ປະຫວັດສາດຫນ້າໃຫມ່ ຟີຟາຢືນຢັນ ບານໂລກ 2022 ມີກຳມະການຍິງຮ່ວມຕັດສິນນຳ
ຟີຟາ ຢືນຢັນວ່າເຕະບານໂລກ 2022 ຈະມີຜູ້ຕັດສິນຍິງລົງຕັດສິນເປັນຄັ້ງທຳອິດໃນປະຫວັດສາດ ມີທັງຫມົດ 6 ຄົນທີ່ໄດ້ຮັບເລືອກໃຫ້ມາຮ່ວມທີມຕັດສິນໃນສະຫນາມ.
ສະຫະພັນບານເຕະນາໆຊາດ (FIFA) ຢືນຢັນວ່າໃນການແຂ່ງຂັນ ບານໂລກ 2022 ທີ່ປະເທດກາ ຈະມີຜູ້ຕັດສິນຍິງລົງຕັດສິນເກມເປັນຄັ້ງທຳອດໃນປະຫວັດສາດ ມີທັງຫມົດ 6 ຄົນທີ່ໄດ້ຮັບເລືອກໃຫ້ມາເຮັດຫນ້ານີ້.
ໂດຍຜູ້ທີ່ຜ່ານການຄັດເລືອກແບ່ງເປັນຜູ້ຕັດສິນກາງສະຫນາມ 3 ຄົນ ໄດ້ແກ່ ສະເຕຟານີ ຟຮັບປາ (ຝຣັ່ງ), ຊາລິມາ ມູຄັນຊັງກາ (ຣະວັນດາ) ແລະ ໂຍຊິມິ ຍາມາຊິຕະ (ຍີ່ປຸນ) ສ່ວນອີກ 3 ຄົນ ເປັນຜູ້ຊ່ວຍຜູ້ຕັດສິນ ນອຍຊາ ບັກ (ບຣາຊິລ), ຄາເຣນ ອິອາສ ເມດິນາ (ເມັກຊິກ) ແລະ ແຄັດເທີຣີນ ເນສບິສ (ສະຫະລັດ ອາເມລິກາ).
6 ຄົນດັ່ງກ່າວຈະເປັນສ່ວນຫນຶ່ງຂອງທີມຜູ້ຕັດສິນປະຈຳບານໂລກຄັ້ງນີ້ ເຊິ່ງມີຜູ້ຕັດສິນກາງສະຫນາມ 36 ຄົນ, ຜູ້ຊ່ວຍຜູ້ຕັດສິນ 6ໍ9 ຄົນ ແລະຜູ້ຕັດສິນວີເອອາ 24 ຄົນ ເຊິ່ງການແຂ່ງຂັນຈະດຳເນີນໄປລະຫວ່າງວັນທີ 21 ພະຈິກ ຫາ 18 ທັນວານີ້.
ປິແອລຸຍຈິ ຄອລລີນາ ປະທານຄະນະກຳມະການຜູ້ຕັດສິນຟີຟາ ກ່າວວ່າ : ‘‘ ນີ້ຖືເປັນການສະຫລຸບຂະບວນການອັນຍາວນານເພື່ອສົ່ງຜູ້ຕັດສິນຍິງເຂົ້າສູ່ລາຍການໃຫຍ່ ທັງລະດັບຜູ້ໃຫຍ່ ແລະ ລະດັບເຍົາວະຊົນ ພວກເຂົາສົມຄວນໄດ້ເຂົ້າຮ່ວມບານໂລກ ເພາະພວກເຂົາສາມາດເຮັດຫນ້າທີ່ໃນລະດັບສູງໄດ້ດີຢ່າງສະຫມຳ່ສະເຫມີ ’’.
ກ່ອນຫນ້ານີ້ ຟຣັບປາ ເປັນຜູ້ຕັດສິນໃຈຍິງຄົນທຳອິດໃນປະຫວັດສາດທີ່ມີສ່ວນຮ່ວມໃນການແຂ່ງຂັນຊີງແຊ໊ມແຫ່ງຊາດຢູໂຣບ ໃນທົວນາເມັນຢູໂຣ 2022 ເຊິ່ງຖືກເລື່ອນມາແຂ່ງປີ 2021 ແລະ ເຈົ້າຍັງເຄີຍຜ່ານການຕັດສິນເກມໃນຢູຟາແຊ໊ມປຽນ ລີກ ມາແລ້ວນຳອີກ.
