ນາຍົກລັດຖະມົນຕີ ອັງກິດກຽມສະເຫນີໃຫ້ປະຊາຊົນຜູ້ທີ່ມີອາຍຸ 18 ປີຂຶ້ນໄປ ຮັບການສັກວັກຊີນເຂັມກະຕຸ້ນເພື່ອຮັບມືກັບການລະບາດຂອງ Omicron
ທ່ານ Boris Johnson ນາຍົກລັດຖະມົນຕີ ອັງກິດ ຖະແຫລງຂ່າວທາງໂທລະພາບ ໃນວັນທີ 12 ທັນວາ 2021 ໂດຍເປີດເຜີຍວ່າ: ລັດຖະບານກຽມສະເໜີສັກວັກຊີນເຂັມກະຕຸ້ນໃຫ້ແກ່ປະຊາຊົນອັງກິດທຸກຄົນທີ່ມີອາຍຸແຕ່ 18 ປີຂື້ນໄປ ເລີ່ມອາທິດນີ້ ພ້ອມປະກາດເຕືອນໄພສຸກເສີນ ຈາກການແຜ່ລະບາດໂຄວິດສາຍພັນ Omicron ທີ່ຮ້າຍແຮງຂຶ້ນ.
ທ່ານ Boris Johnson ກ່າວວ່າ: ບໍ່ມີໃຜຄວນຈະມີຄວາມສົງໃສໃດໆ ຄື້ນລູກໃຫຍ່ຂອງ Omicron ກຳລັງມາ. ໃນຂະນະທີ່ລັດຖະບານກຳນົດເປົ້າໝາຍໃໝ່ ເພື່ອສັກວັກຊີນເຂັມກະຕຸ້ນໃຫ້ແກ່ປະຊາກອນກຸ່ມຜູ້ໃຫຍ່ທຸກຄົນທີ່ສະໝັກໃຈເຂົ້າຮັບການສັກວັກຊີນພາຍໃນທ້າຍເດືອນນີ້.
ລ່າສຸດມີລາຍງານວ່າ ພົບຜູ້ຕິດເຊື້ອໂຄວິດ-19 ສາຍພັນ ໂອໄມຄອນ ໃນສະຫະຣາຊອານາຈັກແລ້ວ 3,137 ຄົນ, ໃນນັ້ນພົບໃນອັງກິດ ເກືອບ 3,000 ຄົນ, ສ່ວນທີ່ເຫລືອຢູ່ໃນ Scotland Wales ແລະ ໄອແລນເຫນືອ.
ໂດຍສະຖານະການການລະບາດຂອງ Omicron ເພີ່ມຂຶ້ນໃນລະດັບ 4 ຫລື ມີການແຜ່ເຊື້ອໃນລະດັບສູງ ເຊິ່ງເປັນຄັ້ງສຸດທ້າຍທີ່ ສະຫະຣາຊອານາຈັກ ປະເຊີນກັບການລະບາດຂອງໂຄວິດໃນລະດັບນີ້ ແມ່ນຊ່ວງເດືອນພຶດສະພາ.
ທ່ານ Johnson ຢືນຢັນ ປະເທດອັງກິດກໍາລັງປະເຊີນກັບສະຖານະການສຸກເສີນ ໃນການຕໍ່ສູ້ກັບ Omicron ແລະ ຊີ້ໃຫ້ເຫັນວ່າການສັກວັກຊີນ 2 ເຂັມ ແມ່ນບໍ່ພໍ ແລະ ຈຳເປັນຕ້ອງສັກເຂັມທີ 3
ທ່ານ Johnson ກ່າວວ່າ: ຂ້ອຍຢ້ານວ່າຂະນະນີ້ ເຮົາປະເຊີນກັບສະຖານະການສຸກເສີນໃນການຕໍ່ສູ້ຕ້ານ Omicron. ໃນປັດຈຸບັນມັນເປັນທີ່ຊັດເຈນແລ້ວວ່າສັກວັກຊີນ 2 ເຂັມບໍ່ພຽງພໍທີ່ຈະໃຫ້ລະດັບການປ້ອງກັນທີ່ເຮົາທຸກຄົນຕ້ອງການ. ແຕ່ຂ່າວດີແມ່ນນັກວິທະຍາສາດຂອງເຮົາ. ໝັ້ນໃຈວ່າດ້ວຍວັກຊີນເຂັມທີ 3 ຫລື booster dose. ເຮົາສາມາດເຮັດໃຫ້ລະດັບການປ້ອງກັນຂອງເຮົາເພີ່ມຂຶ້ນ.
ທ່ານຍັງໄດ້ກ່າວຕື່ມອີກວ່າ: ປະຈຸບັນນັກວິທະຍາສາດຂອງອັງກິດຍັງບໍ່ສາມາດກ່າວໄດ້ວ່າ Omicron ມີຄວາມຮ້າຍແຮງໜ້ອຍກວ່າເຊື້ອໂຄວິດສາຍພັນອື່ນໆ. ແຕ່ຖ້າຫາກພິສູດໄດ້ວ່າຄວາມເປັນຈິງແລ້ວ ສິ່ງທີ່ເຮົາຮູ້ແນ່ນອນແມ່ນວ່າ omicrons ແຜ່ລະບາດໄດ້ງ່າຍກ່ວາ ແລະ ການລະບາດຂອງ omicron ໃນກຸ່ມປະຊາຊົນທີ່ບໍ່ໄດ້ຮັບວັກຊີນ ເຂັມ booster. ຈະເພີ່ມຄວາມສ່ຽງໃຫ້ຄົນເຈັບເຂົ້າໂຮງໝໍເພີ່ມຂຶ້ນ ຊຶ່ງອາດຈະສົ່ງຜົນກະທົບພາໃຫ້ມີຜູ້ປ່ວຍລົ້ນ ແລະ ນຳໄປສູ່ການເສຍຊີວິດທີ່ໂສກເສົ້າຈໍານວນຫລາຍ.
ຢ່າງໃດກໍຕາມ, ສໍາລັບຊາວອັງກິດທີ່ມີອາຍຸ 18 ປີຂຶ້ນໄປ ທີ່ຈະໄດ້ຮັບການສັກວັກຊີນເຂັມກະຕຸ້ນຕ້ອງໄດ້ສັກວັກຊີນເຂັມທີ2 ມາແລ້ວຢ່າງໜ້ອຍ 3 ເດືອນ. ເຊິ່ງປະຊາຊົນຜູ້ທີ່ມີອາຍຸເກີນ 30 ປີ ສາມາດນັດໜາຍທາງອອນລາຍໄດ້ ຫລັງຈາກສັກເຂັມ2 ແລ້ວ 2 ເດືອນ.
