10 ກິດຈະກຳທີ່ຈະຊ່ວຍໃຫ້ ທ່ານສະຫລາດຂຶ້ນກ່ວາເກົ່າ
November 1, 2017 - 4:22 PM
- ຫລິ້ນດົນຕີ : ກິດຈະກຳທຳອິດທີ່ເຮົາຈະເວົ້າເຖິງກໍແມ່ນສິ່ງທີ່ໄວໜຸ່ມສ່ວນຫລາຍ ໂດຍສະເພາະໄວໜຸ່ມຊາຍລຶ້ງເຄີຍກັນເປັນ ຢ່າງດີ ນັ້ນກໍແມ່ນການຫລິ້ນດົນຕີ ຈາກວຽກງານວິໄຈພົບວ່າ : ດົນຕີສາມາດເຂົ້າໄປມີສ່ວນກະຕຸ້ນໃຫ້ສະໝອງ ແລະ ອາລົມຂອງເຮົາໃຫ້ເຮັດວຽກໄດ້ດີ ແລະ ທີ່ໜ້າປະຫລາດໃຈກໍຄື ການຫລິ້ນດົນຕີຊ່ວຍເພີ່ມພື້ນທີ່ຄວາມຈື່ຈຳຂອງເຮົາໄດ້ ແລະ ຍັງຊ່ວຍຝືກຄວາມອົດທົນໄດ້ເປັນຢ່າງດີ ເພາະກ່ອນຈະຫລິ້ນດົນຕີເປັນນັ້ນ ເຮົາຈະຕ້ອງໃຊ້ທັງຄວາມພະຍາຍາມ ແລະ ຄວາມອົດທົນຫລາຍ ທັງຍັງເປັນການຝຶກສະມາທິໄປໃນໂຕນຳອີກ.
- ອ່ານໜັງສື : ເປັນທີ່ຮູ້ກັນດີວ່າການອ່ານໜັງສືເຮັດໃຫ້ເຮົາສະຫລາດຂຶ້ນ ແລະ ຍິ່ງທ່ານອ່ານໜັງສືຫລາຍໆປະເພດ ບໍ່ວ່າຈະເປັນນະວະນິຍາຍຫຍັງກໍຕາມ, ຊີວະປະຫວັດ ຫລື ແມ່ນແຕ່ບົດປະພັນໜັງສືເຫລົ່ານີ້ລ້ວນຊ່ວຍເປີດໂລກຄວາມຄິດຂອງທ່ານໃຫ້ກ້ວາງຂຶ້ນ ແລະ ການອ່ານຍັງຊ່ວຍຫລຸດຄວາມເຄັ່ງຄຽດ ແລະ ຊ່ວຍໃຫ້ທ່ານມີອາລົມທີີ່ຫລາກຫລາຍ ປັດໄຈເຫລົ່ານີ້ທີ່ເປັນໂຕຊ່ວຍເຮັດໃຫ້ທ່ານຮູ້ສຶກດີກັບໂຕເອງ ແລະ ກາຍເປັນຄົນຄິດບວກໄດ້ໃນບໍ່ຊ້າ ແລະ ສິ່ງສຳຄັນກໍແມ່ນການອ່ານຊ່ວຍໃຫ້ເຮົາສາມາດຮັບມືໃນສະຖານະການຕ່າງໆໄດ້ເປັນຢ່າງດີ ແລະ ທ້າຍທີ່ສຸດກໍເຮັດໃຫ້ທ່ານປະສົບຄວາມສຳເລັດໃນຊີວິດນຳ ເຫັນບໍ່ ວ່າການອ່ານນັ້ນມີປະໂຫຍດກັບເຮົາປານໃດ ດັ່ງນັ້ນ ຫັນມາຈັບໜັງສືເລື້ອຍໆໃຫ້ກາຍເປັນນິໄສ ແລະ ເປັນກິດຈະກຳຂອງເຮົາກັນ ເລີີຍດີກ່ວາ.
