ຢ່າໃຫ້ງານບຸນປະເພນີຖືກສວຍໃຊ້ໄປໃນທາງທີ່ບໍ່ດີ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ເມື່ອບຸນໃຫຍ່ນະມັດສະການພະທາດຫລວງໄດ້ສຳເລັດລົງແລ້ວ ດ້ວຍຜົນອັນຈົບງາມທີ່ໄດ້ຕິດພັນກັບການເປີດປີທ່ອງທ່ຽວລາວ 2018 ແລະ ນັບແຕ່ນີ້ເປັນຕົ້ນໄປ ງານບຸນປະເພນີນ້ອຍໃຫຍ່ຕ່າງໆກໍຈະຕາມມາຢ່າງບໍ່ຂາດສາຍ ຄືສະເພາະໜ້ານີ້ກໍຈະມີບຸນກັນຖິນ, ບຸນພະເຫວດສັນດອນ, ບຸນບ້ານ ແລະ ເຜົ່າຕ່າງໆ, ຕໍ່ຈາກນັ້ນກໍຈະແມ່ນການຕ້ອນຮັບປີໃໝ່ 2018, ປີໃໝ່ລາວ ແລະ ອື່ນໆ ເພື່ອສ້າງບັນຍາກາດເບີກບານມ່ວນຊື່ນໃຫ້ແກ່ມວນຊົນຊາວລາວເຮົາ ພາຍຫລັງສຳເລັດການເກັບກ່ຽວມ້ຽນມັດຜົນຜະລິດກະສິກຳຂອງຕົນ ແລະ ກໍອາດຈະເປັນທ່າແຮງຕົ້ນຕໍ ເພື່ອດຶງດູດແຂກບ້ານແຂກເມືອງເຂົ້າມາທ່ຽວລາວໃຫ້ຫລາຍຂຶ້ນ ແລະ ສາມາດບັນລຸເປົ້າໝາຍຂອງປີທ່ອງທ່ຽວລາວວາງອອກໃຫ້ໄດ້ 5 ລ້ານເທື່ອຄົນ ເພື່ອນຳເອົາລາຍຮັບຢ່າງມະຫາສານ 8-900 ລ້ານໂດລາມາສູ່ຊາດ.
ແຕ່ໜ້າເສຍດາຍໃນຜ່ານມາ ມີຫລາຍງານບຸນໄດ້ຖືກສວຍໃຊ້ໄປໃນທາງທີ່ບໍ່ຄ່ອຍດີປານໃດ ໂດຍສະເພາະແມ່ນການສວຍໃຊ້ງານບຸນປະເພນີດັ່ງກ່າວເປັນບ່ອນຫາແຫລ່ງລາຍຮັບຂອງບຸກຄົນ ຫລື ກຸ່ມຄົນໃດໜຶ່ງ ອັນເຮັດໃຫ້ຜູ້ມາຮ່ວມຫລິ້ນບຸນເສຍສັດທາ ຄືການຈັບຈອງບູດຂາຍເຄື່ອງແພງເກີນໄປ, ການເກັບຄ່າຝາກລົດແພງເກີນໄປ ແລະ ການບໍລິການອື່ນໆມີລັກສະນະສວຍໂອກາດ. ຖ້າແມ່ນງານບຸນຢູ່ເຂດນອກກໍມັກຈະມີການຫລິ້ນພະນັນບິງໂກ, ປູປາ, ໝາກກະລ໋ອກ ແລະ ຫລິ້ນໄພ້ຫລິ້ນເບີຕ່າງໆ ອັນເຮັດໃຫ້ສິ່ງດີງາມຂອງບຸນປະເພນີຖືກຕີຖອຍ. ຖ້າເປັນບຸນບ້ານກໍມີການຈັດລຳວົງເພື່ອຫາລາຍໄດ້ ຮອບນັ້ນຮອບນີ້ກໍລ້ວນແລ້ວແຕ່ເກັບເປັນເງິນ ເບິ່ງແລ້ວບໍ່ຄ່ອຍງົດງາມ.
ເອົາລະ ເວົ້າມາກໍຫລາຍ, ແຕ່ງານບຸນປະເພນີປີນີ້ຂໍຢ່າໃຫ້ເປັນແນວນັ້ນເນີ້, ຂໍໃຫ້ເປັນຈຸດເຕົ້າໂຮມຄວາມສາມັກຄີຮັກແພງຂອງປະຊາຊົນບັນດາເຜົ່າ, ເປັນຈຸດສ້າງບັນຍາກາດເບີກບານມ່ວນຊື່ນ ເພື່ອຮອງຮັບປີທ່ອງທ່ຽວລາວຢ່າງແທ້ຈິງ, ສ້າງໃຫ້ງານບຸນປະເພນີຕ່າງໆເຫລົ່ານັ້ນເປັນບ່ອນເອກອ້າງ ແລະ ດຶງດູດນັກທ່ອງທ່ຽວໃຫ້ມີຄວາມປະທັບໃຈ, ມາແລ້ວຢາກມາອີກ, ເບິ່ງແລ້ວຢາກເບິ່ງອີກ ແຫ່ງຄວາມງົດງາມຂອງງານບຸນປະເພນີດັ່ງກ່າວ.
