ລັດຖະບານປັບປຸງຫລາຍຂອດເພື່ອສ້າງພື້ນຖານເສດຖະກິດຂອງປະເທດໃຫ້ເຂັ້ມແຂງ

- advert banner 728 90 728x90 - ລັດຖະບານປັບປຸງຫລາຍຂອດເພື່ອສ້າງພື້ນຖານເສດຖະກິດຂອງປະເທດໃຫ້ເຂັ້ມແຂງ

ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ລາຍງານກ່ຽວກັບການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມປີ 2017 ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ໃນວັນທີ 16 ຕຸລານີ້, ໂດຍຊີ້ ວ່າ: ​ເສດຖະກິດ​ມະຫາ​ພາກ​​ໂດຍ​ລວມ​ແມ່ນ​ມີ​ສະຖຽນ​ລະ​ພາບ​ດີ, ອັດຕາ​ການ​ເຕີບ​ໃຫຍ່​ສະ​ເລ່ຍຢູ່​ໃນ​ລະດັບ 6,83% (ຫລຸດ​ແຜນ 0,17%), ລວມຍອດ​ຜະລິດ​ຕະພັນ​ພາຍ​ໃນ (GDP) ສະ​ເລ່ຍ​ບັນລຸ 2.472 ​ໂດ​ລາ​ສະຫະລັດຕໍ່ຄົນຕໍ່ປີ.ນອກນີ້, ລັດຖະບານໄດ້ເລັ່ງປັບປຸງລະບົບ​ການ​ເງິນ ​ແລະ ງົບປະມານ​ຢ່າງຮອບດ້ານ ​ເປັນຕົ້ນ: ດ້ານ​ການຈັດຕັ້ງ, ສັບ​ຊ້ອນ​ບຸກຄະລາ​ກອນ​ໃຫ້ເໝາະ​ສົມ, ນຳ​ໃຊ້​ລະບົບ​ເຄື່ອງມື​ທັນ​ສະ​ໄໝ​ເຂົ້າ​ໃນ​ການຈັດ​ເກັບ​ລາຍ​ຮັບພາ​ສີ-ອາກອນ ​ແລະ ຄ່າ​ທຳນຽມ​ຕ່າງໆ, ​ເຊື່ອມ​ໂຍງ​ການ​ຊຳລະ​ລາຍ​ຈ່າຍ​ຜ່ານ​ລະບົບ​ທະນາຄານ, ​ເຊິ່ງ​ເຮັດ​ໃຫ້ການ​ຮົ່ວ​ໄຫລ​ຂອງລາຍ​ຮັບ-ລາຍ​ຈ່າຍ​ງົບປະມານ ​ແລະ ການ​ລະ​ເມີດ​ວິ​ໄນ​​ການ​ເງິນ​ມີ​ທ່ວງທ່າ​ຫລຸດ​ລົງ​ຢ່າງ​ຊັດ​ເຈນ ແລະ ຄາດວ່າລາຍ​ຮັບ​ງົບປະມານ​ໝົດ​ປີ​​ຈະ​ໄດ້​ປະມານ 23.489 ຕື້ກີບ​ເທົ່າ​ກັບ 98,1%, ລາຍຈ່າ​ຍ​ປະຕິບັດ​ໄດ້ 31.508 ຕື້ກີບ​ເທົ່າ​ກັບ 