- ນັ່ງສະມາທິ : ຄົນສ່ວນຫລາຍມັກຈະບໍ່ສົນໃຈ ແລະ ບໍ່ຄ່ອຍນັ່ງສະມາທິກັນປານໃດ ເຊິ່ງການນັ່ງສະມາທິເຮັດໃຫ້ທ່ານຫັນ ມາສົນໃຈໂຕເອງ ແລະ ຮູ້ຈັກຕົນເອງຫລາຍຂຶ້ນ ທ້າຍທີ່ສຸດ ການຈົດຈໍ່ຢູ່ກັບສະມາທິສາມາດເຮັດໃຫ້ເຮົາເຂົ້າໃຈເຖິງຊີວິດໃນບໍ່ຊ້າ. ນອກຈາກນີ້, ການນັ່ງສະມາທິຍັງຊ່ວຍບຳບັດຄວາມເຄັ່ງຄຽດ ແລະ ຄາຍຄວາມກັງວົນ ຍິ່ງເຮົາມີສະມາທິຫລາຍ ກໍໍຈະເຮັດໃຫ້ເຮົາຄິດສ້າງສັນ ແລະ ຮຽນຮູ້ສິ່ງຕ່າງໆໄດ້ງ່າຍຶ້ນ ແລະ ສິ່ງສຳຄັນ ການນັ່ງສະມາທິຊ່ວຍໃຫ້ທ່ານມີສັກກະຍະພາບໃນການຄວບຄຸມຕົນເອງ ແລະ ຄຳນຶງຮູ້ເຖິງຄວາມສາມາດຂອງຕົນເອງນຳ.
- ບໍລິຫານສະໝອງ : ຄືກັນກັບການທີ່ເຮົາອອກກຳລັງກາຍເພື່ອໃຫ້ຮ່າງກາຍ ແລະ ສຸຂະພາບຂອງເຮົາດີ ສະໝອງຂອງເຮົາກໍຕ້ອງການການອອກກຳລັງກາຍຄືກັນ ວິທີການບໍລິຫານສະໝອງນັ້ນງ່າຍ ແລະ ມີຫລາກຫລາຍວິທີ ເຊັ່ນ : ການຫລິ້ນເກມປິດສະໜາ, ການຫລິ້ນ Puzzle ຫລື ເກມໝາກດ້າມ, ໝາກຣຸກ, ເກມພວກ Sudoku ເຊິ່ງກິດຈະກຳເຫລົ່ານີ້ຊ່ວຍໃຫ້ສະໝອງຂອງເຮົາເຮັດວຽກຢ່າງຕໍ່ເນື່ອງ ແລະ ສາມາດແກ້ໄຂສະຖານະການຕ່າງໆໄດ້ດີ ທັງຍັງຊ່ວຍພັດທະນາສະໝອງຂອງເຮົາໃຫ້ຄິດສ້າງສັນຫລາຍຂຶ້ນນຳອີກ.
- ອອກກຳລັງກາຍເປັນປະຈຳ : ການມີສຸຂະພາບຮ່າງກາຍທີ່ດີ ສົ່ງຜົນໃຫ້ສະໝອງຂອງເຮົາເຮັດວຽກໄດ້ເປັນຢ່າງດີ ດັ່ງນັ້ນ ຫັນມາອອກກຳລັງກາຍກັນຖ້ອນ ແລະ ນອກຈາກຈະເຮັດໃຫ້ເຮົາມີຮູບຮ່າງງາມສົມສ່ວນແລ້ວ ຍັງຊ່ວຍຫລຸດຫລຸດຄວາມເຄັ່ງຄຽດ ແລະ ເຮັດໃຫ້ນອນຫລັບແຈບດີນຳ ຈາກວຽກງານວິໄຈພົບວ່າການອອກກຳລັງກາຍແບບແອໂຣບິກ (Aerobic Exercise) ຊ່ວຍສ້າງແຊນສະໝອງໃໝ່ໆໄດ້ ເຊິ່ງຊ່ວຍໃຫ້ສະໝອງຂອງເຮົາມີປະສິດທິພາບຫລາຍຍິ່ງຂຶ້ນ.
