ມັລແວໂຕໃໝ່ໂຈມຕີເປົ້າໝາຍ ຢູ່ຣັດເຊຍ ແລະ ເອີຣົບເກືອບ 200 ແຫ່ງ
ແຄສເປີສກີ ບໍລິສັດຊອບແວແອນຕີໄວຣັດຂອງຣັດເຊຍ ເປີດເຜີຍວ່າ: BadRabbit ມັລແວທີ່ເຈາະລະບົບສະໜາມບິນສາກົນຂອງອູແກຣນ ແລະ ສື່ຣັດເຊຍຫລາຍແຫ່ງໄດ້ໂຈມຕີເປົ້າໝາຍເກືອບ 200 ແຫ່ງໃນສອງປະເທດນີ້ ແລະ ຢູ່ເອີຣົບ.
ມັລແວຮຽກຄ່າໄຖ່ນີ້ອາລະວາດໃນວັນທີ 24 ຕຸລາ ຮຸນແຮງທີ່ສຸດນັບແຕ່ມັລແວ NotPetny ລະບາດຢູ່ອູແກຣນ ແລະ ຣັດເຊຍກ່ອນລາມໄປທົ່ວໂລກໃນເດືອນກໍລະກົດ. ເວັບໄຊທີ່ຕິດມັລແວຈະປາກົດຂໍ້ຄວາມໃຫ້ຈ່າຍເງິນຄ່າໄຖ່ຈຶ່ງຈະກູ້ຄືນໄຟລໄດ້. ແຄສເປີສກີ ລະບຸວ່າ: ເປົ້າໝາຍສ່ວນຫລາຍຢູ່ຣັດເຊຍ ທີ່ເຫລືອພົບຢູ່ອູແກຣນ, ຕວກກີ ແລະ ເຢຍລະມັນ ລວມທັງໝົດເກືອບ 200 ແຫ່ງ.
ຟອນທັນກາ ເວັບໄຊຂ່າວອິດສະຫລະຢູ່ນະຄອນເຊນປີເຕີສເບິກທີ່ຖືກເຈາະລະບົບເຊື່ອວ່າ: ເປັນຍ້ອນການຕິດຕາມລາຍງານຂ່າວສືບສວນເລື່ອງຣັດເຊຍພົວພັນກັບສົງຄາມກາງເມືອງຢູ່ຊີຣີ, ແຕ່ທາງການຣັດເຊຍ ແລະ ອູແກຣນເບິ່ງວ່າ: ຜູ້ເຈາະລະບົບຕ້ອງການຮຽກຄ່າໄຖ່ຫລາຍກວ່າມີເປົ້າໝາຍອື່ນ, ສ່ວນທີມຄວາມພ້ອມສຸກເສີນ ກະຊວງຄວາມໝັ້ນຄົງມາຕຸພູມຂອງອາເມລິກາເຕືອນຜູ້ຕົກເປັນເຫຍື່ອມັລແວ BadRabbit ຢ່າຈ່າຍເງິນຄ່າໄຖ່ ເພາະບໍ່ມີຫລັກປະກັນວ່າຈະໄດ້ໄຟລຄືນ.
