ແຕ່ງຕັ້ງ-ສັບປ່ຽນໜ້າທີ່ພະນັກງານສານປະຊາຊົນສູງສຸດ ຫລາຍຕຳແໜ່ງ

ພິທີປະກາດແຕ່ງຕັ້ງ ແລະ ສັບປ່ຽນບ່ອນປະຈໍາການຂອງພະນັກງານສານປະຊາຊົນສູງສຸດ ໄດ້ມີຂຶ້ນເມື່ອວັນທີ 2 ກັນຍາ 2022 ຜ່ານມາ, ໂດຍການເປັນປະທານຂອງ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸງ.

ເຊິ່ງໄດ້ຕົກລົງແຕ່ງຕັ້ງ ທ່ານ ສຸດາວັນ ພັນພົນດີ ຜູ້ພິພາກສາຊັ້ນສີ່ ຄະນະສານແພ່ງ ເປັນຮອງຫົວໜ້າຄະນະສານແພ່ງຂອງສານປະຊາຊົນສູງສຸດ, ທ່ານ ໂພເງິນ ຈັນທະນະຄອນ ຜູ້ພິພາກສາຊັ້ນສີ່ ເປັນຮອງຫົວໜ້າຄະນະສານການຄ້າ ຂອງສານປະຊາຊົນສູງສຸດ, ທ່ານ ບົວຄ່ອງ ເພັງສີຫາພັດ ຜູ້ພິພາກສາຊັ້ນສີ່ຄະນະສານແຮງງານ ເປັນຮອງຫົວໜ້າຄະນະສານອາຍາຂອງສານປະຊາຊົນສູງສຸດ, ທ່ານ ອັກສອນສິນ ວິໄຊຍະໄລ ຜູ້ພິພາກສາຊັ້ນສາມ ຄະນະສານອາຍາ ເປັນຜູ້ຮັກສາການຫົວໜ້າກົມແຜນການ ແລະ ການຮ່ວມມືກັບຕ່າງປະເທດ ຂອງສານປະຊາຊົນສູງສຸດ, ທ່ານ ແສງແກ້ວ ພິລະພົນເດດ ຫົວໜ້າຫ້ອງການ ເປັນຫົວໜ້າກົມຄຸ້ມຄອງວິຊາການ ແລະ ສະຖິຕິສານ ຂອງສານປະຊາຊົນສູງສຸດ, ທ່ານ ທິບພະສອນ ລາດວົງໄຊ ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມ ເປັນ ຫົວໜ້າຫ້ອງການຂອງສານປະຊາຊົນສູງສຸດ, ທ່ານ ກັ້ງ ເຕັມສົມບັດ ຫົວໜ້າກົມແຜນການ ແລະ ການຮ່ວມມືກັບຕ່າງປະເທດ ເປັນຫົວໜ້າສະຖາບັນຄົ້ນຄວ້າ ແລະ ຝຶກອົບຮົມສານປະຊາຊົນສູງສຸດ, ທ່ານ ນາງ ຈັນໄທ ໄຊຍະວົງ ຮອງຫົວໜ້າຫ້ອງການ ເປັນຮອງຫົວໜ້າກົມແຜນການ ແລະ ການຮ່ວມມືກັບຕ່າງປະເທດຂອງສານປະຊາຊົນສູງສຸດ ແລະ ທ່ານ ສາກົນ ໄຊຍະລາດ ຮອງຫົວໜ້າກົມຈັດຕັ້ງ-ພະນັກງານ ສານປະຊາຊົນສູງສຸດ ເປັນ ຮອງຫົວໜ້າຫ້ອງການສານປະຊາຊົນສູງສຸດ.

ໃນພິທີ, ທ່ານ ປະທານສານປະຊາຊົນສູງສຸງ ໄດ້ເນັ້ນໃຫ້ພະນັກງານທີ່ໄດ້ຮັບການແຕ່ງຕັ້ງ ແລະ ສັບປ່ຽນບ່ອນປະຈຳການ ຈົ່ງສືບຕໍ່ນໍາພາປັບປຸງແບບແຜນວິທີນໍາພາຂອງຄະນະໜ່ວຍພັກ, ການແບ່ງງານ, ແບ່ງຄວາມຮັບຜິດຊອບພາຍໃນຄະນະໜ່ວຍພັກຢ່າງຈະແຈ້ງ, ຂາດຕົວ; ນໍາພາ-ຊີ້ນໍາຕາມແຜນການ, ຈຸດສຸມ, ຄາດໝາຍທີ່ກໍານົດໄວ້, ພ້ອມທັງມີການຕິດຕາມກວດກາ, ປະເມີນຜົນ, ມີການສະຫຼຸບ, ຖອດຖອນບົດຮຽນ, ສ່ອງແສງລາຍງານ, ເສີມຂະຫຍາຍຫົວຄິດປະດິດສ້າງຂອງບັນດາສະຫາຍສະມາຊິກພັກ ຕາມຫຼັກການສຽງສ່ວນໜ້ອຍຂຶ້ນກັບສຽງສ່ວນຫຼາຍ, ບຸກຄົນຂຶ້ນກັບການຈັດຕັ້ງເມື່ອຕົກລົງເປັນມະຕິແລ້ວຕ້ອງປະຕິບັດຕາມມະຕິຢ່າງເຂັ້ມງວດ; ພ້ອມທັງ, ສືບຕໍ່ປັບປຸງແກ້ໄຂເຮັດໃຫ້ການຫັນປ່ຽນຢ່າງແຂງແຮງ ແລະ ເລິກເຊິ່ງທຸກຂອດຂອງພະນັກງານ ແລະ ປັບປຸງກົງຈັກການຈັດຕັ້ງຕາມທິດກະທັດຮັດ, ໂປ່ງໃສ, ເຂັ້ມແຂງ, ມີປະສິດພາບ ແລະ ສິດທິຜົນສູງຂຶ້ນ.