ຫົວໃຈລົ້ມເຫລວ ກັບ 4 ສັນຍານອັນຕະລາຍ.

     ຫົວໃຈລົ້ມເຫລວ ຫລື ທີ່ເອີ້ນວ່າ Heart Failure ແມ່ນອາການທີ່ຫົວໃຈອ່ອນແຮງ ບໍ່ສາມາດຟອກເລືອດໄປລ້ຽງພາກສ່ວນຕ່າງໆຂອງຮ່າງກາຍໄດ້ຢ່າງເປັນປົກກະຕິ ເນື່ອງຈາກຫົວໃຈມີການບີບໂຕ ຫລື ຄາຍໂຕທີ່ຜິດປົກກະຕິ ບາງເທື່ອຫົວໃຈມີຂະໜາດໃຫຍ່ ຫລື ໜາກ່ວາປົກກະຕິ.

    + ສາເຫດຂອງອາການຫົວໃຈລົ້ມເຫລວ ເກີດໄດ້ຈາກ :

• ພະຍາດຫລອດເລືອດຫົວໃຈຕີບ ຫລື ກ້າມຊີ້ນຫົວໃຈຂາດເລືອດ.
• ຄວາມດັນເລືອດສູງ.
• ລີ້ນຫົວໃຈຮົ່ວ ຫລື ລີ້ນຫົວໃຈຕີບ.
• ກ້າມຊີ້ນຫົວໃຈພິການ ຫລື ບົກພ່ອງ.
• ກ້າມຊີ້ນຫົວໃຈອັກເສບ.
• ການຕິດເຊື້ອຂອງກ້າມຊີ້ນຫົວໃຈ ຫລື ລີ້ນຫົວໃຈ.
• ຫົວໃຈພິການແຕ່ກຳເນີດ.
• ກ້າມຊີ້ນຫົວໃຈອ່ອນແຮງຈາກສານພິດຕ່າງໆ ເຊັ່ນ : ການດື່ມເຫລົ້າ ຫລື ເສບຢາເສບຕິດ.
• ກຳມະພັນ.
• ພະຍາດເນື້ອເຍື່ອກ່ຽວຂ້ອງ.
• ພະຍາດຕ່ອມບໍ່ມີທໍ່.

+ ສາເຫດທີ່ສຳຄັນທີ່ສົ່ງຜົນໃຫ້ຄົນປ່ວຍມີອາການຫົວໃຈລົ້ມເຫລວຮຸນແຮງຫລາຍຍິ່ງຂຶ້ນ ເກີດໄດ້ຈາກ :

• ກິນອາຫານເຄັມຫລາຍ ຫລື ອາຫານທີ່ມີໂຊດຽມຫລາຍ.
• ດື່ມນຳ້ຫລາຍເກີນໄປ (ຫລາຍກ່ວາທີ່ຍ່ຽວອອກຈາກຮ່າງກາຍ).
• ກິນຢາທີ່ບໍ່ສະໝໍ່າສະເໝີ.
• ອາການຫົວໃຈເຕັ້ນຜິດຈັງຫວະ.
• ອາການກ້າມຊີ້ນຫົວໃຈຂາດເລືອດ.
• ກິນຢາກຸ່ມ NSAIDS.
• ໄທຣອຍເປັນພິດ.
• ຕິດເຊື້ອໃນຮ່າງກາຍ.
• ຂີ້ໝາກເຫລືອງ ຫລື ເລືອດຈາງ.