- ຮຽນຮູ້ພາສາໃໝ່ໆ : ຫາກເວົ້າເຖິງພາສາແລ້ວ ຄົນສ່ວນຫລາຍມັກຈະປິ່ນໜ້າໜີ ເພາະມັນອ່າວຍາກ, ແຕ່ຈາກວຽກງານວິ ໄຈຊຳ້ພັດພົບວ່າ : ການຮຽນພາສາໃໝ່ໆຊ່ວຍເຮັດໃຫ້ເຮົາສະຫລາດຂຶ້ນ ເພາະຂະບວນການຮຽນພາສາໃໝ່ໆນັ້ນສ່ວນຫລາຍ ຈະກ່ຽວຂ້ອງກັບຫລັກໂຄງສ້າງ ແລະ ໄວຍາກອນຂອງພາສາ. ການຮຽນຮູ້ພາສາໃໝ່ໆຊ່ວຍໃຫ້ລະບົບພາສາໃນສະໝອງຂອງ ເຮົາເຮັດວຽກຮ່ວມກັບສະໝອງພາກສ່ວນທີ່ຄິດແກ້ໄຂບັນຫາ, ວາງແຜນ ແລະ ຕັດສິນໃຈໄດ້ດີຍິ່ງຂຶ້ນ. ດັ່ງນັ້ນ ຈຶ່ງບໍ່ແປກທີ່ຄົນ ຮຽນພາສາໃໝ່ໆຢູ່ຕະຫລອດເວລາມັກຈະເປັນຄົນທີ່ມີໄຫວພິບດີ.
- ຈົດບັນທຶກຄວາມຮູ້ສຶກ : ຫາກທ່ານຢາກເປັນຄົນສະຫລາດຂຶ້ນ ລອງຝຶກຂຽນເບິ່ງ ການຂຽນຊ່ວຍພັດທະນາຄວາມສາມາດທາງດ້ານພາສາ ທັງຍັງຊ່ວຍຝຶກສະມາທິ, ຄວາມຄິດສ້າງສັນ ແລະ ຈິນຕະນາການ ທ່ານເອງກໍສາມາດຝຶກໃຊ້ສະໝອງຈາກວຽກງານການຂຽນໄດ້ຫລາກຫລາຍຮູບແບບ ບໍ່ວ່າຈະເປັນຂຽນສິ່ງທີ່ທ່ານຄິດລົງໄປ ຫລື ຄວາມຮູ້ສຶກຕ່າງໆທີ່ມີນັ້ນຈະຍິ່ງເຮັດໃຫ້ສະໝອງຂອງທ່ານເຮັດວຽກດີຂຶ້ນ.
- ທ່ອງທ່ຽວໄປໃນສະຖານທີ່ໃໝ່ໆ : ການອອກເດີນທາງທ່ອງທ່ຽວນັ້ນບໍ່ພຽງແຕ່ຈະຊ່ວຍໃຫ້ທ່ານເຊົາເບື່ອ, ແຕ່ຍັງຊ່ວຍໃຫ້ ທ່ານສະຫລາດຂຶ້ນນຳ ເພາະລະບົບຮ່າງກາຍ ແລະ ສະໝອງຂອງເຮົາຈະຮູ້ສຶກຫ້າວຫັນໃນຂະນະທີ່ເຮົາໄດ້ເດີນທາງທ່ອງທ່ຽວ ເຮັດໃຫ້ເຮົາຄາຍຄວາມກັງວົນ ແລະ ຄວາມເຄັ່ງຄຽດພາຍໃນຈິດໃຈໄດ້ ຊ່ວຍໃຫ້ທ່ານສາມາດເຂົ້າໃຈສິ່ງຕ່າງໆອ້ອມໂຕໄດ້ງ່າຍຂຶ້ນນຳ ທຸກສະຖານທີ່ໃໝ່ໆທີ່ທ່ານໄດ້ໄປຢ້ຽມຢາມມັກຈະມີເລື່ອງລາວໃຫ້ທ່ານໄດ້ຮຽນຮູ້ ບໍ່ວ່າຈະເປັນຜູ້ຄົນ, ອາຫານ, ວັດທະນະທຳ ຫລື ວິຖີຊີວິດ ສິ່ງເຫລົ່ານີ້ທີ່ຊ່ວຍເຮັດໃຫ້ທ່ານໄດ້ສຳຜັດກັບແນວຄິດ ແລະ ໄອເດຍໃໝ່ໆ ດັ່ງນັ້ນ ລອງກ້າວອອກຈາກເຮືອນແລ້ວເດີນທາງທ່ອງທ່ຽວກັນແດ່.
