ລາວ-ຣັດເຊຍ ຮ່ວມມືຄົ້ນຄວ້າ ວິທະຍາສາດດ້ານເສດຖະກິດ
ເມື່ອທ້າຍອາທິດຜ່ານມານີ້, ໄດ້ມີພິທີລົງນາມການຮ່ວມມືເພື່ອຄົ້ນຄວ້າ ແລະ ແລກປ່ຽນບົດຮຽນດ້ານເສດຖະກິດ ລະຫວ່າງທ່ານ ລີເບີ ລີບົວປາວ ຮອງຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ ແລະ ທ່ານ ເຊີກີ ສະມາຄ໊ອຟ (Sergey Shmakov) ອຳນວຍການສະຖາບັນຊັ້ນສູງ ການປ່ຽນແປງ ແລະ ການບໍລິຫານວິສາຫະກິດ ສະຫະພັນຣັດເຊຍ ເຊິ່ງມີເນື້ອໃນ ລະບຸວ່າ: ສອງຝ່າຍຈະແລກປ່ຽນຂໍ້ມູນຂ່າວສານດ້ານວິທະຍາສາດຢ່າງເປັນປະຈຳກ່ຽວກັບສະພາບເສດຖະກິດ-ສັງຄົມຂອງແຕ່ລະປະເທດ ໂດຍສະເພາະ ແຜນການ ແລະ ເປົ້າໝາຍການພັດທະນາເສດຖະກິດແຫ່ງຊາດຂອງທັງສອງປະເທດ, ສອງຝ່າຍຈະໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນໃນການແລກປ່ຽນວິຊາການໃນຂົງເຂດເສດຖະກິດ, ລັດຖະສາດ ແລະ ກິດຈະກຳ ອື່ນໆ ເພື່ອສົ່ງເສີມການພົວພັນລະຫວ່າງນັກວິຊາການ. ຣັດເຊຍຈະໃຫ້ການຊ່ວຍເຫຼືອແກ່ສະຖາບັນເສດຖະກິດແຫ່ງຊາດລາວໃນການພົວພັນຮ່ວມມືກັບບັນດາສະຖາບັນຄົ້ນຄວ້າວິທະຍາສາດຂອງຣັດເຊຍທີ່ດຳເນີນການຄົ້ນຄວ້າດ້ານເສດຖະກິດ ແລະ ລັດຖະສາດ ແລະ ຈະໃຫ້ການຊ່ວຍເຫຼືອໃນການດຶງດູດເອົາການລົງທຶນຈາກຕ່າງປະເທດມາລົງທຶນໃນລາວ ທັງຈາກປະເທດຣັດເຊຍ ແລະ ຈາກປະເທດທີສາມໃນຂົງເຂດການເງິນ, ກະສິກຳ ແລະ ຂະແໜງອື່ນໆທີ່ມີຄວາມສຳຄັນຕໍ່ເສດຖະກິດຂອງລາວ. ສະຖາບັນຄົ້ນຄວ້າເສດຖະກິດແຫ່ງຊາດລາວຈະໃຫ້ການຊ່ວຍເຫຼືອຣັດເຊຍໃນການຕິດຕໍ່ຄູ່ຮ່ວມມືໃນພາກພື້ນ ເພື່ອຂັບ ເຄື່ອນດ້ານທຸລະກິດຂອງຄູ່ຮ່ວມສະຖາບັນຊັ້ນສູງການປ່ຽນແປງຮູບແບບ ແລະ ການບໍລິຫານວິສາຫະກິດຣັດເຊຍ, ພ້ອມທັງຈະດຳເນີນການສຶກສາຄວາມເປັນ ໄປໄດ້ໃນການສົ່ງເສີມການຄ້າໃນ ສປປ ລາວ ໂດຍສະເພາະແມ່ນການຄົ້ນຄວ້າວິທະຍາສາດ ແລະ ການທົດລອງ-ອອກແບບ ເພື່ອຜົນປະໂຫຍດ ຂອງສອງປະເທດ. ສອງຝ່າຍຈະຮ່ວມກັນດຳເນີນການສຶກສາຄວາມເປັນໄປໄດ້ການແລກປ່ຽນທາງວິທະຍາສາດລະຫວ່າງສອງສະຖາບັນ. ການຮ່ວມມືນີ້ເປັນການເສີມສ້າງສາຍພົວພັນມິດຕະພາບ ແລະ ການຮ່ວມມືທາງດ້ານວຽກງານຄົ້ນ ຄວ້າວິທະຍາສາດເສດຖະກິດຂອງສອງປະເທດໃຫ້ເຂັ້ມແຂງ ແລະ ເປັນການປະກອບສ່ວນສຳຄັນຕໍ່ສາຍພົວພັນການຮ່ວມມືລະຫວ່າງ ລາວ-ຣັດເຊຍ ໃຫ້ໝັ້ນຄົງຂະໜົງແກ່ນຍິ່ງໆຂຶ້ນ.
