ລາວຈະຈັດຫຼາຍກິດຈະກໍາຕ້ອນຮັບປີທ່ອງທ່ຽວ 2018
ທ່ານ ສອນໄຊ ສີພັດດອນ ຮອງນາຍົກລັດຖະມົນຕີ, ທັງເປັນປະທານຄະນະຮັບຜິດຊອບຊີ້ນໍາລະດັບຊາດ ການຈັດປີທ່ອງທ່ຽວລາວ 2018 ໄດ້ຖະແຫລງວັນທີ 12 ຕຸລາ ນີ້ວ່າ: ປີທ່ອງທ່ຽວລາວ 2018 ນີ້, ຈະໄດ້ເປີດຂຶ້ນພ້ອມ ພິທີເປີດງານບຸນນະມັດສະການພະທາດຫຼວງ ໃນວັນທີ 28 ຕຸລາ ນີ້, ໂດຍຈະໄດ້ເຊີນບັນດາແຂກທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ ເພື່ອເປັນການໂຄສະນາປະຊາສໍາພັນ ໃຫ້ແກ່ປີທ່ອງທ່ຽວລາວ ໃຫ້ເປັນຂະບວນກວ້າງຂວາງ ໃນບັນດາ 18 ແຂວງທົ່ວປະເທດ ໂດຍໄດ້ຈັດໃຫ້ມີກິດຈະກິດກໍາຕ່າງໆ ເຊັ່ນ: ບຸນປີໃໝ່ຊົນເຜົ່າກືມມຸ ແຂວງອຸດົມໄຊ, ງານບຸນເສົາຫຼັກເມືອງ 10 ຊົນເຜົ່າ ແຂວງເຊກອງ, ບຸນພະທາດໂພນສັນ ແຂວງບໍລິຄໍາໄຊ, ບຸນຊົນເຜົ່າ ແຂວງຫຼວງນໍ້າທາ, ງານເທດສະການດອກງິ້ວບານ ແຂວງບໍ່ແກ້ວ, ບຸນຊ້າງ ແຂວງໄຊຍະບູລີ, ບຸນວັດພູ ແຂວງຈໍາປາສັກ, ບຸນພະທາດສີໂຄດ ແຂວງຄໍາມ່ວນ, ບຸນປີໃໝ່ລາວ ແຂວງຫຼວງພະບາງ, ງານສະເຫລີມສະຫລອງແກ້ວຫຼັກເມືອງ ແລະ ທ່ຽວຊົມຖໍ້າທ່ານຜູ້ນໍາ ແຂວງຫົວພັນ, ງານບຸນຊ່ວງເຮືອ ແຂວງສາລະວັນ, ບຸນນະມັດສະການພະທາດຫຼວງ ນະຄອນຫຼວງວຽງຈັນ, ບຸນຊ່ວງເຮືອເມືອງຂວາ ແຂວງຜົ້ງສາລີ, ບຸນພະທາດອີງຮັງ ແຂວງສະຫວັນນະເຂດ, ບຸນກິນຈຽງ ແຂວງຊຽງຂວາງ, ບຸນກິນຈຽງ (ຫຼັກ 52 ) ແຂວງວຽງຈັນ, ບຸນກິນຈຽງ ແຂວງໄຊສົມບູນ ແລະ ງານນະມັດສະການພະເຈົ້າໄຊເສດຖາ ແຂວງອັດຕະປື.