- ປຸງແຕ່ງອາຫານເມນູໃໝ່ໆ : ຄົນສ່ວນຫລາຍມັກຄິດວ່າການປຸງແຕ່ງອາຫານເປັນສິ່ງທີ່ອ່າວເສຍເວລາ ແລະ ມັກຈະເອົາເວລານີ້ໄປເຮັດກິດຈະກຳອື່ນດີກ່ວາ, ແຕ່ທ່ານຮູ້ຫລືບໍ່ວ່າມັນແມ່ນສິ່ງທີ່ຊ່ວຍພັດທະນາສະໝອງຂອງເຮົາທີ່ດີວິທີໜຶ່ງ ເພາະຫາກທ່ານຮັກທີ່ຈະເຮັດອາຫານ ແລະ ໄດ້ເຮັດມັນຢ່າງມີຄວາມສຸກ ທ່ານຈະກາຍເປັນຄົນທີ່ມີຄວາມຄິດສ້າງສັນ ແລະ ເປັນຄົນທີ່ໃສ່ໃຈໃນລາຍລະອຽດເລັກໆນ້ອຍໆ ອີກໜຶ່ງທັກສະທີ່ທ່ານຈະໄດ້ຮັບຈາກການເຮັດອາຫານກໍແມ່ນທ່ານຈະໄດ້ຮຽນຮູ້ການເຮັດຫຍັງຫລາຍໆຢ່າງໃນເວລາດຽວກັນ ເຊິ່ງຈະຊ່ວຍໃຫ້ທ່ານສາມາດແກ້ໄຂສະຖານະການສະເພາະໜ້າໄດ້ຢ່າງວ່ອງໄວ.
10. ຫລິ່ນກິລາ : ໜ້າແປກໃຈທີ່ການຫລິ້ນກິລາບໍ່ພຽງແຕ່ເປັນການອອກກຳລັງກາຍເພື່ອເສີມສ້າງກ້າມຊີ້ນ ແຕ່ຍັງເປັນການຝຶກບໍລິຫານສະໝອງຂອງເຮົາໄປນຳ ນອກຈາກນີ້ ການເບິ່ງກິລາກໍໍຖືເປັນການຝຶກຝົນສະໝອງເຊັ່ນກັນ ເນື່ອງຈາກໃນຂະນະທີ່ທ່ານເບິ່ງການຫລິ້ນກິລາຄືກັບທ່ານໄດ້ມີສ່ວນຮ່ວມໃນການແຂ່ງຂັນ ສະໝອງຂອງທ່ານກໍຈະຍັງຄົງເຮັດວຽກຢູ່ຢ່າງຕໍ່ເນື່ອງ ນັກກິລາຜູ້ເກັ່ງໆທີ່ມີພອນສະຫວັນດ້ານກິລາ ບໍ່ວ່າຈະເປັນນັກກິລາບານເຕະ, ບານບ້ວງ ຫລື ແມ່ນແຕ່ນັກກິລາຣັກບີ້ ມັກຈະຮູ້ດີວ່າຍິ່ງພວກເຂົາຝຶກຝົນການຫລິ້ນກິລາຫລາຍເທົ່າໃດ ພວກເຂົາກໍຈະຍິ່ງສະຫລາດ ແລະ ເປັນເລີດໃນການຫລິ້ນກິລາຫລາຍເທົ່ານັ້ນ.
