ປະທານປະເທດ ລົງຊຸກຍູ້ການຜະລິດເປັນສິນຄ້າຢູ່ເມືອງໂຂງ ເພື່ອສ້າງຖານລາຍຮັບໃຫ້ເຂັ້ມແຂງ ແລະ ຍືນຍົງ
ແຫລ່ງຂ່າວແຂວງຈຳປາສັກ ລາຍງານວ່າ: ວັນທີ 26 ມີນາ 2023, ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ພ້ອມດ້ວຍການນຳຂັ້ນສູນກາງ, ການນຳແຂວງຈຳປາສັກ ແລະ ພາກສ່ວນກ່ຽວຂ້ອງ ເຄື່ອນໄຫວຢ້ຽມຢາມກຸ່ມຜູ້ຜະລິດເຂົ້າເປັນສິນຄ້າບ້ານນາ, ຜູ້ປະກອບການລ້ຽງປານ້ຳຂອງ ບ້ານພຽງດີ ແລະ ພົບປະໂອ້ລົມປະຊາຊົນຊາວບ້ານ ໂພນສະອາດ ທີ່ເປັນເປົ້າໝາຍບ້ານພັດທະນາ ປະຊາຊົນຢູ່ດີກິນດີ ແລະ ກຸ່ມຜູ້ຜະລິດເຄື່ອງຈັກສານ ສິນຄ້າໂອດັອບ ໂດຍການຕ້ອນຮັບຂອງ ທ່ານນາງ ຄຳພູ ລິດທິສັກ ເຈົ້າເມືອງໂຂງ.
ທ່ານ ຄຳພັນ ສິດມະນີ ນາຍບ້ານໆນາ ລາຍງານວ່າ: ບ້ານນາ ປະກອບມີ 140 ຫລັງຄາເຮືອນ, ມີ 122 ຄອບຄົວ, ປະຊາຊົນປະກອບອາຊີບເຮັດນາເປັນຕົ້ນຕໍ, ຄ້າຂາຍເປັນອາຊີບສຳຮອງ, ປັດຈຸບັນ ປະຊາຊົນ ໄດ້ທຳການຜະລິດເຂົ້າເປັນສິນຄ້າສົ່ງອອກ ເພື່ອສ້າງຖານລາຍຮັບໃຫ້ເຂັ້ມແຂງ ແລະ ຍືນຍົງ ໂດຍຫັນໄປສູ່ສັງຄົມການຜະລິດ, ໄດ້ສ້າງຕັ້ງກຸ່ມການຜະລິດເຂົ້າ, ເຊິ່ງການຜະລິດເຂົ້ານາປີຜ່ານມາປະຕິບັດໄດ້ 215 ເຮັກຕາ, ຜະລິດເຂົ້າເປັນສິນຄ້າມີ 90 ເຮັກຕາ, ສາມາດຜະລິດເຂົ້າໄດ້ 335,7 ໂຕນ, ຂາຍອອກໄດ້ຮັບເງິນ 1.779 ລ້ານກວ່າກີບ, ສະເພາະການຜະລິດເຂົ້ານາແຊງປີນີ້, ມີເນື້ອທີ່ 85 ເຮັກຕາ ໂດຍສະເພາະຜະລິດເຂົ້າເປັນສິນຄ້າມີ 63 ເຮັກຕາ, ຄາດຄະເນສະມັດຕະພາບ 4,5 ໂຕນ/ເຮັກຕາ, ຄາດຄະເນຜົນຜະລິດຈະໄດ້ຮັບທັງໝົດ 283,5 ໂຕນ ແລະ ຄາດຄະເນລາຍຮັບຈາກການຂາຍເຂົ້າ 1.732 ລ້ານກີບ.
