ຮອງປະທານສະພາແຫ່ງຊາດ ເນັ້ນໃຫ້ອົງການກວດສອບແຫ່ງລັດ ເອົາໃຈໃສ່ 7 ໜ້າວຽກສຳຄັນ
June 3, 2023 - 4:22 PM
ທ່ານ ສົມມາດ ພົນເສນາ ກຳມະການສູນກາງພັກ ຮອງປະທານສະພາແຫ່ງຊາດ ໄດ້ໂອ້ລົມຕໍ່ກອງປະຊຸມວຽກງານກວດສອບແຫ່ງລັດ ເມື່ອວັນທີ 2 ມິຖຸນາ ນີ້ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ຊຶ່ງມີ ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ, ມີພາກສ່ວນທີ່ກ່ຽວຂ້ອງ ແລະ ພະນັກງານເຂົ້າຮ່ວມ.
ທ່ານ ສົມມາດ ພົນເສນາ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ອົງການກວດສອບແຫ່ງລັດຍາດມາໄດ້ໃນໄລຍະຜ່ານມາ ແລະ ໄດ້ເນັ້ນໜັກໃຫ້ ອົງການກວດສອບແຫ່ງລັດ ເອົາໃຈໃສ່ໜ້າວຽກ ຄື:
1. ຕ້ອງສືບຕໍ່ເອົາໃຈໃສ່ສຶກສາອົບຮົມ-ການເມືອງແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ໃນແຕ່ລະຂັ້ນທີ່ຢູ່ໃນຄວາມຮັບຜິດຊອບໃຫ້ມີຄວາມຮັບຮູ້, ເຂົ້າໃຈ ແລະ ເປັນເອກະພາບຕໍ່ແນວທາງນະໂຍບາຍຂອງພັກ; ສ້າງການຫັນປ່ຽນຢ່າງເລິກເຊິ່ງຕໍ່ກັບພະນັກງານ ໂດຍການສ້າງແຜນບຳລຸງໃນເງື່ອນໄຂໃໝ່ຕາມທິດຫັນເປັນຄຸນນະພາບ ແລະ ດຳເນີນຂັ້ນຕອນກໍ່ສ້າງນັກກວດສອບແຕ່ລະຂັ້ນ ໃຫ້ໄດ້ຕາມຄາດໝາຍກຳນົດ;
2. ເອົາໃຈໃສ່ປັບປຸງກຳນົດຕຳແໜ່ງງານ, ປັບປຸງວຽກງານຂອງສະຖາບັນຝຶກອົບຮົມໃຫ້ມີຄຸນນະພາບ, ສ້າງນັກກວດສອບລົງເລິກສະເພາະດ້ານ, ຝຶກທັກສະ ແລະ ບົດຮຽນຕົວຈິງໃນເງື່ອນໄຂປັດຈຸບັນ; ເອົາໃຈໃສ່ຊຸກຍູ້ອົງການກວດສອບປະຈຳພາກ ປະສານສົມທົບກັບສາຍຕັ້ງ, ສາຍຂວາງ ໃນການປະກອບບຸກຄະລາກອນ, ສະຖານທີ່ ແລະ ສິ່ງອໍານວຍຄວາມສະດວກຕ່າງໆ ຊ່ວຍອົງການກວດສອບແຫ່ງລັດ;
3. ເອົາໃຈໃສ່ໃນການໂຄສະນາເຜີຍແຜ່ກົດໝາຍກວດສອບແຫ່ງລັດ ສະບັບປັບປຸງປີ 2022, ປັບປຸງບົດບັນທຶກການປະສານງານ ກັບພາກສ່ວນກ່ຽວຂ້ອງ, ຄົ້ນຄວ້າບົດແນະນຳ ກ່ຽວກັບການສ້າງບົດລາຍງານຜົນການກວດສອບ ຕໍ່ສະພາແຫ່ງຊາດ ແລະ ສະພາປະຊາຊົນປະຈຳແຂວງ-ນະຄອນຫຼວງວຽງຈັນ;
4.ເອົາໃຈໃສ່ພັດທະນາພື້ນຖານໂຄງລ່າງ ແລະ ຫັນເປັນທັນສະໄໝ ໂດຍສະເພາະການນໍາໃຊ້ລະບົບຂໍ້ມູນ-ຂ່າວສານ ເຊື່ອມຕໍ່ກັບລະບົບເຄືອຂ່າຍການຄຸ້ມຄອງງົບປະມານແຫ່ງລັດ ຂອງກະຊວງການເງິນ ເຂົ້າໃນການສ້າງແຜນການກວດສອບ ໃຫ້ມີຄວາມຊັດເຈນແຕ່ຫົວທີ, ສ້າງຂີດຄວາມສາມາດ ແລະ ພັດທະນາຊັບພະຍາກອນມະນຸດ ຢູ່ຂັ້ນສູນກາງ ແລະ ຂັ້ນປະຈໍາພາກ ໃນການນໍາໃຊ້ເຕັກໂນໂລຊີ ເຂົ້າໃນການຄຸ້ມຄອງບໍລິຫານ ແລະ ການກວດສອບ;
5. ດ້ານວຽກງານວິຊາສະເພາະໃຫ້ເອົາໃຈໃສ່ດຳເນີນການເຄື່ອນໄຫວວຽກງານກວດສອບ ປີ 2023 ໃຫ້ສຳເລັດຕາມມະຕິກອງປະຊຸມສະພາແຫ່ງຊາດຮັບຮອງ, ດຳເນີນການອອກບົດແຈ້ງຜົນການກວດສອບໃຫ້ສໍາເລັດຕາມເປົ້າໝາຍ ທີ່ໄດ້ດຳເນີນການກວດສອບກ່ອນການກວດສອບໃນຮອບປີຖັດໄປ ແລະ ຕິດຕາມຊຸກຍູ້ຢ່າງເປັນປົກກະຕິ, ເປັນລາຍໄຕມາດ ການຈັດຕັ້ງປະຕິບັດຂໍ້ແນະນຳຕາມຜົນການກວດສອບ;
6. ເອົາໃຈໃສ່ຕິດຕາມ, ກວດກາ ແລະ ຊຸກຍູ້ວຽກງານຮອບດ້ານຂອງອົງການກວດສອບແຫ່ງລັດ ແລະ ອົງການກວດສອບປະຈຳພາກ ຕາມທັດສະນະຂອງພັກທີ່ວ່າ ມີການນຳພາຕ້ອງມີການຕິດຕາມກວດກາ ເປັນຕົ້ນແມ່ນການຕິດຕາມ, ກວດກາການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ມະຕິກອງປະຊຸມໃຫຍ່ຄັ້ງທີ II ຂອງອົງຄະນະພັກອົງການກວດສອບແຫ່ງລັດ, ແຜນພັດທະນາວຽກງານກວດສອບ ແລະ ມະຕິກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃຫ້ປະກົດຜົນເປັນຈິງ;
7. ເອົາໃຈໃສ່ການສົ່ງເສີມການຮ່ວມມື ແລະ ເຊື່ອມໂຍງກັບສາກົນ ໃນກອບຫຼາຍຝ່າຍ ແລະ ອົງການຈັດຕັ້ງສາກົນ ລະດົມ ແລະ ຍາດແຍ່ງເອົາການຮ່ວມມືຊ່ວຍເຫຼືອ ເພື່ອສ້າງຄວາມເຂັ້ມແຂງໃຫ້ອົງການກວດສອບແຫ່ງລັດ.
