ເສດຖີຫວຽດນາມ ມອບເງິນ ແລະ ລົດເກງ ໃຫ້ຄອບຄົວນັກກິລາບານເຕະຜູ້ທີ່ຍິງປະຕູໄຊ ໃຫ້ຫວຽດນາມຄວ້າແຊ້ມຊີເກມ ຄັ້ງທີ 31
ໜັງສືພິມ ຕີນເມີຍ ຂອງຫວຽດນາມ ລາຍງານຂ່າວວັນທີ 25 ພຶດສະພາ 2022 ວ່າ: ພາຍຫລັງຊີເກມຄັ້ງທີ 31 ທີ່ຫວຽດນາມ ເປັນເຈົ້າພາບຈົບລົງ, ເສດຖີເງິນຕື້ ຫວຽດນາມ ທ່ານ ຟາມຍຶດເວືອງ ນອກຈາກທ່ານໄດ້ມອບລົດເກງໃຫ້ຄູຝຶກ ແລະ ລົດຈັກໃຫ້ກັບທັບນັກກີລາບານເຕະຍິງຜູ້ລະຄັນ ພ້ອມທັງມອບເງິນເປັນຂອງຂວັນລວມໃຫ້ທິມຊາດຍິງ ແລະ ນັກກິລາທີ່ຍາດໄດ້ຫລຽນຄຳ, ຫລຽນເງິນ ແລະ ຫລຽນທອງ ໃນວັນທີ 24 ພຶດສະພາ 2022 ທີ່ຜ່ານມາເປັນເງິນທັງໝົດ 3 ຕື້ກ່ວາດົງ ແລ້ວ ແລະ ໃນຕອນບ່າຍວັນທີ 25 ພຶດສະພາ 2022 ນີ້, ທ່ານ ຟາມຍຶດເວືອງ ຍັງໄດ້ມອບລົດເກງຍີ່ຫໍ້ VinFαᵴt Lᴜҳ A2.0 ມູນຄ່າ 1,35 ຕື້ດົງ ພ້ອມເງິນສົດ 5 ຕື້ດົງ ໃຫ້ຄອບຄົວນັກກິລາ ເຍິມແມັງຢຸງ ຜູ້ທີ່ຍິງປະຕູໄຊໃຫ້ກັບທິມຊາດຫວຽດນາມເອົາຊະນະທິມຊາດໄທ ໃນການແຂ່ງຂັນຊີງຫລຽນຄຳ ບານເຕະຊີເກມຄັ້ງທີ 31 ທີ່ຫວຽດນາມ ຕື່ມອີກ ທັງນີ້ກໍ ເພື່ອບັນເທົາທຸກຊ່ວຍຄອບຄົວຂອງພວກເຂົາ.
ຄອບຄົວຂອງ ເຍິມແມັງຢຸງ ຂ້ອນຂ້າງມີຄວາມຫຍຸ້ງຍາກທາງດ້ານເສດຖະກິດ. ພໍ່ຂອງເຂົາເປັນຊາວນາ ຮັບຈ້າງໄຖນາ, ສ່ວນແມ່ເປັນກຳມະກອນ. ດັ່ງນັ້ນເພື່ອຊ່ວຍເຫລືອໃຫ້ຄອບຄົວໃຫ້ພໍຢູ່ພໍກິນ ແລະ ໃຫ້ ເຍິມແມັງຢຸງ ອຸ່ນອຽນທຸ່ນທ່ຽງ ແລະ ທຸ່ມເທເຫື່ອແຮງເຂົ້າໃນການຝຶກຊ້ອມ ເຕະບານໃຫ້ໄດ້ດີກວ່າເກົ່າ ນຳເອົາກຽດສັກສີມາໃຫ້ປະເທດຊາດຕໍ່ໄປ.
