ເລື່ອງເດັກນ້ອຍ… ໃຜວ່າມັນນ້ອຍ ?
ໂດຍ: ວິເສດ ສະແຫວງສຶກສາ
ສຸພາສິດສອນໃຈທີ່ພວກເຮົາເຄີຍໄດ້ຟັງຈົນໄນ່ຫູກ່ຽວກັບການລ້ຽງດູລູກເຕົ້າໃຫ້ເປັນຄົນດີນັ້ນກໍຄື “ໄມ້ແກ່ກາຍຍາມເບັດ ເຫັດແກ່ກາຍຍາມແກງ” ຖ້າຈະອົບຮົມບົ່ມເພາະເດັກ ກໍຕ້ອງເຮັດເວລາເຂົາຍັງຢູ່ໃນອາຍຸໄວເດັກ, ຍັງເປັນເຈ້ຍຂາວບໍລິສຸດ. ສຸພາສິດນີ້ມີຄວາມໝາຍກວ້າງໄກ ແລະ ມີລັກສະນະສາກົນ. ທຸກໆປະເທດຕ່າງກໍຈັບເອົາຍ່ານໄວເດັກເປັນຈຸດເລີ່ມຕົ້ນສ້າງຄົນ ເພື່ອໃຫ້ເປັນຮຸ່ນສືບທອດຕາມເປົ້າໝາຍທີ່ຢາກໃຫ້ເປັນ ເຊັ່ນຢູ່ ອິນໂດເນເຊຍ ນັ້ນກໍມີຂ່າວອອກມາຫວ່າງບໍ່ເຫິງນີ້ວ່າ: ທາງກະຊວງສະຫວັດດີການສັງຄົມຂອງປະເທດນີ້ໄດ້ຕັ້ງສູນພັກຟື້ນ ເພື່ອລຶບລ້າງແນວຄິດຫົວຮຸນແຮງຂອງເດັກຂຶ້ນ ແນໃສ່ປ້ອງກັນບໍ່ໃຫ້ເດັກໆຕົກເປັນເຫຍື່ອການໂຄສະນາຊວນເຊື່ອຈາກກຸ່ມຫົວຮຸນແຮງທີ່ມີການພົວພັນກັບກຸ່ມລັດອິດສະລາມ ຫຼື ໄອເອັດສ໌ (IS). ອິນໂດເນເຊຍ ເປັນປະເທດທີ່ມີພົນລະເມືອງຫຼາຍເປັນອັນດັບທີ 4 ຂອງໂລກ ແລະ ຜູ້ເຊື່ອຖືສາສະໜາອິດສະລາມຫຼາຍເປັນທີໜຶ່ງຂອງໂລກ. ໃນຊຸມປີຫຼັງມານີ້, ອິດທິພົນຈາກກຸ່ມຫົວຮຸນແຮງໄດ້ເຊື່ອມເຂົ້າສູ່ສັງຄົມອິນໂດເນເຊຍຫຼາຍຂຶ້ນ. ຜູ້ທີ່ໄດ້ຮັບຜົນກະທົບແຮງກໍແມ່ນກຸ່ມຄົນໃນໄວໜຸ່ມຜ່ານສື່ສັງຄົມອອນລາຍ ແລະ ຜູ້ເປັນພໍ່ແມ່ທີ່ມີຄວາມຝັກໄຝ່ໃນອຸດົມການຂອງກຸ່ມໄອເອັດສ໌. ຂ່າວບອກວ່າ: ສູນລຶບລ້າງແນວຄິດຫົວຮຸນແຮງໄດ້ສຳເລັດຊຸດເຝິກອົບຮົມ “ຂ້າພະຍາດເພື່ອກອບກູ້ເອົາຄົນ” ຊຸດທຳອິດ ໂດຍມີຜູ້ເຂົ້າຮ່ວມຈຳນວນ 161 ຄົນ ເຊິ່ງລວມມີເດັກນ້ອຍ 75 ຄົນ. ໃນຈຳນວນຜູ້ເຂົ້າຮ່ວມທັງໝົດນັ້ນ ຈຳນວນໜຶ່ງຫາກໍກັບຄືນຈາກປະເທດຊີຣີ (ສະຖານທີ່ຈຸດສຸມຂອງກຸ່ມໄອເອັດສ໌) ແລະ ອີກຈຳນວນໜຶ່ງຢູ່ໃນໄລຍະກຽມພ້ອມຈະເດີນທາງໄປເຂດຕາເວັນອອກກາງ. ສູນພັກຟື້ນເພື່ອລຶບລ້າງແນວຄິດຫົວຮຸນແຮງໃນກຸ່ມໄວເດັກນີ້ໄດ້ມີການຮ່ວມມືກັນລະຫວ່າງກະຊວງສະຫວັດດີການສັງຄົມ, ກະຊວງກິດຈະການສາສະໜາ, ສຳນັກງານແຫ່ງຊາດເພື່ອຕ້ານການກໍ່ການຮ້າຍ, ກອງບັນຊາການຕຳຫຼວດແຫ່ງຊາດຕ້ານການກໍ່ການຮ້າຍ ແລະ ຄະນະກຳມະການປົກປ້ອງເດັກນ້ອຍຂອງອິນໂດເນເຊຍ. ໃນປີ 2016 ທາງການອິນໂດເນເຊຍ ໄດ້ດຳເນີນການສຳຫຼວດທົ່ວປະເທດ ແລະ ພົບວ່າ 77% ຂອງຊາວອິນໂດເນເຊຍທີ່ນັບຖືສາສະໜາອິດສະລາມ ຫຼື ເທົ່າໆກັບ 11,5 ລ້ານຄົນນັ້ນ ຕົກຢູ່ໃນຄວາມສ່ຽງຖືກຄອບງຳໂດຍແນວຄິດຫົວຮຸນແຮງ ໂດຍພວກນີ້ກຽມພ້ອມຈະນຳໃຊ້ຄວາມຮຸນແຮງຖ້າມີຄວາມຈຳເປັນ. ສິ່ງທີ່ທາງການອິນໂດເນເຊຍມີຄວາມກັງວົນໃຈແຮງ ກໍຄືວ່າຊາວໜຸ່ມແມ່ນກຸ່ມຄົນທີ່ຍອມຮັບເອົາແນວຄິດຫົວຮຸນແຮງໄວ ແລະ ຫຼາຍທີ່ສຸດ. ການສ້າງສູນພັກຟື້ນຄືນອະນາຄົດໃຫ້ໄວໜຸ່ມທີ່ຫຼົງຜິດເຫັນກົງຈັກເປັນດອກບົວໃນອິນໂດເນເຊຍນັ້ນແມ່ນບົດຮຽນໜຶ່ງທີ່ຢັ້ງຢືນວ່າ: ການອົບຮົມບົ່ມເພາະເພື່ອປ່ຽນແປງຄົນນັ້ນຕ້ອງເຮັດແຕ່ໃນໄວເດັກໂລດຈຶ່ງຈະເກີດຜົນສູງສຸດ. ສ່ວນຢູ່ ປະເທດຍີ່ປຸ່ນ ນັ້ນ, ທາງການໄດ້ເອົາໃຈໃສ່ສະກັດກັ້ນບັນຫາການຂ້າຕົວຕາຍຂອງເດັກນັກຮຽນໃນໄລຍະໄຂສົກຮຽນໃໝ່ ເຊິ່ງປາກົດມີຂຶ້ນເປັນປະຈຳ ຍ້ອນວ່າເດັກຈຳນວນໜຶ່ງມີອາການຄຽດ ຍ້ອນຫວັ່ນວິຕົກຢ້ານຮຽນບໍ່ໄດ້ຄະແນນດີ, ຢ້ານຄົບກັບໝູ່ຄູ່ທີ່ເປັນອັນຕະພານ ແລະ ອື່ນໆ. ດັ່ງນັ້ນ ໃນປີນີ້, ເຫຼົ່າດາຣາ ແລະ ສິລະປິນ-ນັກສະແດງຈຶ່ງໄດ້ລະດົມກັນເຂົ້າມາຊ່ວຍເປັນກຳລັງໃຈໃຫ້ແກ່ນັກຮຽນຕາມໂຮງຮຽນຕ່າງໆ. ນອກນັ້ນ ທາງການຍັງໄດ້ຈັດສະຖານທີ່ສຳລັບຜ່ອນຄາຍຄວາມຄຽດໃຫ້ນັກຮຽນທີ່ມີບັນຫາທາງດ້ານຈິດໃຈ ເຊັ່ນຢູ່ນະຄອນຫຼວງໂຕກຽວ ເພິ່ນໄດ້ຈັດເຂດໜຶ່ງຂອງສວນສັດໄວ້ເພື່ອຈຸດປະສົງນີ້ໂດຍສະເພາະ. ໃຜມີບັນຫາກໍເອົາມາຄາຍຄຽດຢູ່ບ່ອນນີ້ກ່ອນ ເພື່ອບໍ່ໃຫ້ໄປເຖິງບ່ອນໂສສຸດໂສສ້ວຍດ້ວຍການຂ້າຕົວຕາຍ.
