ປກສ ເມືອງຫົງສາ ສຶກສາອົບຮົມນັກຮຽນ-ນັກສຶກສາ 6 ຄົນ ທີ່ມົ້ວສຸມດື່ມນ້ຳກະທ່ອມ ແລະ ສູບຢາໄຟຟ້າ
March 8, 2024 - 5:15 PM
ວັນທີ 7 ມີນາ 2024, ປກສ ເມືອງຫົງສາ ແຂວງໄຊຍະບູລີ ໄດ້ ສຶກສາອົບຮົມໄວລຸ້ນ, ນັກຮຽນ ທີ່ມົ້ວສຸມດື່ມນ້ຳກະທ່ອມ ແລະ ສູບຢາໄຟຟ້າ ຢູ່ຊັ້ນສາມຂອງໂຮງແຮມແຫ່ງໜຶ່ງ ຈຳນວນ 6 ຄົນ.
ພັຕ ແສງຈັນ ບຸດຕະພົມ ຫົວໜ້າພະແນກຕຳຫລວດ ກອງບັນຊາການ ປກສ ເມືອງ ໃຫ້ຮູ້ວ່າ: ເວລາ 16:00 ໂມງ ຂອງວັນທີ 29 ກຸມພາ 2024 ຜ່ານມາ ເຈົ້າໜ້າທີ່ ປກສ ເມືອງ ຫົງສາ ໄດ້ຮັບແຈ້ງຈາກພົນລະເມືອງດີວ່າມີໄວລຸ້ນ-ນັກຮຽນ ພາກັນມົ້ວສຸມດື່ມນ້ຳກະທ່ອມ ແລະ ສູບຢາສູບໄຟຟ້າ ຢູ່ຊັ້ນສາມຂອງໂຮງແຮມແຫ່ງໜຶ່ງ, ເຈົ້າໜ້າທີ່ຈຶ່ງໄດ້ເຂົ້າກວດສອບ ແລະ ກັກຕົວພວກກ່ຽວທີ່ມົ້ວສຸມຢູ່ນໍາກັນ 6 ຄົນ, ຍິງ 1 ຄົນ, ໃນນີ້, ເປັນນັກສຶກສາ 1 ຄົນ ແລະ ເປັນນັກຮຽນ 5 ຄົນ ມາສອບສວນ. ພ້ອມທັງເຮັດບົດບັນທຶກສຶກສາອົບຮົມ ເພື່ອເປັນຫລັກຖານ ແລະ ມອບໃຫ້ອຳນວຍການໂຮງຮຽນ, ຄູປະຈຳຫ້ອງ, ອົງການປົກຄອງບ້ານ, ພໍ່-ແມ່ຜູ້ປົກຄອງສືບຕໍ່ສຶກສາອົບຮົມ ແລະ ຕິດຕາມການເຄື່ອນໄຫວຂອງລູກຫລານຕໍ່ໄປ.
