ຄວັນຫລົງໃນງານບຸນອອກພັນສາ ແລະ ຊ່ວງເຮືອປະເພນີ

- advert banner 728 90 728x90 - ຄວັນຫລົງໃນງານບຸນອອກພັນສາ ແລະ ຊ່ວງເຮືອປະເພນີ

ໂດຍ: ທ່ຽງ​ທຳ

- new3 - ຄວັນຫລົງໃນງານບຸນອອກພັນສາ ແລະ ຊ່ວງເຮືອປະເພນີ

ສະບາຍດີ ​ເພື່ອນ​ຜູ້​ອ່ານ​ທີ່​ຮັກ​ແພງ, ຫລາຍ​ຄົນ​ຢູ່​ໃນ​ນະຄອນຫລວງ​ວຽງ​ຈັນ ​ແລະ ​ເຂດ​ແຂວງ​ຕ່າງໆ ອາດ​ຍັງ​ມຶນ​ເມົາ​ກັບ​ບັນຍາກາດ​ຂອງ​ວັນ​ບຸນ​ດັ່ງກ່າວ ​ໂດຍ​ສະ​ເພາະ​ແມ່ນ​ການ​ຮ່ວມ​ຕັກບາດ​ຖວາຍ​ສັງຄະ​ທານ, ຟັງ​ເທດ​ສະໜາ. ພິ​ເສດ​ແມ່ນ​ຄືນ​ມື້ຂຶ້ນ 15 ຄໍ່າ​ເດືອນ 11 ລາວ ​ເຊິ່ງ​ແມ່ນ​ມື້ອອກ​ພັນ​ສາ​ຈະ​ມີ​ພິທີ​ວຽນທຽນ​ຢູ່​ຕາມ​ວັດວາອາ​ຮາມ​ຕ່າງໆ. ພ້ອມ​ນັ້ນ ກໍ​ຈະ​ມີ​ໄຫລ​ເຮືອ​ໄຟ, ລອຍ​ກະທົງ​ຂອງ​ມວນ​ຊົນ​ຢູ່​ຕາມ​ສາຍ​ນ້ຳຕ່າງໆ ​ເພື່ອ​ເປັນ​ການ​ພາວະນາ​ອະທິຖານ​ໃຫ້​ສິ່ງ​ບໍ່​ດີ​ບໍ່​ງາມ​ຕ່າງໆ​ໃຫ້​​ໄຫລ​ໄປ​ກັບ​ນ້ຳກັບ​ໄຟ ​ແລະ ຂໍ​​ໄດ້​ມາ​ແຕ່​ຄວາມສຸກ​ກາຍ​ສະບາຍ​ໃຈ, ມີ​ຜົນສຳ​ເລັດ​ໃນ​ໜ້າ​ທີ່​ການ​ງານ ​ແລະ ມີ​ໂຊກ​ລາບ​ຕະຫລອດ​ໄປ ​ແລະ ມື້ຕໍ່​ມາ​ ສຳລັບ​ຢູ່​ນະຄອນຫລວງ​ວຽງ​ຈັນ​ແມ່ນ​ມື້ຈັດ​ງານ​ແຂ່ງຂັນ​ຊ່ວງ​ເຮືອ​ປະ​ເພນີ​ຕາມ​ຮີດ​ຕາມ​ຄອງ ພາຍຫລັງ​ບຸນ​ອອກ​ພັນ​ສາ​ປະ​ວໍລະນາ​ນັ້ນກໍ​ໄດ້​ດຳ​ເນີນ​ໄປ​ດ້ວຍ​ບັນຍາກາດ​ອັນ​ຟົດຟື້ນ ​ເຊິ່ງ​ເຮືອ​ແຕ່​ລະ​ລຳ​ຕ່າງ​ຝ່າຍ​ຕ່າງ​ກໍ​ສຸມ​ທຸກ​ຄວາມ​ສາມາດ ​ເພື່ອ​ຍາດ​ເອົາ​ໄຊຊະນະ​ມາສູ່​ລູກ​ເຮືອ ​ແລະ ສີພາຍ​ຂອງ​ຕົນ, ​ໃນ​ທີ່​ສຸດ​ກໍ​ແມ່ນ​ສີພາຍ​ນ້ອຍ​ອິດທິລິດ​ສາມາດ​ຍາດ​ໄດ້​ຂັນ​ຊະນະ​ເລີດ​ໄປ​ຄອງ​ໄດ້​ຢ່າງ​ສົມ​ກຽດ ​ເຮັດ​ໃຫ້​ງານ​ບຸນ​ດັ່ງກ່າວ​ໄດ້​ມາ​ເຊິ່ງຄວາມ​ເບີກບານ​ມ່ວນ​ຊື່ນ ​ແລະ ຟົດຟື້ນ​ເປັນ​ຢ່າງ​ດີ, ສາມາດ​ສ້າງ​ຄວາມ​ສົນ​ໃຈ ​ແລະ ດຶງ​ດູດ​ໃຈ​ຂອງ​ແຂກ​ບ້ານ​ແຂກ​ເມືອງ​ຜູ້​ມາ​ທ່ຽວ​ລາວ ​ແລະ ອາດ​ເປັນ​ທ່າ​ແຮງ​ໜຶ່ງ​ກະ​ຕຸກ​ຊຸກຍູ້​ໃຫ້​ປີ​ທ່ອງ​ທ່ຽວ​ລາວ 2018 ປະສົບ​ຜົນສຳ​ເລັດ.

