ຫລາຍພາກສ່ວນມອບເຄື່ອງຊ່ວຍເຫລືອໃຫ້ຜູ້ປະສົບໄພພິບັດທາງທຳມະຊາດ
ເມື່ອບໍ່ດົນມານີ້, ກະຊວງແຮງງານ ແລະ ສະຫວັດດີການສັງຄົມ, ໄດ້ຮັບເຄື່ອງຊ່ວຍເຫລືອ ແລະ ເງິນສົດຈຳນວນໜຶ່ງ ຈາກຫ້ອງວ່າການສຳນັກງານນາຍົກລັດຖະມົນຕີ ຈຳນວນ 15 ລ້ານກີບ ແລະ ເຄື່ອງນຸ່ງຫົ່ມ, ອຸປະກອນກິລາ ໃນມູນຄ່າ 64 ລ້ານກວ່າກີບ, ລວມມູນຄ່າທັງໝົດ 79 ລ້ານກວ່າກີບ; ຫ້ອງວ່າການປະທານປະເທດ ມີຜ້າຫົ່ມຈຳນວນ 151 ຜືນ, ລວມມູນຄ່າ 5 ລ້ານກີບ; ກອງວາລະສານປ້ອງກັນຊາດ, ກະຊວງປ້ອງກັນປະເທດ ໄດ້ມອບເງິນສົດຈຳນວນ 1 ລ້ານກີບ ເພື່ອເປັນການປະກອບສ່ວນຊ່ວຍເຫລືອແກ່ຜູ້ປະສົບໄພພິບັດທາງທຳມະຊາດຢູ່ຕາມແຂວງຕ່າງໆໃນທົ່ວປະເທດໃຫ້ທົ່ວເຖິງ, ເພື່ອຊ່ວຍໃຫ້ການດຳລົງຊີວິດຂອງເຂົາເຈົ້າກັບຄືນສູ່ປົກກະຕິໂດຍໄວ.
ພິທີມອບ-ຮັບເຄື່ອງຊ່ວຍເຫລືອດັ່ງກ່າວ, ມີຂຶ້ນທີ່ກະຊວງແຮງງານ ແລະ ສະຫວັດດີການສັງຄົມ, ລະຫວ່າງທ່ານ ລີປາວ ຢາງ ຫົວໜ້າຫ້ອງການກະຊວງແຮງງານ ແລະ ສະຫວັດດີການສັງຄົມ ແລະ ຜູ້ຕາງໜ້າຈາກຫ້ອງວ່າການສຳນັກງານນາຍົກລັດຖະມົນຕີ, ຫ້ອງວ່າການປະທານປະເທດ, ກອງວາລະສານປ້ອງກັນຊາດ.
