ນະຄອນຫລວງທຳລາຍສິນຄ້າຕ້ອງຫ້າມ ແລະ ໝົດອາຍຸຈໍານວນຫລາຍ
ເມື່ອທ້າຍອາທິດຜ່ານມານີ້, ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນໄດ້ນໍາສີນຄ້າປະເພດຕ້ອງຫ້າມ, ສິນຄ້າບໍ່ໄດ້ມາດຕະຖານ, ມີສານເຄມີເຈືອປົນ ແລະ ໝົດອາຍຸການນຳໃຊ້ຫລາຍລາຍການໄປທໍາລາຍຖີ້ມຢູ່ທີ່ກອງພັນໃຫຍ່ 497, ໂດຍສີນຄ້າດັ່ງກ່າວເຈົ້າໜ້າທີ່ການຄ້າໄດ້ລົງກວດກາຮ້ານຂາຍສີນຄ້າຂອງຊາວຄ້າຂາຍຕາມຕະຫລາດໃຫຍ່ໃນຕົວເມືອງ ແລະ ຮ້ານຂາຍສີນຄ້າຕ່າງໆ ຊ່ວງໄລຍະບຸນອອກພັນສາ ແລະ ບຸນປະເພນີຊ່ວງເຮືອວັດຈັນປະຈຳປີ 2017 ປະກອບມີ: ໝາກກະໂພກ ດອກໄມ້ໄຟ 1.302 ກິໂລ, ມູນຄ່າ 65 ລ້ານກວ່າກີບ, ສິນຄ້າໝົດອາຍຸ 652 ກິໂລ, ມູນຄ່າ 19 ລ້ານກວ່າກີບ ແລະ ຢາສູບທີ່ບໍ່ຕິດສະແຕັມເສຍພາສີ-ອາກອນ 100 ຊອງມູນຄ່າຫລາຍກວ່າ 7 ລ້ານກີບ. ໃນໂອກາດນີ້,ເຈົ້າໜ້າທີ່ການຄ້າ ກໍໄດ້ຮຽກຮ້ອງໃຫ້ພາກສ່ວນກ່ຽວຂ້ອງທີ່ປະຈຳດ່ານ ເປັນຕົ້ນ: ໜ່ວຍງານພາສີ ແລະ ຕຳຫລວດໃຫ້ເອົາໃຈໃສ່ ແລະ ສະກັດກັ້ນສິນຄ້າຕ້ອງຫ້າມດັ່ງກ່າວ ເພື່ອບໍ່ໃຫ້ມີການຈຳໜ່າຍຢູ່ປະເທດເຮົາ, ພ້ອມທັງຮຽກຮ້ອງໃຫ້ອົງການປົກຄອງຂັ້ນຕ່າງໆເອົາໃຈໃສ່ສຶກສາອົບຮົມກ່າວເຕືອນກຸ່ມເປົ້າໝາຍທີ່ຈຳໜ່າຍສິນຄ້າຕ້ອງຫ້າມ ແລະ ປະຕິບັດມາດຕະການຕໍ່ຜູ້ລະເມີດເຂັ້ມງວດ.