​ແຕ່​ໃນ​ຂະນະ​ດຽວ​ກັນ ກໍ​ສັງ​ເກດ​ເຫັນ​ວ່າ​ໃນ​ງານ​ບຸນ​ດັ່ງກ່າວ​ຍັງ​ໜັກ​ໄປ​ເລື່ອງ​ກິນ​ເຫລົ້າ​ເມົາ​ເບຍ, ບໍ່​ວ່າ​ຢູ່​ຫ້າງ​ຮ້ານ​ໃດ, ສຳນັກງານ​ອົງການ​ໃດ ຜູ້​ຢູ່​ແຄມ​ທ່າ​ວັດ​ຈັນ​ກໍ​ມີ​ການ​ກິນ​ການ​ດື່ມ ​ເບິ່ງ​ແລ້ວ​ຂ້ອນ​ຂ້າງ​ຟຸມ​ເຟືອຍ ​ເມື່ອ​ມາ​ປຽບທຽບ​ໃສ່​ນະ​ໂຍບາຍ​ປະຢັດ ​ແລະ ຕ້ານ​ການ​ຟຸມ​ເຟືອຍ​ຂອງ​ທ່ານ​ນາຍົກລັດຖະມົນຕີວາງອອກ ​ແລະ ກໍ​ເປັນຕົ້ນ​ເຫດ​ຫລັກ​ທີ່​ພາ​ໃຫ້​ເກີດ​ອຸປະຕິ​ເຫດ​ບົນ​ທ້ອງ​ຖະໜົນ. ​ໃນ​ຂະນະ​ທີ່​ເຈົ້າໜ້າ​ທີ່​ຈະລາຈອນ​ກໍ​ມີ​ຄວາມ​ເຂັ້ມງວດ ​ເພື່ອ​ສະກັດ​ກັ້ນສິ່ງ​ຫຍໍ້​ທໍ້​ດັ່ງກ່າວ ​ແຕ່​ກໍ​ຍັງ​ເຮັດ​ໄດ້​ໜ້ອຍ, ຜູ້​ດື່ມ​ສິ່ງ​ມືນ​ເມົາ​ແລ້ວ​ຂັບ​ຂີ່​ລົດ​ກໍ​ຍັງ​ມີ​ໃຫ້​ເຫັນ​ຢ່າງ​ແຜ່​ຫລາຍ. ສິ່ງ​ນີ້​ຂະ​ແໜງ​ການ​ກ່ຽວຂ້ອງ​ເຮົາ​ຄວນ​ເພີ່ມ​ທະວີ​ຄວາມ​ເຂັ້ມງ​ວດຕື່ມ​ອີກ ​ເພື່ອ​ສະກັດ​ກັນ​ການ​ເກີດ​ອຸປະຕິ​ເຫດ​ໃນ​ຕົວ​ເມືອງ​ຫລວງ​ໃຫ້​ຫລຸດ​ໜ້ອຍ​ຖອຍ​ລົງ.

- lattana 1 - ຄວັນຫລົງໃນງານບຸນອອກພັນສາ ແລະ ຊ່ວງເຮືອປະເພນີ
error: Content is protected !!