ສະພາກາຊາດໄທ ຊ່ວຍສ້າງສາງເຄື່ອງບັນເທົາທຸກໃຫ້ອົງການກາແດງແຫ່ງຊາດລາວ ມູນຄ່າຫລາຍກວ່າ 4 ຕື້ກີບ ທັງເສີມຂະຫຍາຍການຮ່ວມມືຢ່າງບໍ່ຢຸດຢັ້ງ
ວັນທີ 19 ມິຖຸນາ 2023 ນີ້, ໄດ້ມີພິທີມອບ-ຮັບສາງເຄື່ອງບັນເທົາທຸກອົງການກາແດງແຫ່ງຊາດລາວ ຢູ່ຫລັກ 16 ເມືອງ ໄຊທານີ ນະຄອນຫລວງວຽງຈັນ, ມອບໂດຍທ່ານ ເຕດ ບຸນນາກ ເລຂາທິການໃຫຍ່ ສະພາກາຊາດໄທ ແລະ ຮັບໂດຍແມ່ນທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ.
ສາງເກັບມ້ຽນເຄື່ອງດັ່ງກ່າວ ໄດ້ລົງມືກໍ່ສ້າງແຕ່ວັນທີ 13 ກັນຍາ 2022 ເປັນຕົ້ນ ແລະ ໄດ້ສຳເລັດໃນເດືອນພຶດສະພາ 2023 ໃຊ້ເວລາກໍ່ສ້າງຈັກ 9 ເດືອນ ໂຄງສ້າງປະກອບມີ ຂະໜາດກວ້າງ 10 ແມັດ, ຍາວ 30 ແມັດ, ລວງສູງ 5,85 ແມັດ, ເປັນໂຄງເຫລັກ, ຝາກໍ່ດ້ວຍດີນຈີ່ ຟື້ນເທດ້ວຍເປຕົງເສີມເຫລັກ ພາຍໃນອາຄານສາງປະກອບມີ ຫ້ອງສາງມ້ຽນເຄື່ອງ, ຫ້ອງການບັນຊີ, ຫ້ອງນໍ້າ 2 ຫ້ອງ ແລະ ທາງນອກຍັງປະກອບມີທາງຍ່າງອອ້ມອາຄານ, ຂັ້ນໄດ, ທັງລົດຂຶ້ນ=165m2 ລວມທັງໝົດ 465m2, ຮາກຖານ, ຄານດິນ ແລະ ພື້ນເປັນໂຄງສ້າງເບຕົງເສີມເຫລັກ, ເສົາດ້ວຍເຫລັກ H-BEAM ແລະ ໂຄງຫລັງຄາດ້ວຍເຫລັກກ່ອງ, ກໍ່ດ້ວຍດິນຈີ່ທັນສະໄໝ 6 ຮູ, ມຸງດ້ວຍແຜ່ນ ຊິ້ງ VXP. ນອກນັ້ນຍັງໄດ້ບຸກເບີກຖົມດິນ, ກໍ່ສ້າງຮົ້ວອ້ອມໂຄງການ,ອາຄານຈອດລົດ. ລວມມູນຄ່າທັງໝົດ 8.346.867 ບາດ ຫລື ປະມານ 4 ຕື້ກວ່າກີບ, ໂດຍການສະໜັບສະໜູນສະພາກາຊາດໄທ.
ໂອກາດນີ້, ທ່ານ ປະທານອົງການກາແດງແຫ່ງຊາດລາວ ກ່າວວ່າ: ສາງດັ່ງກ່າວຈະຊ່ວຍໃຫ້ການເກັບມ້ຽນເຄື່ອງບັນເທົາທຸກອົງການກາແດງລາວ ມີຄວາມສະດວກສະບາຍ, ຮັບປະກັນການຮັກສາເຄື່ອງໃຫ້ມີຄຸນນະພາບ ແລະ ທັງເປັນການກະກຽມເຄື່ອງແຮໄວ້ເພື່ອໃຫ້ການຊ່ວຍເຫລືອໃນເວລາເກີດໄພພິບັດໃຫ້ທັນກັບຄວາມຕ້ອງການ. ພ້ອມນີ້ ກໍເປັນການເສີມສ້າງສາຍພົວພັນຮ່ວມມື ຮັດແໜ້ນຄວາມສາມັກຄີ ລະຫວ່າງບ້ານໃກ້ເຮືອນຄຽງ ກໍຄືສອງປະເທດ ພິເສດກໍ ແມ່ນສອງອົງການ ທາງດ້ານມິນຸດສະທຳ ໃຫ້ໄດ້ຮັບການພັດທະນາຢ່າງບໍ່ຢຸດຢັ້ງ ແລະ ສະແດງຄວາມຂອບໃຈຢ່າງສູງຕໍ່ສະພາກາຊາດໄທ ທີ່ເຫັນຄວາມສຳຄັນຕໍ່ການຊ່ວຍເຫລືອບັນເທົາທຸກໃຫ້ ສປປ ລາວ ໃນການເສີມຂະຫຍາຍການຮ່ວມມືຢ່າງບໍ່ຢຸດຢັ້ງ.