ທ່ານຮອງນາຍົກໃຫ້ຮູ້ວ່າ: ສໍາລັບການເຄື່ອນໄຫວ ແລະ ກິດຈະກໍາປິ່ນອ້ອມຢູ່ພາຍໃນມີ: ການຈັດຂະບວນຄາລາວານລົດທ່ອງທ່ຽວຕາມເສັ້ນທາງແຫຼ່ງທ່ອງທ່ຽວຂອງບາງແຂວງພາກເໜືອ ແລະ ພາກໃຕ້, ຈັດລາຍການຢ້ຽມຢາມແຫຼ່ງທ່ອງທ່ຽວສໍາລັບສື່ມວນຊົນ ແລະ ບໍລິສັດທ່ອງທ່ຽວທັງພາຍໃນ ແລະ ຕ່າງປະເທດ, ເພື່ອໂຄສະນາຜະລິດຕະພັນ ແລະ ແຫຼ່ງທ່ອງທ່ຽວອັນໂດດເດັ່ນຂອງລາວ ໂດຍສະເພາະແຫຼ່ງທ່ອງທ່ຽວປະຫວັດສາດ, ວັດທະນະທໍາ ແລະ ທໍາມະຊາດ, ກິດຈະກໍາສະເຫລີມສະຫລອງວັນທ່ອງທ່ຽວໂລກ, ບຸນມະໂຫລານສິລະປະການສະແດງພື້ນເມືອງບັນດາເຜົ່າທົ່ວປະເທດໃນງານບຸນນະມັດສະການພະທາດຫຼວງ. ສ່ວນການເຄື່ອນໄຫວ ແລະ ກິດຈະກໍາຢູ່ຕ່າງປະເທດມີ: ງານວັນລາວ (Lao Ninght) ໃນງານ ATF 2018 ຢູ່ຊຽງໃໝ່ ປະເທດໄທ, ງານ Cocktail ຢູ່ ITB Belin 2018 ປະເທດເຢຍລະມັນ, ງານສະແດງທ່ອງທ່ຽວສາກົນ SMT ຢູ່ປາຣີ ປະເທດຝຣັ່ງ, ງານວັນລາວ (Lao Ninght) ທີ່ງານ Lao Festival ທີ່ໂຕກຽວ ປະເທດຍີ່ປຸ່ນ, ງານວັນລາວ (Lao Ninght) ໃນງານ ITE HCM ຢູ່ປະເທດຫວຽດນາມ ແລະ ງານວາງສະແດງທ່ອງທ່ຽວສາກົນ WTM ຢູ່ ລອນດອນ ປະເທດອັງກິດ ສະນັ້ນ ໃນໂອກາດນີ້, ຈຶ່ງຮຽກຮ້ອງມາຍັງພະນັກງານ, ທະຫານຕໍາຫຼວດ, ຫົວໜ່ວຍທຸລະກິດ ທັງພາກລັດ, ພາກເອກະຊົນ ແລະ ບັນດາອົງການຈັດຕັ້ງຕ່າງໆ ຕະຫຼອດຮອດປະຊາຊົນບັນດາເຜົ່າ ຈົ່ງພ້ອມກັນເປັນເຈົ້າພາບທີ່ດີ ເພື່ອຕ້ອບຮັບນັກທ່ອງທ່ຽວທີ່ຈະເຂົ້າມາທ່ຽວຊົມປະເທດເຮົາ ໃນໂອກາດດັ່ງກ່າວໃນມີຄວາມປະທັບໃຈເປັນຢ່າງຍິ່ງ.
+ລາວຈະໃຊ້ງົບຫລາຍກວ່າ 22 ຕື້ກີບ ຈັດກິດຈະກຳປີທ່ອງທ່ຽວລາວ 2018
+ລັດຖະມົນຕີ ຖວທ ເນັ້ນຄະນະຮັບພິຊອບ ກະກຽມຄວາມພ້ອມເປີດປີທ່ອງທ່ຽວ 2018 ໃຫ້ດີ
ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໃຫ້ຮູ້ວ່າ: ລັດຖະບານໄດ້ເອົາໃຈໃສ່ພັດທະນາ ແລະ ສົ່ງເສີການທ່ອງທ່ຽວຢ່າງຕັ້ງໜ້າ ຊຶ່ງເຮັດໃຫ້ມີນັກທ່ອງທ່ຽວເຂົ້າມາທ່ອງທ່ຽວ ສປປ ລາວ ນັບມື້ຫຼາຍຂຶ້ນ. ໃນປີ 200 ມີນັກທ່ອງທ່ຽວເຂົ້າມາລາວ 737,208 ຄົນ, ມີລາຍຮັບ 113 ລ້ານກວ່າ ໂດລາສະຫະລັດ ແລະ ໃນປີ 2015 ຈໍານວນນັກທ່ອງທ່ຽວທີ່ເຂົ້າມາລາວເພີ່ມຂຶ້ນ 4,6 ລ້ານກວ່າຄົນ, ມີລາຍຮັບ 725 ລ້ານກວ່າ ໂດລາສະຫະລັດ ແລະ ຄາດຄະເນ ໃນປີ 2020 ຈະມີນັກທ່ອງທ່ຽວເຖິງ 6,2 ລ້ານຄົນ ແລະ ຈະມີລາຍຮັບ 993 ລ້ານກວ່າ ໂດລາສະຫະລັດ.
