ກຽມແບນຍາວ! ເອຟເອຕັ້ງຂໍ້ຫາ ມິໂຕຣວິດ ພຶດຕິກຳບໍ່ເໝາະສົມ
ສະມາຄົມບານເຕະອັງກິດໄດ້ຕັ້ງຂໍ້ຫາກອງໜ້າຊາວເຊີເບຍຈາກ ຟູແລັມ ເຊິ່ງໄດ້ມີການຕຳຜູ້ຕັດສິນໃນເກມ FA Cup ໃນທ້າຍອາທິດທີ່ຜ່ານມາ ແລະ ອາດຈະຖືກຫ້າມເກີນກວ່າ 3 ນັດ.
ກອງໜ້າໄວ 28 ປີ ຖືກໄລ່ອອກໃນນັດທີ່ ຟູແລັມ ເສຍໃຫ້ ແມນເຊັສເຕີ ຢູໄນເຕັດ 3-1 ເມື່ອວັນອາທິດທີ່ຜ່ານມາ ຈາກການໃຊ້ແຂນຍູ້ຜູ້ຕັດສິນ ຕອນທີ່ຕັດສິນໃຫ້ທີມເສຍຈຸດໂທດໃນນາທີ 72 ຂອງການແຂ່ງຂັນ.
ນັກເຕະຂອງ ຟູແລັມ ບໍ່ພໍໃຈກັບການຕັດສິນໃຈທີ່ມອບຈຸດໂທດໃຫ້ກັບ ແມນ ຢູໄນເຕັດ ແລະ ໄລ່ ວິນລ້ຽມ ອອກຈາກສະໜາມທີ່ປັດລູກຍິງອອກໜ້າຈາກປະຕູ. ເມື່ອລວມກັບໃບແດງຂອງ ມິໂຕຣວິດ ແລ້ວພວກເຂົາມີຜູ້ຫລິ້ນພຽງແຕ່ 9 ໃນສະຫນາມ.
ນອກຈາກ ມິໂຕຣວິດ ແລະ ວິນລ້ຽມ ແລ້ວ, ມາໂກ ຊິລວາ ຫົວໜ້າຄູຝຶກຂອງທີມກໍ່ເປັນອີກຄົນໜຶ່ງທີ່ຖືກໄລ່ອອກໃນຂະນະນັ້ນ ແລະ ທັງຫມົດທີ່ຖືກຕັ້ງຂໍ້ຫາຈາກ FA ໃນເວລານີ້.
ໃນຖະແຫລງການຂອງ ສະມາຄົມກິລາບານເຕະອັງກິດໄດ້ປະກາດຢ່າງຈະແຈ້ງວ່າ ປົກກະຕິແລ້ວການຫ້າມລົງສະໜາມມີພຽງສາມນັດສຳລັບໃບແດງ ແມ່ນອາດຈະບໍ່ພຽງພໍສໍາລັບການກະທໍາຂອງ ມິໂຕຣວິດ ໃນເກມດັ່ງກ່າວ. ແລະ ມີການຄາດວ່າຈະມີການລົງໂທດຢ່າງຮຸນແຮງຕໍ່ກໍລະນີນີ້. ເພື່ອປ້ອງກັນບໍ່ໃຫ້ເກີດເຫດການແບບນີ້ອີກໃນຕໍ່ໜ້າ.
