ກະຊວງການຕ່າງປະເທດສະຫລຸບວຽກງານຊາວໜຸ່ມ ປະຈໍາປີ 2022
March 21, 2023 - 4:29 PM
ວັນທີ 20 ມີນາ 2023 ນີ້, ກະຊວງການຕ່າງປະເທດ ຈັດກອງປະຊຸມສະຫລຸບວຽກງານຊາວໜຸ່ມປະຈໍາປີ 2022 ແລະ ກໍານົດທິດທາງແຜນການປີ 2023 ໂດຍການເປັນປະທານ ຂອງ ສະຫາຍ ສະເຫລີມໄຊ ກົມມະສິດ ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ໂດຍມີ ສະຫາຍ ມອນໄຊ ລາວມົວຊົ່ງ, ກຳມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີຄະນະພັກກະຊວງ, ເລຂາໜ່ວຍພັກ ແລະ ຕາງໜ້າໜ່ວຍພັກ ຈາກຫ້ອງການ ແລະ ພ້ອມດ້ວຍສະມາຊິກຊາວໜຸ່ມ ຈາກບັນດາກົມຂອງກະຊວງການຕ່າງປະເທດ ເຂົ້າຮ່ວມ.
ໃນກອງປະຊຸມ, ສະຫາຍ ນາງ ມຸກດາວັນ ສີສຸລິດ ເລຂາຄະນະບໍລິຫານງານຊາວໜຸ່ມກະຊວງການຕ່າງປະເທດ ໄດ້ຜ່ານບົດສະຫລຸບການເຄື່ອນໄຫວວຽກງານຊາວໜຸ່ມ ປະຈໍາປີ 2022 ເຊິ່ງຍົກໃຫ້ເຫັນເຖິງບັນດາຜົນງານພົ້ນເດັ່ນ ແລະ ບາງດ້ານທີ່ຕ້ອງໄດ້ເອົາໃຈໃສ່ໃນການເຄື່ອນໄຫວໃນໄລຍະຜ່ານມາ ໂດຍສະເພາະ ການລົງເລິກດ້ານການເມືອງ-ແນວຄິດ ຕໍ່ສະມາຊິກຊາວໜຸ່ມ ໃນໄລຍະທີ່ມີສະພາບຄວາມຫຍຸ້ງຍາກດ້ານເສດຖະກິດ ທີ່ສົ່ງຜົນກະທົບທາງກົງ ແລະ ທາງອ້ອມ ຕໍ່ການດໍາລົງຊີວິດຂອງສະມາຊິກຊາວໜຸ່ມ ໃນປັດຈຸບັນ. ພ້ອມນັ້ນ, ຍັງໄດ້ກໍານົດທິດທາງແຜນການ ເຄື່ອນໄຫວວຽກງານຊາວໜຸ່ມ ປະຈໍາປີ 2023 ເຊິ່ງຕິດພັນກັບບັນດາໂຄງການ, ແຜນງານ ທີ່ຄະນະບໍລິຫານງານຊາວໜຸ່ມ ຄັ້ງທີ XI ໃຫ້ສໍາເລັດຕາມລໍາດັບຄາດໝາຍທີ່ວາງໄວ້.
ໃນໂອກາດດຽວກັນ, ກອງປະຊຸມ ໄດ້ຈັດພິທີມອບ-ຮັບຫລຽນກາລະນຶກ 65 ປີ ຄຊປປລ ແລະ ຫລຽນຊາວໜຸ່ມຕະລຸມບອນ ໃຫ້ແກ່ຄະນະພັກ-ຄະນະນໍາກະຊວງການຕ່າງປະເທດ ໂດຍໃຫ້ກຽດມອບໂດຍ ສະຫາຍ ມອນໄຊ ລາວມົວຊົ່ງ ກຳມະການສໍາຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ. ນອກນັ້ນ, ຍັງໄດ້ມີພິທີມອບ-ຮັບ ໃບຢັ້ງຢືນ 4 ບຸກ ໃຫ້ແກ່ບັນດາໜ່ວຍຊາວໜຸ່ມອ້ອມຂ້າງກະຊວງ ຈໍານວນ 17 ໜ່ວຍ ແລະ ໃບຍ້ອງຍໍຊາວໜຸ່ມຕົວແບບ ໃຫ້ແກ່ສະມາຊິກຊາວໜຸ່ມກະຊວງການຕ່າງປະເທດ ຈໍານວນ 21 ສະຫາຍ, ຍິງ 9 ສະຫາຍ ໂດຍໃຫ້ກຽດມອບໂດຍ ສະຫາຍ ສະເຫລີມໄຊ ກົມມະສິດ ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ.