ຈາກນັ້ນ ທ່ານ ທອງລຸນ ສີສຸລິດ ພ້ອມຄະນະ ກໍໄດ້ໄປຢ້ຽມຢາມຄອບຄົວຕົວແບບ ເບິ່ງການລ້ຽງ ແລະ ຂະຫຍາຍພັນປານ້ຳຂອງ ຢູ່ບ້ານພຽງດີ ກໍຄື ຄອບຄົວທ່ານ ຄຳຈັນ ໄຊສົມບັດ ໃນສົກປີ 2017-2018 ໄດ້ລົງມືບຸກເບີກເນື້ອທີ່ຈຳນວນ 30 ເຮັກຕາໃນການເຮັດໜອງປາ ເພື່ອລ້ຽງປາ 50 ໜອງ, ໜອງສຳລັບປ່ອຍປາ 25 ໜອງ ແລະ ໜອງອະນຸບານລູກປາ 25 ໜອງ, ປັດຈຸບັນພາຍໃນໜອງມີປາທັງໝົດ 17 ສາຍພັນ ເປັນຕົ້ນ ປາເຄິງ, ປາເພ້ຍ, ປາພອນ, ປາປື່ງ, ປາຍອນ, ປາສ້ອຍ, ປາກົດ, ປາຄໍ່, ປາເຂັງ, ປາປາກ, ປາດຸກ, ປານິນ, ປາເຈລະມິດ, ປາສະຫວາຍ, ປາຕອງ, ປາວ່າ ແລະ ປາໂຈກ, ລວມທັງໝົດປ່ອຍແລ້ວຈຳນວນ 1 ລ້ານກວ່າໂຕ, ໄລຍະຜ່ານ ມາສາມາດນຳປາຂຶ້ນໄປຈຳໜ່າຍທັງໝົດ 12 ໂຕນ, ໂດຍການຈຳໜ່າຍທັງຕະຫລາດພາຍໃນເມືອງ ແລະ ຕ່າງແຂວງ ຈໍານວນໜຶ່ງ.
ຕອນບ່າຍວັນດຽວກັນ, ທ່ານປະທານປະເທດ ໄດ້ໄປຢ້ຽມຢາມປະຊາຊົນບ້ານໂພນສະອາດ ເຊິ່ງເປັນຊົນເຜົາປາເລົາ, ບ້ານປະກອບມີ 286 ຫລັງຄາເຮືອນ, ມີ 272 ຄອບຄົວ, ພົນລະເມືອງ 1.893 ຄົນ, ຍິງ 986 ຄົນ, ເປັນບ້ານທີ່ມີເສັ້ນທາງຫລວງແຫ່ງຊາດເລກທີ 13 ໃຕ້ຜ່ານ, ມີເນື້ອທີ່ກວ້າງຂວາງ ເໝາະໃຫ້ແກ່ການປູກຝັງ-ລ້ຽງສັດໃຫຍ່, ເໝາະສົມໃນການສ້າງເປັນເຂດທ່ອງທ່ຽວບ້ານວັດທະນະທຳຊົນເຜົ່າ, ຈາກຈຸດພິເສດ ແລະ ທ່າແຮງຫລາຍດ້ານ ເມືອງໄດ້ກຳນົດສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ ແລະ ສ້າງເປັນບ້ານພັດທະນາຢູ່ດີກິນດີ. ພິເສດ ບ້ານໂພນສະອາດ ມີສະຫະກອນຜະລິດເຄື່ອງຫັດຖະກຳຈັກສານໄມ້ປ່ອງ, ມີສະມາຊິກ 150 ຄອບຄົວ. ໃນໜຶ່ງປີຜ່ານມາ, ສາມາດຂາຍຜະລິດຕະພັນ ເປັນຕົ້ນ ຫວດ 52 ພັນໜ່ວຍ, ກະບຽນ 20 ພັນກວ່າໃບ, ກະຕ່າ 13 ພັນກວ່າໜ່ວຍ ໄດ້ຮັບເງິນທັງໝົດ 754 ລ້ານກວ່າກີບ.