97,24% ​ພິ​ເສດລັດຖະບານໄດ້ເອົາໃຈໃສ່​ການ​ສົ່ງ​ເສີມ​ການ​ປະຢັດ ​ແລະ ຕ້ານ​ການ​ຟຸມ​ເຟືອຍ ​ເຮັດ​ໃຫ້​ສາມາດ​ຫລຸດຜ່ອນ​ການສິ້ນ​ເປືອງ​ງົບປະມານ​ຂອງ​ລັດ​ໃນ​ພາກ​ລາຍ​ຈ່າຍ​ລົງ​ຫລາຍສົມຄວນ. ຂະນະດຽວກັນ, ລະ​ບົ​ບ​ເງິນຕາ​ໄດ້​ຮັບ​ການ​ຄຸ້ມ​ຄອງ​ໃຫ້​ມີ​ສະຖຽນ​ລະ​ພາບ ​ໂດຍ​ຮັກສາ​ໄດ້​ອັດຕາ​ເງິນ​ເຟີ້​ສະ​ເລ່ຍ​ໃນ​ລະດັບ 1-2%, ອັດຕາ​ແລກປ່ຽນ​ໂດຍ​ລວມ​ເໜັງ​ຕີງ​​ເລັກ​ໜ້ອຍ ​ແລະ ສ່ວນ​ຕ່າງ​ລະຫວ່າງ​ອັດຕາ​ແລກປ່ຽນ​ຢູ່​ຕະຫລາດ​ທົ່ວ​ໄປ ​ແລະ ທາງ​ການມາ​ຮອດ​ປັດຈຸບັນ​ຕ່າງ​ກັນ​ປະມານ 1-2%, ພ້ອມ​ນີ້ກໍ​ສາມາດ​ຮັກສາ​ຄັງ​ສຳຮອງ​ເງິນຕາ​ຕ່າງປະ​ເທດ​ໃຫ້​ກຸ້ມ​ການ​ນຳ​ເຂົ້າ​ໄດ້ 4,14 ​ເດືອນ (​ແຜນການ​ກຳນົດ​ໄວ້ 5 ​ເດືອນ) ​ແລະ ຮັກສາ​ປະລິມານ​ເງິນ M2 ​ໃນ​ລະດັບ 16,39% (​ເພີ່ມ​ຂຶ້ນ​ແຕ່​ກໍ​ຢູ່​ໃນ​ຂອບ​ແຜນ​ທີ່​ກຳນົດ​ບໍ່​ໃຫ້​ເກີນ 20%). ສ່ວນສະພາບ​​ການ​ລົງທຶນ ​ແລະ ດຳ​ເນີນ​ທຸລະ​ກິດ​ໄດ້​ຮັບ​ການ​ປັບປຸງ​ຕາມ​ລຳດັບ ​ໂດຍ​ສະ​ເພາະ​ແມ່ນ​ພາຍຫລັງ​ສະພາ​ໄດ້​ຮັບຮອງ​ກົດໝາຍ​ວ່າ​ດ້ວຍ​ການ​ສົ່ງ​ເສີມ​ການ​ລົງທຶນ​ໃນ​ທ້າຍ​ປີ 2016, ລັດຖະບານ​ໄດ້​ສ້າງຕັ້ງຄະນະ​ກຳມະການ​ຄຸ້ມ​ຄອງ ​ແລະ ສົ່ງ​ເສີມ​ການ​ລົງທຶນ​ຂັ້ນສູນ​ກາງ (ຄລທສ) ​ໂດຍ​ມີ​ຮອງ​ນາຍົກລັດຖະມົນຕີ​ເປັນ​ປະທານ. ຄະນະ​ດັ່ງກ່າວ​ສາມາດ​ພິຈາລະນາ​ການສະ​ເໜີ​ກ່ຽວ​ກັບ​ການ​ລົງທຶນ​ໄດ້​ຢ່າງ​ໂປ່​ງ​ໃສ, ຄ່ອງ​ຕົວ ​ແລະ ວ່ອງ​ໄວ​ຂຶ້ນກວ່າ​ເກົ່າ. ສ່ວນ​ຢູ່​ທ້ອງ​ຖິ່ນ​ກໍ​ໄດ້​ດຳ​ເນີນ​ການ​ໂດຍ​ມີ​ຄະນະ​ກຳມະການ​ຄຸ້ມ​ຄອງ ​ແລະ ສົ່ງ​ເສີມ​ການ​ລົງທຶນ​ຂັ້ນ​ແຂວງ (ຄລທຂ). ພ້ອມ​ກັນ​ນີ້, ລັດຖະບານ​ໄດ້​ຈັດ​ກອງ​ປະຊຸມ​ຮ່ວມ​ກັບ​ພາກ​ທຸລະ​ກິດ​ທັງ​ພາຍ​ໃນ ​ແລະ ຕ່າງປະ​ເທດ, ກອງ​ປະຊຸມ​ຮ່ວມ​ກັບ​ສະມາຄົມ​ທຸລະ​ກິດ​ຫວຽດນາມ ​ແລະ ​ໄທ​ຢູ່​ລາວ, ກອງ​ປະຊຸມ​ຮ່ວມ​ກັບ​ພາກ​ທຸລະ​ກິດ​ຍີ່ປຸ່ນ, ສິງກະ​ໂປ, ມາ​ເລ​ເຊຍ ​ແລະ ອິນ​ໂດ​ເນ​ເຊຍ ​ເພື່ອ​ຊຸກຍູ້​ສົ່​ງ​ເສີມ​ການ​ລົງທຶນ​ຢູ່​ລາວ, ພ້ອມ​ທັງ​ຮັບ​ຟັງ​ຄຳ​ຄິດ​ເຫັນ​ຕົວ​ຈິງ ​ແລະ ​ເປັນ​ປ​ະ​ໂຫຍ​ດ ​ເພື່ອ​ປັບປຸງ​ສະພາບ​ແວດ​ລ້ອມ​ການ​ລົງທຶນ ​ແລະ ດຳ​ເນີນ​ທຸລະ​ກິດ​ພາຍ​ໃນ​ປະ​ເທດ.

- new3 - ລັດຖະບານປັບປຸງຫລາຍຂອດເພື່ອສ້າງພື້ນຖານເສດຖະກິດຂອງປະເທດໃຫ້ເຂັ້ມແຂງ

ສໍາລັບການ​ຊຸກຍູ້​ສົ່ງ​ເສີມ​ການ​ຜະລິດ ​ແລະ ບໍລິການ​ພາຍ​ໃນ​ປະ​ເທດ​ໄດ້​ຮັບ​ການ​ເອົາ​ໃຈ​ໃສ່, ​ໂດຍ​ລັດຖະບານ​ໄດ້​ມອບ​ໃຫ້​ຄະນະ​ຊີ້​ນຳ​ການ​ສົ່ງ​ເສີມ​ການ​ຜະລິດ​ເປັນ​ສິນຄ້າ ​ແລະ ຄ້ຳປະກັນ​ດ້ານ​ສະບຽງ​ອາຫານວິ​ເຄາະ​ວິ​ໄຈ​ຢ່າງ​ເລິກ​ເຊິ່ງ ​ແລະ ຮອບດ້ານ ​ເພື່ອ​ແກ້​ໄຂ​ບັນຫາ​ການ​ຜະລິດ​ເປັນ​ສິນຄ້າ​ພາຍ​ໃນ​ທີ່​ຍັງ​ອ່ອນ​ແອ ​ແລະ ຄວາມ​ອາດ​ສາມາດ​ແຂ່ງຂັນ​ກັບປະ​ເທດ​ເພື່ອນ​ບ້ານ​ຍັງ​ຕໍ່າ​ໃຫ້​ເປັນ​ລະບົບ, ຄະນະ​ດັ່ງກ່າວ​ໄດ້​ດຳ​ເນີນ​ງານ​ຢ່າງ​ຫ້າວຫັນ, ​ໂດຍ​ລົງ​ເລິກ​ຄົ້ນຄວ້າ ​ແລະ ກຳ​ບັນຫາ​ທີ່​ເປັນ​ຂອດ​ອຸດ​ຕັນ ​ແລະ ຖ່ວງ​ດຶງ​ການ​ສົ່ງ​ເສີມການ​ຜະລິດ​ເປັນ​ສິນຄ້າ ​ແລະ ກຽມ​ລາຍ​ງານ​ຕໍ່​ກອງ​ປະຊຸມ​ລັດຖະບານ​ໃນ​ທ້າຍ​ເດືອນ​ນີ້. ສ່ວນວຽກ​ງານ​ສົ່ງ​ເສີມ​ການ​ພັດທະນາ​ວິ​ສາ​ຫະກິດ​ຂະໜາດ​ນ້ອຍ ​ແລະ ກາງ​ກໍໄດ້​ດຳ​ເນີນ​ໄປ​ຢ່າງ​ຕໍ່​ເນື່ອງ, ລັດຖະບານ​ໄດ້​ອອກດຳລັດ​ຮັບຮອງ​ເອົາ​ແຜນ​ພັດທະນາ​ວິ​ສາ​ຫະກິດ​ຂະໜາດ​ນ້ອຍ ​ແລະ ຂະໜາດ​ກາງ​ໄລຍະ 2016-2020 ​ໃນ​ເດືອນ​ສິງຫາ​ຜ່ານ​ມາ ​ແລະ ​ໄດ້​ມອບ​ໃຫ້​ກະຊວງ​ອຸດສາຫະກຳ ​ແລະ ການ​ຄ້າ​ເປັນ​ໃຈກາງ​ໃນ​ການ​ຜັນ​ຂະຫຍາຍ ​ແລະ ຈັດຕັ້ງປະຕິບັດ, ພ້ອມ​ນີ້ ລັດຖະບານ​ກໍ​ໄດ້​ຊີ້​ນຳ​ໃຫ້​ປັບປຸງ​ກອງ​ທຶນ​ສົ່ງ​ເສີມ​ວິ​ສາ​ຫະກິດ​ຂະໜາດ​ນ້ອຍ ​ແລະ ຂະໜາດ​ກາງ​ໃຫ້​ເຂັ້ມ​ແຂງ ​ແລະ ມີ​ປະສິດທິພາບ ​ເພື່ອ​ເປັນ​ກຳລັງ​ພັກ​ດັນ​ໃຫ້​ວິ​ສາ​ຫະກິດ​ດັ່ງກ່າວ​ເຕີບ​ໃຫຍ່​ຂະຫຍາຍຕົວ. ສ່ວນວຽກ​ງານ​ປັບປຸງ​ລັດ​ວິ​ສາ​ຫະກິດ, ​ເຖິງ​ວ່າ​ໄດ້​ດຳ​ເນີນ​ໄປ​ຊ້າແຕ່​ກໍ​ມີ​ຄວາມ​ຄືບ​ໜ້າ, ​ໂດຍ​ສະ​ເພາະ​ແມ່ນ​ການ​ປັບປຸງລັດ​ວິ​ສາ​ຫະກິດ​ການບິນ​ລາວ ​ແລະ ລັດ​ວິ​ສາ​ຫະກິດ​ໄຟຟ້າ​ລາວ ​ເຊິ່ງ​ເປັນ​ບໍລິສັດ​ຂະໜາດ​ໃຫຍ່ ​ແລະ ມີ​ລາຍ​ຮັບ-ລາຍ​ຈ່າຍ​ຫລາຍ, ໂດຍລັດຖະບານ​ໄດ້​ຊີ້​ນຳ​ການ​ປັບປຸງ​ຢ່າງ​ໃກ້ຊິດ, ທັງ​ກວດກາ, ທັງຄົ້ນຄວ້າ​ປັບປຸງ​ໄປ​ພ້ອມໆ​ກັນ ​ເພື່ອ​ຫລຸດຜ່ອນ​ການ​ຖົມ​ຂຸມ​ຂອງ​ລັດ ​ແລະ ສ້າງ​ໃຫ້​ບໍລິສັດ​ເຂັ້ມ​ແຂງ​ດ້ວຍ​ຕົນ​ເອງ, ທັງ​ເປັນ​ກຳລັງ​ແຮງ​ໃຫ້​ແກ່​ເສດຖະກິດ​ຂອງ​ຊາດ.

- lattana 1 - ລັດຖະບານປັບປຸງຫລາຍຂອດເພື່ອສ້າງພື້ນຖານເສດຖະກິດຂອງປະເທດໃຫ້ເຂັ້ມແຂງ
error: Content is protected !!