ສະເປີ ບໍ່ພໍໃຈພຣີເມຍລີກສັ່ງເລື່ອນເກມແຂ່ງກັບ ອາເຊນອລ

ຝ່າຍຈັດການແຂ່ງຂັນຂອງພຣີເມຍລີກໄດ້ຢືນຢັນຄຳສັ່ງ ເລື່ອນເກມຄູ່ລະຫວ່າງ ທັອດແນມ ຮັອດສະເປີ ທີ່ຈະພົບກັບ ອາເຊນອລ ໃນວັນອາທິດນີ້ ຕາມຄຳຮ້ອງຂໍຂອງຝັ່ງອາເຊນອລ ເນື່ອງຈາກທີມປືນໃຫຍ່ປະສົບບັນຫານັກເຕະໄດ້ຮັບບາດເຈັບ ຕິດໂຄວິດຫລາຍຄົນ ເຮັດໃຫ້ມີນັກເຕະເຫລືອໃຊ້ງານພຽງ 12 ຄົນເທົ່ານັ້ນ.

ເຊິ່ງຈາກຄຳສັ່ງດັ່ງກ່າວເຮັດໃຫ້ ສະເປີ ອອກຖະແຫລງການສະແດງຄວາມບໍ່ພໍໃຈເປັນຢ່າງຫລາຍ ທີ່ພຣີເມຍລີກເປີດໄຟຂຽວໃຫ້ມີການເລື່ອນເກມດັ່ງກ່າວ ທັງທີ່ກ່ອນຫນ້ານີ້ເຄີຍປະຕິເສດຄຳຮ້ອງຂອງ ສະເປີ ທີ່ຂໍເລື່ອນເກມ ເລສເຕີ ຊິຕີ ດ້ວຍສາເຫດທີ່ໃກ້ຄຽງກັນ.

ທັງນີ້ຄາດວ່າ ອາເຊນອລ ມີນັກເຕະບໍ່ຫນ້ອຍກວ່າ 10 ຄົນ ທີ່ຖືກອາການບາດເຈັບ ແລະຕິດໂຄວິດ ລວມເຖິງຕ້ອງໄປຮັບໃຊ້ຊາດໃນການແຂ່ງຂັນ ແອຟຣິກາ ຄັບ ອອບ ເນຊັນ 2021 ທີ່ແຄມເມີຣູນ.