ໃນຕອນທ້າຍ, ສະຫາຍ ສະເຫລີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ຜົນງານອັນດີເດັ່ນ ໃນການປະຕິບັດວຽກງານຊາວໜຸ່ມ ໃນໄລຍະ 1 ປີຜ່ານມາ, ເຫັນໄດ້ວ່າ ຄະນະບໍລິຫານງານຊາວໜຸ່ມກະຊວງ ຍາມໃດກໍໄດ້ເອົາໃຈໃສ່ນຳພາ-ຊີ້ນຳສະມາຊິກຊາວໜຸ່ມຂອງຕົນ ໃຫ້ມີຄວາມຕື່ນຕົວສູງໃນການປະຕິບັດໜ້າທີ່ວຽກງານ ກໍຄື ການປະກອບສ່ວນຢ່າງຕັ້ງໜ້າປະຕິບັດສຳເລັດໜ້າທີ່ການເມືອງທີ່ ຄະນະພັກ-ຄະນະນຳກະຊວງ ວາງອອກ. ຄຽງຄູ່ກັນນັ້ນ, ຍັງສະແດງຄວາມຊົມເຊີຍ ບັນດາໜ່ວຍຊາວໜຸ່ມອ້ອມຂ້າງກະຊວງການຕ່າງປະເທດ ທີ່ໄດ້ສຳເລັດການຈັດກອງປະຊຸມປະເມີນຜົນ ຂໍ້ແຂ່ງຂັນວຽກງານ 4 ບຸກ. ພ້ອມນັ້ນ, ແຕ່ລະໜ່ວຍກໍໄດ້ມີການຄັດເລືອກຊາວໜຸ່ມຕົວແບບດີເດັ່ນປະຈຳໜ່ວຍ ເຊິ່ງເປັນຜູ້ທີ່ມີຄວາມຫ້າວຫັນ ໃນການປະຕິບັດໜ້າທີ່ວຽກງານ ແລະ ເປັນແບບຢ່າງທີ່ດີິໃຫ້ແກ່ສະມາຊິກຊາວໜຸ່ມໃນໜ່ວຍຂອງຕົນ, ສິ່ງດັ່ງກ່າວ ສະແດງໃຫ້ເຫັນເຖິງຄວາມເອົາໃຈໃສ່ປະຕິບັດໜ້າທີ່ການເມືອງ ໃນການປັບປຸງກົງຈັກການຈັດຕັ້ງ ກໍຄື ການກໍ່ສ້າງຄວາມເຂັ້ມແຂງທາງດ້ານແນວຄິດການເມືອງ, ການຝຶກຝົນຫລໍ່ຫລອມຮໍ່າຮຽນ, ການຈັດຕັ້ງ ແລະ ວິຊາສະເພາະ ໃຫ້ແກ່ບັນດາສະມາຊິກພາຍໃນໜ່ວຍຕົນ. ໂດຍອີງໃສ່ສະພາບລວມຂອງໂລກ ໃນປັດຈຸບັນທີ່ມີຄວາມສັບສົນ, ສະພາບການສາກົນກໍ່ຍັງສືບຕໍ່ເຄັ່ງຕຶງໃນຫລາຍພາກພື້ນ ແລະ ຜັນປ່ຽນໄປໃນທິດທາງ ທີ່ບໍ່ສາມາດຄາດຄະເນໄດ້ ໂດຍສະເພາະ ສະພາບເສດຖະກິດຂອງໂລກ ທີ່ຍັງສືບຕໍ່ມີຄວາມຫຍຸ້ງຍາກ ແລະ ກະທົບຕໍ່ການດຳລົງຊີວິດໂດຍກົງຂອງພະນັກງານ ກໍຄື ສະມາຊິກຊາວໜຸ່ມ ເຊິ່ງທັງໝົດລ້ວນແຕ່ແມ່ນສິ່ງທ້າທາຍ. ກະຊວງການຕ່າງປະເທດ ມີພາລະບົດບາດ ແລະ ໜ້າທີ່ ໃນການຈັດຕັ້ງຜັນຂະຫຍາຍແນວທາງນະໂຍບາຍການຕ່າງປະເທດຂອງ ພັກ-ລັດ ແລະ ເສີມຂະຫຍາຍບົດບາດການຮ່ວມມືກັບສາກົນໃຫ້ນັບມື້ນັບມີທ່າກ້າວຂຶ້ນເລື້ອຍໆ. ດັ່ງນັ້ນ, ຊາວໜຸ່ມກະຊວງການຕ່າງປະເທດໃນຖານະເປັນພະນັກງານຜູ້ສືບທອດ ຕ້ອງໄດ້ເອົາໃຈໃສ່ຫລາຍບັນຫາ ເປັນຕົ້ນ ຄວາມເປັນແບບຢ່າງນຳໜ້າໃນວຽກງານການຕ່າງປະເທດ, ຕັ້ງໜ້າປະຕິບັດວຽກງານ ກໍຄື ວິຊາສະເພາະຂອງຕົນດ້ວຍຄວາມຮັບຜິດຊອບສູງ ເພື່ອສາມາດປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ.
ພາບຂ່າວ: ຂປລ