+ ອາການຂອງຫົວໃຈລົ້ມເຫລວ ມັກຈະມີອາການດັ່ງນີ້ :

• ເມື່ອຍງ່າຍ ຫລື ຫອບ, ນອນຫງາຍບໍ່ໄດ້,​ ຕ້ອງໝູນໝອນຕື່ມ ຫລື ນັ່ງຫລັບ, ສະເດີດຕື່ນມາຕອນກາງຄືນ ຍ້ອນອຶດອັດຫາຍໃຈລຳບາກ.
• ບວມຂໍ້ຕີນ ແລະ ໜ້າແຂ່ງ.
• ນຳ້ໜັກໂຕເພີ່ມຂຶ້ນຢ່າງໄວວາ ຫລາຍກ່ວາ 2 ກິໂລກຣາມໃນ 2 ວັນ.
• ອ່ອນເພຍ, ບໍ່ມີແຮງ, ປຸ້ນທ້ອງປວດຮາກ, ເບື່ອອາຫານ ແລະ ຍື່ງທ້ອງ.

+ ວິທີປ້ອງກັນອາການຫົວໃຈລົ້ມເຫລວ : ຜູ້ປ່ວຍຄວນເບິ່ງແຍງ ແລະ ຄວບຄຸມປັດໄຈສ່ຽງເພື່ອປ້ອງກັນບໍ່ໃຫ້ຫົວໃຈລົ້ມເຫລວຮຸນແຮງຫລາຍຂຶ້ນ ໂດຍການປັບປ່ຽນພຶດຕິກຳຕົນເອງ ດັ່ງນີ້ :

• ຊັ່ງນຳ້ໜັກທຸກມື້ ກ່ອນກິນເຂົ້າເຊົ້າທຸກມື້ ຫລື ພາຍຫລັງເຂົ້າຫ້ອງນຳ້ຂັບຖ່າຍແລ້ວໃນຕອນເຊົ້າ ແລະ ຈົດບັນທຶກນຳ້ໜັກເພື່ອຊ່ວຍປະເມີນຕົນເອງ.
• ດື່ນນຳ້ໃນປະລິມານທີ່ເໝາະສົມ ຕາມແຜນການປິ່ນປົວຂອງແພດ.
• ຫລີກເວັ້ນອາຫານທີ່ມີລົດຊາດຫວານ, ມັນ, ເຄັມ, ຈຳກັດປະລິມານໂຊດຽມທີ່ກິນຕໍ່ມື້.
• ອອກກຳລັງກາຍຢ່າງສະໝໍ່າສະເໝີຢ່າງພໍດີ ອາດເລີ່ມຈາກການອອກກຳລັງກາຍເບົາໆ ເຊັ່ນ : ຍ່າງອອກກຳລັງກາຍ ຫາກເມື່ອຍຫອບ ຄວນຢຸດພັກທັນທີ.
• ງົດການສູບຢາ ຫລື ການດື່ມອານກໍຮໍທຸກປະເພດ ເພາະສານພິດໃນຢາສູບຈະສົ່ງຜົນໃຫ້ເສັ້ນເລືອດຫົວໃຈຕີບ ແລະ ເຄື່ອງດື່ມອານກໍຮໍ ເຮັດໃຫ້ການບີບໂຕຂອງຫົວໃຈຫລຸດລົງ.
• ກິນຢາຢ່າງສະໝໍ່າສະເໝີ.
• ຕາມຄຳແນະນຳຂອງທ່ານໝໍ,​ ໄປພົບທ່ານໝໍຕາມນັດທຸກເທື່ອ.
• ຄວນໄດ້ຮັບວັກຊີນປ້ອງກັນໄຂ້ຫວັດໃຫຍ່ປະຈຳປີໃນກໍລະນີບໍ່ມີຂໍ້ຫ້າມ.
• ຜູ້ປ່ວຍຄວນສັງເກດອາການຕົນເອງ ຫາກພົບວ່າມີອາການຜິດປົກກະຕິ ຄວນຮີບໄປພົບທ່ານໝໍທັນທີ ປ້ອງກັນຄວາມຮຸນແຮງຂອງພະຍາດ ແລະ ນຳໄປສູ່ການປິ່ນປົວທີ່ຖືກວິທີ ເພື່ອຮັກສາຊີວິດຜູ້ປ່ວຍໄດ້ຢ່າງປອດໄພ.