ເກີດເຫດລົດໄຟສອງຂະບວນຕຳກັນ ຢູ່ປະເທດອິນໂດເນເຊຍ ເຈົ້າໜ້າທີ່ເລັ່ງຫາສາເຫດຂອງການຕຳກັນໃນຄັ້ງນີ້

ສຳນັກຂ່າວ AP ລາຍງານ ວັນທີ 5 ມັງກອນ 2024 ວ່າ: ເກີດເຫດລົດໄຟ 2 ຂະບວນຕຳກັນ ຢູ່ຫ່າງຈາກສະຖານີລົດໄຟໃນເມືອງ ຊິຄາເລງກາ ແຂວງຊວາ ປະເທດອິນໂດເນເຊຍ ໄປປະມານ 500 ແມັດ ເຮັດໃຫ້ມີຜູ້ເສຍຊີວິດຢ່າງໜ້ອຍ 3 ຄົນ ແລະ ໄດ້ຮັບບາດເຈັບ 28 ຄົນ.

ທາງດ້ານເຈົ້າໜ້າທີ່ໂຄສົກ ບໍລິສັດລົດໄຟແຫ່ງຊາດ ອິນໂດເນເຊຍ ລາຍງານວ່າ: ຂະບວນໜຶ່ງເປັນລົດໄຟດ່ວນເດີນທາງມາຈາກເມືອງ ຊູຣາບາຍາ ມຸ່ງໜ້າໄປຫາເມືອງ ບັນດຸງ ກ່ອນຈະເຂົ້າຕຳກັບລົດໄຟໂດຍສານອີກຂະບວນທີ່ກຳລັງເດີນທາງມາຈາກສະຖານີ ຊິຄາເລງກາ ໄປເມືອງ ປາດາຣາລັງ  ແຮງຈາກການຕຳກັນຂອງລົດໄຟທັງ 2 ຂະບວນ ເຮັດໃຫ້ຕູ້ລົດໄຟຫຼາຍຕູ້ຕົກລາງ.

ເບື້ອງຕົ້ນເຈົ້າໜ້າທີ່ໄດ້ຊ່ວຍເຫຼືອຜູ້ໂດຍສານທັງ 2 ຂະບວນຈຳນວນ 160 ຄົນໄດ້ຢ່າງປອດໄພແລ້ວ ແລະ ເຈົ້າໜ້າທີ່ພວມເລັ່ງສືບສວນຫາສາເຫດຂອງການເກີດອຸບັດເຫດຄັ້ງນີ້ຢູ່.