ວັນທີ 11 ພະຈິກ 1918 ເປັນວັນສິ້ນສຸດຂອງສົງຄາມໂລກຄັ້ງທີ 1 ຢ່າງເປັນທາງການ.

ສົງຄາມ​ໂລກ​ຄັ້ງ​ທີ 1 ແມ່ນເປັນ​ການ​ຂັດແຍ້ງລະຫວ່າງປະເທດຄັ້ງທຳອິດທີ່ຂະຫຍາຍຂອບເຂດ​ກວ້າງ​ຂວາງ​ ​ເນື່ອງຈາກ​ເປັນ​ການ​ຂັດ​ແຍ້​ງກັນ​ທີ່​ບັນດາ​ປະ​ເທດ​ມະຫາ​ອຳນາດ​ຂອງໂລກ​ເຊັ່ນ: ອັງກິດ, ຝຣັ່ງ, ຣັດ​ເຊຍ, ​ເຢຍລະ​ມັນ​ ເຂົ້າມາ​ກ່ຽວຂ້ອງ​ໂດຍ​ກົງ ກ່ອນ​ທີ່ ​ອີ​ຕາ​ລີ ​ແລະ ​ສະ​ຫະ​ລັດອາເມລິກາ ຈະ​ເຂົ້າ​ຮ່ວມ​ໃນພາຍຫລັງ​​.

ສົງ​ຄາມ​ໂລກ​ຄັ້ງ​ທີ່ 1 ໄດ້ຍືດເຍື້ອຍາວນານ​ເປັນ​ເວລາ​ດົນ​ກວ່າ 4 ປີ, ໃນທີ່ສຸດ​​ເຢຍລະ​ມັນ ໃນຖານະຝ່າຍ​ມະຫາ​ອຳນາດ​​ກາງ​ໄດ້​ຕິດ​ຕໍ່​ກັບ​ຝ່າຍສຳພັນທະມິດ​ເພື່ອຂໍ​ເຈລະຈາ​ສະຫງົບສຶກ​ໃນ​ວັນ​ທີ 6 ພະຈິກ 1918, ຈາກນັ້ນທັງສອງ​ຝ່າຍຈຶ່ງ​ໄດ້ລົງນາມ​​ສັນຍາ​ ໃນສັນຍາສະຫງົບສຶກ ຢູ່ເທິງຂະບວນລົດໄຟ ເມືອງ ຄອງປ່ຽນ​ ປະເທດຝຣັ່ງ ໃນວັນທີ 11 ພະຈິກ 1918, ດັ່ງນັ້ນຊາວໂລກຈຶ່ງນັບເອົາວັນທີ 11 ຂອງເດືອນ 11 ຂອງທຸກໆປີເປັນວັນສິ້ນສຸດຂອງສົງຄາມໂລກຄັ້ງທີ 1 ຢ່າງເປັນທາງການ.