ທຳລາຍສານເຄມີ ສານເຄມີໄຮໂດຄໍລິກອາຊີດ ແລະ ໂຊດຽມໄຊຍາໄນ 90 ກວ່າໂຕນ
ໜັງສືພິມຄວາມສະຫງົບ ລາຍງານວ່າ: ວັນທີ 17 ພະຈິກ 2023 ຜ່ານມານີ້ ຄະນະກໍາມະການ 10 ພາກສ່ວນ ໄດ້ລົງກວດກາຕິດ ຕາມການທຳລາຍສານເຄ ຈໍານວນ 93 ໂຕນ ທີ່ຖືກເຈົ້າໜ້າທີ່ ປກສ ແຂວງຫຼວງນໍ້າທາ ຢຶດໄດ້ຈາກການນຳເຂົ້າຂອງບໍລິສັດເຄມີພັນລາວ ຂາເຂົ້າ-ຂາອອກຈໍາກັດ ມີສານເຄມີໄຮໂດຄໍລິກອາຊີດ ຈຳນວນ 63 ໂຕນ ແລະ ສານເຄມີ ໂຊດຽມໄຊຍາໄນຈຳນວນ 30 ໂຕນ.
ພັອ ວົງເພັດ ແສນວົງສາ ຮອງຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ໃຫ້ຮູ້ວ່າ: ໃນວັນທີ 14 ທັນວາ 2022, ກອງບັນຊາການ ປກສ ແຂວງ ຫຼວງນ້ຳທາ ກວດລົດບັນທຸກ ພົບເຫັນຖັງບັນຈຸສານເຄມີ ໂຊດຽມໄຊຍາໄນຈຳນວນ 600 ຖັງ ນ້ຳໜັກ 30 ໂຕນ. ຈາກນັ້ນ ໄດ້ກັກຕົວພວກກ່ຽວມາສືບສວນ -ສອບສວນ ແລະ ໃນວັນທີ 12 ມັງກອນ 2023 ໄດ້ກວດລົດບັນທຸກ ອີກຄັນໜຶ່ງ ກວດພົບເຫັນສານເຄມີ ໄຮໂດຄໍລິກອາຊິດ ຈຳນວນ 27 ຖັງ ນໍ້າໜັກ 32 ໂຕນ ແລະ ລົດບັນທຸກ ໝາຍເລກທະບຽນ ບກ 2986 ພົບເຫັນສານແຕ່ມີ ໄຮໂດຄໍລິກອາຊິດ ຈໍານວນ 26 ຖັງ ນໍ້າໜັກ 31 ໂຕນ ແລະ 10 ກິໂລກຼາມ. ຜ່ານການສືບສວນສອບສວນພົບວ່າສານເຄມີ ໂຊດຽມໄຊຍາໄນ ແລະ ໄຮໂດຄໍລິກອາຊິດ ເປັນຂອງບໍລິສັດ ເຄມີພັນລາວ ການຄ້າຂາອອກ-ຂາເຂົ້າ ທີ່ໄດ້ຮັບອານຸຍາດນໍາເຂົ້າສານເຄມີ ໂດຍຖືກຕ້ອງຕາມກົດໝາຍ ເພື່ອຂາຍໃຫ້ບໍລີສັດ ຂຸດຄົ້ນແຮ່ທາດ ຢູ່ພາຍໃນ ສປປ ລາວ ແຕ່ບໍລິສັດ ເຄມີພັນລາວ ໄດ້ຂາຍສານໂຊດຽມໄຊຍາໄນ ໃຫ້ທ້າວ ຊຽງຈຸນ ເພື່ອນຳສົ່ງໄປປະເທດມຽນມາ ແລະ ຂາຍສານເຄມີ ໄຮໂດຄໍລິກອາຊິດ ໃຫ້ບຸກຄົນອື່ນ ໂດຍບໍ່ໄດ້ຮັບອານຸຍາດ ແລະ ບໍ່ມີເອກະສານເຄື່ອນຍ້າຍຈາກພາກສ່ວນທີ່ກ່ຽວຂ້ອງ, ເຊິ່ງເປັນການລັກລອບສົ່ງອອກສິນຄ້າ ໂດຍບໍ່ຖືກຕ້ອງຕາມມາດຕາ 284 ຂອງປະມວນກົດໝາຍອາຍາ.
ທ່ານ ປອ ດາວອນ ແກ້ວມະນີ ຜູ້ອໍານວຍການສູນວິຊາ ການດ້ານການຈັດການສິ່ງແວດລ້ອມ ຄະນະວິທະຍາສາດສິ່ງແວດລ້ອມ ມະຫາວິທະຍາໄລແຫ່ງຊາດ ໃຫ້ຮູ້ວ່າ: ທາດໂຊດຽມໄຊຍາໄນ ມີຄວາມເປັນອັນຕະລາຍ ເປັນພິດຫຼາຍເມື່ອສູດດົມ ແລະ ເມື່ອກືນກິນ; ສານດັ່ງກ່າວນີ້ ກໍ່ໃຫ້ເກີດອັນຕະລາຍຢ່າງຮ້າຍແຮງຕໍ່ລະບົບທາງເດີນຫາຍໃຈສ່ວນເທິງ, ດວງຕາ ແລະ ຜິວໜັງ, ການສູດດົມອາດຈະເຮັດໃຫ້ເກີດການຫົດຂອງກ້າມເນື້ອ ແລະ ເປັນພິດຮ້າຍແຮງຕໍ່ສິ່ງທີ່ມີຊີວິດ ເມື່ອເກີດປະຕິກິລິຍາກັບທາດກົດຈະປ່ອຍແກັສທີ່ມີພິດຢ່າງຮຸນແຮງຫຼາຍ ແລະ ເປັນພິດຢ່າງຫຼວງຫຼາຍຕໍ່ສິ່ງທີ່ມີຊີວິດໃນນໍ້າແລະອາດຈະເຮັດໃຫ້ເກີດຜົນກະທົບໄລຍະຍາວຕໍ່ສະພາບແວດລ້ອມໃນນໍ້າ; ສ່ວນໄຮໂດຄໍລິກອາຊີດ ເປັນທາດກັດຫ້ຽນໂລຫະ ແລະ ຜິວໜັງຢ່າງຮຸນແຮງ ແລະອັນຕະລາຍຕໍ່ດວງຕາ.
ພາຍຫຼັງທຳລາຍສານເຄມີ ຈຳນວນ 93 ໂຕນສຳເລັດແລ້ວ, ຍັງຈະສືບຕໍ່ທຳ ລາຍສານເຄມີທີ່ກົມຕຳຫຼວດສິ່ງແວດລ້ອມ ຢຶດໄດ້ມີສານເຄມີປະເພດໂສດາຝຸ່ນ ຈຳນວນ 33 ເປົ່າ ແລະ ເປັນກົດອາຊີດຊູນຟູລິກ ອີກ ໃນຈໍານວນ 10 ຕຸກ ແລະ ຈະສືບຕໍ່ທໍາລາຍສານເຄມີສ່ວນທີ່ເຫຼືອຢູ່ແຂວງຫຼວງນ້ຳທາ ຕື່ມອີກ.
