ເຊວຊີ ລັອກເປົ້າຄວ້າ ອັລເດສ ເປເຣຍຣ່າ ຮ່ວມທີມແທນ ເມສັນ ເມົ້າ ທີ່ມີແວວອຳລາ ຫລັງຈົບລະດູການນີ້

“ສິງບຣູ” ເຊວຊີ ເລີ່ມຊອກຫາຕົວແທນຂອງ ເມສັນ ເມົ້າ ໂດຍຫລ້າສຸດມີຂ່າວຕັ້ງເປົ້າໝາຍໃສ່ອະດີດດາວເຕະຂອງ ແມນເຊສເຕີ ຢູໄນເຕັດ ອັລເດສ ເປເຣຍຣ່າ ທີ່ສະແດງຟອມໄດ້ດີເລີດກັບ ຟູແລັມ ໃນລະດູການນີ້ ແຕ່ອາດຈະຕ້ອງຍາດຊີງກັບ 2 ສະໂມສອນດັງ.

ເຊວຊີ ສະໂມສອນເສດຖີແຫ່ງພຣີເມຍລີກ ຕົກເປັນຂ່າວສົນໃຈທີ່ຈະເຊັນສັນຍາກັບ ອັລເດສ ເປເຣຍຣ່າ ກອງກາງຂອງ ຟູແລັມ ໂດຍຫວັງໃຫ້ມາທົດແທນ ເມສັນ ເມົ້າ ກອງກາງເລືອດຜູ້ດີທີ່ມີແນວໂນ້ມຈະອອກຈາກ ສະແຕມຟອດບຣິດ ໃນຊ່ວງລະດູຮ້ອນນີ້, ອີງຕາມການລາຍງານຈາກ ESPN, ສື່ກິລາຊັ້ນນໍາຂອງໂລກ ໃນວັນຈັນ 20 ມີນາ ທີ່ຜ່ານມາ.

ເຊື່ອກັນວ່າ ເມົ້າ ຈະຖືກ ເຊວຊີ ຂາຍເພື່ອເອົາເງິນໃຫ້ກັບສະໂມສອນໃນຕອນທ້າຍຂອງລະດູການນີ້. ເພາະປັດຈຸບັນລາວມີສັນຍາກັບຕົ້ນສັງກັດພຽງແຕ່ເຖິງລະດູຮ້ອນຂອງປີຫນ້າເທົ່ານັ້ນ ແລະ ບໍ່ມີວີ່ແວວທີ່ຈະເຊັນສັນຍາໃຫມ່.