັບວຽກງານກວດກາຢູ່ 5 ກົມຂອງກະຊວງ ການເງິນແມ່ນຈະສືບຕໍ່ແຕ່ງຕັ້ງຄະນະສະເພາະກິດກວດກາລົງເລິກ ໃຫ້ສໍາເລັດຈຳນວນຫນຶ່ງ.