ກຳເນີດດາວດວງໃໝ່! ຣິໂກ້ ລູອິສ ແຈ້ງເກີດກັບ ແມນ ຊິຕີ້ ສ້າງສະຖິຕິໃນ UCL
ຣິໂກ້ ລູອິສ ກອງຫລັງຮີມເສັ້ນທາງຂວາຂອງ ແມນເຊັສເຕີ ຊິຕີ້ ສ້າງໄດ້ຢ່າງຍິ່ງໃຫຍ່ໃຫ້ກັບຕົນເອງ ຫລັງຈາກທີ່ຖືກສົ່ງລົງເປັນໂຕຈິງໃນເກມ ແຊ້ມປ້ຽນລີກ ນັດເປີດບ້ານເອົາຊະນະ ເຊບີຍາ 3-1 ເມື່ອວັນພຸດທີ 2 ພະຈິກທີ່ຜ່ານມາ ແລະ ສ້າງສະຖິຕິໃນລາຍການໄດ້ສຳເລັດ
ລູອິສ ອາຍຸ 17 ປີ ຍິງປະຕູຕັ້ງແຕ່ເກມເປີດສະໜາມຖ້ວຍໃຫຍ່. ໂດຍລາວຍິງຕີສະເໝີໃຫ້ກັບທີມ 1-1 ໃນເຄິ່ງເວລາຫລັງຈາກຈັງຫວະທີ່ ຈູລຽນ ອັນວາເຣສ ກອງໜ້າຊາວອາເຈນຕິນາ ແທງບານຜ່ານໃຫ້ຫລຸດເຂົ້າໄປຍິງປະຕູ
ຈາກຜົນງານດັ່ງກ່າວ ມີການເປີດເຜີຍວ່າກອງຫລັງທີມຊາດອັງກິດທີ່ເຂົ້າມາຢູ່ກັບເຮືອໃບສິຟ້າຕັ້ງແຕ່ ອາຍຸ 8 ປີ ໄດ້ກາຍເປັນຜູ້ຫລິ້ນຂອງ ພຣີເມຍລີກ ອາຍຸນ້ອຍທີ່ສຸດທີ່ຍິງໃນເກມແຊ້ມປ້ຽນລີກໄດ້ສໍາເລັດ
ຂະນະດຽວກັນ ລູອິສ ຍັງໄດ້ທຳລາຍສະຖິຕິຂອງ ຄາຣິມ ເບນເຊມ່າ ທີ່ລາວເຄີຍເຮັດໄວ້ກັບ ລີຢົງ ໂດຍກາຍເປັນນັກເຕະອາຍຸນ້ອຍທີ່ສຸດທີ່ຍິງປະຕູໃນການແຂ່ງຂັນໄດ້ນັບແຕ່ນັດທຳອິດທີ່ລົງເປັນໂຕຈິງໃນໄວ 17 ປີ 346 ວັນ ໂດຍກອງໜ້າຊາວຝຣັ່ງ ເຄີຍສ້າງສະຖິຕິໄວ້ທີ່ 17 ປີ 352 ໃນເກມກັບ ໂຣເຊນບັອກ ປີ 2005
ນອກນັ້ນຍັງບໍ່ພໍ ລູອິສ ຍັງເປັນນັກເຕະຄົນທີ 2 ຂອງເມືອງຜູ້ດີ ຫລັງຈາກ ຈູດ ເບລິງແຮມ ທີ່ຍິງປະຕູໃນໄດ້ເກມແຊ້ມປ້ຽນລີກ ກ່ອນທີ່ຈະມີອາຍຸ 18 ປີເຊັ່ນດຽວກັນ
